ព័ត៌មានអន្ដរជាតិ

អាមេរិក ប្រកាសដកទណ្ឌកម្មលើតួកគី និងពិចារណាលក់យន្តហោះចម្បាំង F-35 ឱ្យទីក្រុងអង់ការ៉ាឡើងវិញ

បានផុស

១៣ វិនាទី មុន

នៅ

ថ្ងៃពុធ ៨ កក្កដា ២០២៦

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ លើកឡើង ថា ខ្លួននឹងលុបចោលទណ្ឌកម្មលើប្រទេសតួកគី ហើយនឹងសម្រេចចិត្ត បន្តលក់យន្តហោះចម្បាំង F-35 ទៅឱ្យប្រទេសនេះក្នុងពេលឆាប់ៗឡើងវិញ។ នេះបើតាមសារព័ត៌មាន Al Jazeera ផ្សាយនៅថ្ងៃទី៧ ខែកក្កដា ឆ្នាំ២០២៦ ។

សេចក្តីថ្លែងការណ៍កាលពីថ្ងៃអង្គារបានកើតឡើង ពេល លោក ត្រាំ បានចួបជាមួយប្រធានាធិបតីតួកគី លោក Recep Tayyip Erdogan នៅក្រៅកិច្ចប្រជុំកំពូលមេដឹកនាំណាតូ នៅទីក្រុងអង់ការ៉ា។

លោក ដូ ណាល់ ត្រាំ និង លោក Recep Tayyip Erdogan . រូបភាព៖ AFP

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្លាស់ប្ដូរទិសដៅនេះកើតឡើង បន្ទាប់ពីសហរដ្ឋអាមេរិកបានដកប្រទេសតួកគី ចេញពីកម្មវិធីយន្តហោះចម្បាំង F-35 បន្ទាប់ពីទីក្រុងអង់ការ៉ាបានទិញប្រព័ន្ធការពារដែនអាកាស S-400 របស់រុស្ស៊ីក្នុងឆ្នាំ២០១៩ ។

ទីក្រុងវ៉ាស៊ីនតោនក៏បានដាក់ទណ្ឌកម្មក្រោមច្បាប់ដែលហៅថាច្បាប់ប្រឆាំងសត្រូវរបស់អាមេរិកតាមរយៈទណ្ឌកម្ម(CAATSA)។

លោក ត្រាំ ប្រាប់អ្នកយកព័ត៌មានថា៖ « យើងនឹងដកទណ្ឌកម្មចេញ»។ លោកបន្ថែមថា លោកនឹងធ្វើការសម្រេចចិត្ត លើការលក់យន្តហោះចម្បាំង F-35 របស់សហរដ្ឋអាមេរិកទៅឱ្យប្រទេសតួកគីក្នុងពេលឆាប់ៗនេះ។ ប្រធានាធិបតីអាមេរិកបន្តថា៖ « នោះជាការសម្រេចចិត្តដែលយើងនឹងធ្វើ[…] វាជាយន្តហោះដ៏អស្ចារ្យ យន្តហោះដ៏ល្អបំផុត ហើយវាពិតជាអ្វីមួយដែលយើងនឹងពិចារណា»។

កិច្ចប្រជុំរវាង លោក ត្រាំ ជាមួយ លោក Erdogan បានប្រព្រឹត្តទៅ ចំពេលនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ កំពុងទទូចឱ្យសហរដ្ឋអាមេរិក កុំលក់យន្តហោះចម្បាំង F-35 ទៅឱ្យប្រទេសតួកគី៕

សម្រួល៖ ណឺ មិនា