ព័ត៌មានជាតិ

លេចចេញគំរូស្ពានឆ្លងទន្លេមេគង្គ គ្រោងសាងសង់ដោយជប៉ុនតាមផ្លូវជាតិលេខ ១

បានផុស

១០ ម៉ោង មុន

នៅ

ថ្ងៃព្រហស្បតិ៍ ៩ កក្កដា ២០២៦

ដោយ

កាលពីថ្ងៃទី ០៨ ខែកក្កដា ម្សិលមិញនេះ មន្រ្តីបច្ចេកទេសក្រសួងសាធារណការនិងដឹកជញ្ជូន និងមន្រ្តីតំណាងរដ្ឋបាលរាជធានីភ្នំពេញ រួមទាំងក្រុមបច្ចេកទេសអង្គការចៃការបស់ជប៉ុនបានរៀបចំសិក្ខាសាលាផ្សព្វផ្សាយ លើការសិក្សាគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ១ និងគម្រោងសាងសង់ស្ពានឆ្លងកាត់ទន្លេមេគង្គ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គោលបំណងនៃសិក្ខាសាលានេះ គឺដើម្បីលើកពីលទ្ធផលដែលក្រុមការងារបានសិក្សាគម្រោងកន្លងមករួមមាន៖

១). ការវាយតម្លៃនៃលទ្ធភាពគម្រោង
២). ការរៀបចំរចនាបទបឋម និងការប៉ាន់ស្មានប្រមាណតម្លៃ
៣). ការរៀបចំរបាយការណ៍សិក្សាវាយតម្លៃហេតុប៉ះពាល់បរិស្ថាន (IESIA)
៤). ការសិក្សារៀបចំផែនការសកម្មភាពការតាំងទីលំនៅឡើងវិញ (RAP)

នៅក្នុងសិក្ខាសាលាផ្សព្វផ្សាយ មន្រ្តីបច្ចេកទេសបានរំលេចគំរូស្ពានឆ្លងទន្លេមេគង្គ ដែលគ្រោងសាងសង់ក្រោមការគាំទ្រថវិកាពីរដ្ឋាភិបាលប្រទេសជប៉ុន។

បន្តចុចអាន៖ ស្ពានឆ្លងទន្លេធំៗចំនួន ៦ ស្ថិតក្នុងដំណាក់កាលសិក្សា និងឈានទៅបើកការដ្ឋានសាងសង់បន្តបន្ទាប់

នៅក្នុងពិធីបើកការដ្ឋានសាងសង់ចំណតផែកុងតឺន័រទឹកជ្រៅជំហានទី ១ នៅកំពង់ផែស្វយ័តក្រុងព្រះសីហនុ កាលពីថ្ងៃទី ២២ ខែធ្នូ ឆ្នាំ២០២៣ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានស្នើដល់រដ្ឋាភិបាលជប៉ុនពិនិត្យលទ្ធភាពជួយសាង សង់ស្ពានឆ្លងទន្លេមេគង្គពីក្តីតាកុយទៅអរិយក្សត្រ។

តាមរយៈអនុរដ្ឋមន្ត្រីក្រសួងរៀបចំដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ដែលផ្តើមធ្វើទស្សនកិច្ចនៅប្រទេសកម្ពុជា សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា ជប៉ុនគឺជាមិត្តដ៏សំខាន់ដែលបានរួមចំណែកក្នុងការអភិវឌ្ឍប្រទេសកម្ពុជាតាំងពីអតីតកាល បច្ចុប្បន្ន និងទៅអនាគត។

នៅក្នុងក្របខណ្ឌការអភិវឌ្ឍវិស័យសាធារណការ និងដឹកជញ្ជូន ប្រមុខដឹកនាំកម្ពុជា បានស្នើដល់រដ្ឋាភិបាលជប៉ុនបន្តជួយគាំទ្រដល់ការអភិវឌ្ឍហេដ្ឋារចនាសម្ព័ន្ធ ផ្លូវស្ពានក្នុងប្រទេសកម្ពុជាដែលក្នុងនោះតួយ៉ាង គម្រោងពង្រីកនិងលើកកម្ពស់កម្រិតគុណភាពផ្លូវជាតិលេខ ១ ទៅដល់ស្ពានអ្នកលឿង និងស្ពានឆ្លងកាត់ទន្លេមេគង្គ ក្តីតាកុយ-ទៅអរិយក្សត្រជាដើម៕