ព័ត៌មានជាតិ

ចាប់ពីថ្ងៃ ១ ខែកក្កដា ចរាចរណ៍តាមផ្លូវជាតិលេខ ១ និងមហាវិថី ស៊ី ជីនពីង ក្បែរការដ្ឋានស្ពានដីឥដ្ឋ បិទបណ្តោះអាសន្ន

បានផុស

២២ វិនាទី មុន

នៅ

ថ្ងៃអាទិត្យ ២៨ មិថុនា ២០២៦

ដោយ

ក្រសួងសាធារណការ និងដឹកជញ្ជូន បានចេញសេចក្តីជូនដំណឹងស្តីពីការបិទចរាចរណ៍យានយន្តគ្រប់ប្រភេទជាបណ្តោះអាសន្នលើផ្លូវជាតិលេខ ១ មហាវិថី ស៊ី ជីនពីង (ផ្លូវក្រវាត់ក្រុងទី៣) និងផ្លូវរណប ប៉ះពាល់ដោយសារគម្រោងសាងសង់ស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ)។

ក្នុងសេចក្តីប្រកាសជូនដំណឹងរបស់ក្រសួងសាធារណការ និងដឹកជញ្ជូនបានបញ្ជាក់ថា ក្នុងអំឡុងពេលអនុវត្តគម្រោងសាងសង់ស្ពានឆ្លងកាត់ ទន្លេមេគង្គ (ដីឥដ្ឋ-ថ្មគរ) កំណាត់ផ្លូវជាតិលេខ១ ត្រង់ចំណុចគីឡូម៉ែត្រលេខ២៤+៦០០ និងមហាវិថី ស៊ី ជីនពីង ត្រង់ចំណុចគីឡូម៉ែត្រលេខ ២+៨០០ រួមទាំងផ្លូវរណបមួយចំនួនក្បែរការដ្ឋាន មានទីតាំងឃុំដីឥដ្ឋ ស្រុកកៀន ស្វាយខេត្តកណ្តាល នឹងត្រូវបិទជាបណ្តោះអាសន្ន ចាប់ពីថ្ងៃទី១ ខែកក្កដា ឆ្នាំ២០២៦ វេលាម៉ោង ៧ ព្រឹកតទៅ រហូតដល់ការដ្ឋានគម្រោងត្រូវបានបញ្ចប់។

ដើម្បីឱ្យការធ្វើដំណើរប្រកបដោយសុវត្ថិភាព និងគម្រោងសាងសង់ស្ពានប្រព្រឹត្តទៅដោយរលូន ក្រសួងសាធារណការ និងដឹកជញ្ជូន បានសហការជាមួយក្រុមហ៊ុនសាងសង់រៀបចំបង្វែរទិសចរាចរណ៍ជាបណ្តោះអាសន្នចេញពីទីតាំងការដ្ឋានស្ពាន ធ្វើយ៉ាងណាកុំឲ្យប៉ះពាល់អាចឲ្យគម្រោងដំណើរការស្ថាបនាសម្រេចតាមផែនការ៕