គិតត្រឹមចុងខែសីហានេះ កម្ពុជា មានវ៉ាក់សាំងកូវីដ-១៩ ចំនួន២៧លានដូស

នៅព្រឹកថ្ងៃអង្គារ ទី៣១ ខែសីហា ឆ្នាំ២០២១នេះ វ៉ាក់សាំងបង្ការជំងឺកូវីដ-១៩ ស៊ីណូវ៉ាក់ (Sinovac) ប្រមាណពីរលានដូសបន្ថែមទៀត ទើបបានដឹកមកដល់ប្រទេសកម្ពុជា ដើម្បីបម្រើដល់ដំណើរការចាក់ដូសជំរុញ ជូនប្រជាពលរដ្ឋ។

លោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានប្រាប់ឱ្យដឹងថា វ៉ាក់សាំងស៊ីណូវ៉ាក់ ដែលដឹកមកដល់ប្រទេសកម្ពុជានៅថ្ងៃនេះ គឺជាវ៉ាក់សាំងដែលរាជរដ្ឋាភិបាលបានបញ្ជាទិញ ដើម្បីយកមកបម្រើដល់ការចាក់ដូសជំរុញជូនប្រជាពលរដ្ឋ ដែលមកដល់ពេលនេះ កម្ពុជាមានវ៉ាក់សាំងសរុប២៧លានដូសហើយ។

លោកស្រី យក សម្បត្តិ មានប្រសាសន៍ថា៖ “សរុបវ៉ាក់សាំង២លានដូសថ្ងៃនេះទៀត យើងទទួលបានវ៉ាក់សាំង២៧លានដូសហើយ។ ហ្នឹងយើងរាប់បញ្ចូលទាំងវ៉ាក់សាំងយើងបញ្ជាទិញផង និងវ៉ាក់សាំងជំនួយផង យើងសរុបទាំងអស់២៧លានដូស រាប់មកត្រឹមខែសីហា ឆ្នាំ២០២១នេះ”។

វ៉ាក់សាំងបង្ការជំងឺកូវីដ១៩ គឺជាវីធីសាស្ត្រដ៏ចម្បងមួយសម្រាប់រាជរដ្ឋាភិបាលកម្ពុជា បន្ទាប់ពីវិធាននានារបស់ក្រសួងសុខាភិបាល ដើម្បីប្រយុទ្ធប្រឆាំងការរាតត្បាតជំងឺកូវីដ១៩។ រាជរដ្ឋាភិបាល ដែលមានសម្តេចតេជោ ហ៊ុន សែន ជាប្រមុខ បានស្វះស្វែង និងប្រឹងប្រែងជាខ្លាំងក្នុងការរកវ៉ាក់សាំងបង្ការជំងឺកូវីដ១៩ ចាក់ជូនប្រជាពលរដ្ឋ។

មកដល់ពេលនេះកម្ពុជា មានវ៉ាក់សាំងបង្ការជំងឺកូវីដ១៩ ប្រមាណ ២៧លានដូសរួចហើយ។ វ៉ាក់សាំងនេះ គឺមានទាំងជំនួយពីប្រទេសជាមិត្ត និងការបញ្ជាទិញរបស់រាជរដ្ឋាភិបាលពីក្រុមហ៊ុនរបស់ចិន។

អត្ថបទ៖ ច័ន្ទ វីរៈ