សម្ដេចតេជោ ហ៊ុន សែន ស្នើឲ្យរិះរក គ្រប់វិធានការ ដើម្បីឲ្យសិស្ស បានរៀនដោយផ្ទាល់ នៅតាមទីជនបទ ដែលពុំមានការឆ្លង

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានស្នើឲ្យរិះរកគ្រប់វិធានការ ដើម្បីឲ្យសិស្សានុសិស្ស បាន​រៀនសូត្រ​​ដោយផ្ទាល់ ជាពិសេសនៅតាមទីជនបទ ដែលពុំមានការឆ្លង និងការបើកឲ្យមានការរៀន មានលក្ខណៈចម្រុះ នៅតាមតំបន់ ដែលមានការឆ្លងតិច ហើយមានការចាក់វ៉ាក់សាំងគ្រប់គ្រាន់។ នេះបើយោងតាមសារ ជាសំឡេង​ពិសេ​ស របស់សម្ដេចតេជោ ហ៊ុន សែន ផ្ញើសារពិសេស ជូនរដ្ឋមន្រ្តីក្រសួងអប់រំ យុវ​​ជន និងកីឡា និងអភិបាលរាជធានី-ខេត្ត ឲ្យពិភាក្សាគ្នា ពាក់ព័ន្ធនឹងការបើកសាលារៀនឡើងវិញ នៅតាមតំបន់ដែលគ្មានការឆ្លង និងមានការឆ្លងតិចតួច នៃជំងឺកូវីដ-១៩។

នៅក្នុងសារជាសំឡេងនេះ សម្ដេចតេជោនាយក​រដ្ឋ​មន្ត្រី បានលើកឡើងថា កុមារនៅតាមទីជនបទ ពុំមាន​លទ្ធ​ភាពគ្រប់គ្រាន់ សម្រាប់ការរៀនតាមប្រព័ន្ធ អនឡាញ​នោះទេ ដោយសារបញ្ហាខ្វះខាតអ៊ីនធើណេត។ ដូច្នេះ​សម្ដេច​តេជោ ហ៊ុន សែន បានស្នើឲ្យរដ្ឋមន្ត្រីក្រសួងអប់រំ យុវជន និងកីឡា និងអភិបាលរាជធានី-ខេត្ត ពិភា​ក្សាគ្នា ដើម្បី​ពិនិត្យជ្រើសរើសសាលារៀន ដែលនឹងត្រូវបើកឲ្យសិស្សានុសិស្សរៀន ទាំងថ្នាក់បឋមសិក្សា និងមធ្យម​សិក្សាផងដែរ នៅតាមទីជនបទ ដែលពុំមានការឆ្លងរាលដាលជំងឺកូវីដ-១៩ ហើយត្រូវអនុវត្តវិធានការសុខាភិបាល ។ ដោយឡែក សម្រាប់ទីប្រជុំជន ដែលមានការឆ្លងតិច យើងអាចពិនិត្យ ឲ្យមានការរៀនបន្ត តាមអនឡាញ ឬរៀន​ទៅតាម​ស្ថាន​ភាពគូបផ្សំ រវាងការរៀនដោយផ្ទាល់ ដោយរក្សានូវគម្លាតសុវត្ថិភាព និងការរៀនតាមបែបចម្រុះ។

ប្រមុខរាជរដ្ឋាភិបាល បានលើកឡើងថា ដោយសារនៅទីក្រុង និងនៅទីប្រជុំជន មានលទ្ធភាពច្រើន ដែលមានអ៊ីន​ធើ​ណេត អាចឲ្យសិស្សានុសិស្សរៀនសូត្របាន ដែលអាចគូបផ្សំគ្នា រវាងកន្លែងដែលឆ្លងតិច ហើយនៅដែលកុមារា-កុមារី និងយុវវ័យរបស់យើង បានចាក់វ៉ាក់សាំងគ្រប់គ្រាន់ហើយនោះ យើងអាចឈានទៅដល់ ការបើកសាលា​រៀន​របស់យើងឡើងវិញ ដោយការបើកនេះ ត្រូវធានានូវគម្លាតសុវត្ថិភាព និងវិធានការសុខាភិបាល។

ចំពោះកន្លែង ដែលមានការឆ្លងជំងឺកូវីដ-១៩ច្រើន សូមបន្តរៀនតាមប្រព័ន្ធអនឡាញ ឬហៅថា រៀនពីចង្ងាយបន្ត​ទៀ​ត​​។ សម្ដេចតេជោ បានស្នើឲ្យក្រសួង-ស្ថាប័នពាក់ព័ន្ធ រិះរកគ្រប់វិធានការ ដើម្បីឲ្យសិស្សានុសិស្ស បានរៀនសូត្រ​ដោយផ្ទាល់ ជាពិសេសនៅតាមទីជនបទ ដែលពុំមានការឆ្លង និងការបើកឲ្យមានការរៀន មានលក្ខណៈចម្រុះ នៅ​តាមតំបន់ ដែលមានការឆ្លងតិច ហើយមានការចាក់វ៉ាក់សាំងគ្រប់គ្រាន់។

បើតាមរបាយការណ៍ ដែលសម្ដេចតេជោនាយករដ្ឋមន្ត្រី ទទួលបានពីបណ្ដារាជធានី-ខេត្ត មានប្រជាពលរដ្ឋ​សរុប​ចំនួន១២,៦៦១,៤៩៧នាក់។ ក្នុងនោះ មានការបែងចែក ក្រុមមនុស្សដែលត្រូវចាក់ រួមមាន៖ ពីអាយុ១៨ឆ្នាំ​ឡើង​ទៅ មានចំនួន១០,៦៣១,៥១២នាក់ និងកុមារ ព្រមទាំងយុវវ័យ អាយុចាប់ពី១២ឆ្នាំ ដល់ក្រោម១៨ឆ្នាំ ចំនួន២,០​២៩,៩៨៥នាក់។ គិតត្រឹមថ្ងៃទី២៩ ខែសីហា ឆ្នាំ២០២១ កុមារ និងយុវវ័យ បានចាក់វ៉ាក់សាំង ចំនួន១,៤៥៣,​០២១​នាក់ ដែលស្មើនឹង៧១.៥៨ភាគរយ នៃចំនួនកុមារ និងយុវវ័យ ដែលត្រូវចាក់ទាំងអស់។

បើតាមសម្ដេចតេជោ ហ៊ុន សែន មិនយូរប៉ុន្មាននោះទេ សិស្សានុសិស្ស នឹងទទួលបានការចាក់វ៉ាក់សាំង ទាំងដូស​ទី​១ និងដូសទី២ ហើយពួកគេ អាចនឹងមានភាពស៊ាំង ជាមួយនឹងវ៉ាក់សាំងនេះ។ រីឯគ្រូបង្រៀន នូវការចាក់វ៉ាក់សាំង រួច​រាល់​ហើយដែរ ទាំងដូសទី១ ដូសទី២ និងដូសជំរុញ។ ជាមួយគ្នានេះ សម្ដេចតេជោ យល់ថា សាលារៀននៅ​តាម​ទីជនបទ សូម្បីតែថ្នាក់បឋមសិក្សា ក៏អាចឲ្យកុមារចូលរៀនបានដែរ ពីព្រោះនៅទីនោះ ពុំមានការឆ្លងជំងឺកូវីដ-១៩​នោះទេ។

សម្ដេចតេជោ ហ៊ុន សែន បានស្នើឲ្យគិតគូ តាមរបៀបបត់បែន ហើយអនុវត្តតាមការជាក់ស្ដែង នៅតាមបណ្ដា​រាជ​ធានី​-ខេត្ត​នីមួយៗ ដោយកន្លែងណា មានលទ្ធភាពបើកសាលារៀនបាន គឺត្រូវបើក ហើយកន្លែងណា ពុំមានលទ្ធ​ភាព​​បើកទេ គឺនៅបន្តឲ្យរៀនពីចម្ងាយ និងកន្លែងណា មានលទ្ធភាពអាចបើក ឲ្យមានការរៀនបែបចម្រុះ រវាងការ​រៀន​ដោយផ្ទាល់ និងការរៀនពីចម្ងាយ សូមពិនិត្យលទ្ធភាពនេះ។ បើមិនដូច្នេះទេ យើងស្ថិតនៅក្នុងស្ថានភាព ដូច​បាត់​​បងឱកាស សម្រាប់កុមារ យុវវ័យ និងយុវជន របស់យើង។

សម្ដេចតេជោ ហ៊ុន សែន បានឲ្យដឹងទៀតថា «ភាពស៊ាំ បាននឹងកំពុងកើត នៅរាជធានីភ្នំពេញ និងខេត្តកណ្ដាល​…រាជធានីភ្នំពេញ ការឆ្លងមានចំនួនធ្លាក់ចុះ ហើយអ្នកដែលបានឆ្លង ក៏មិននាំទៅដល់ជំងឺធ្ងន់ធ្ងរនោះទេ អត្រាស្លាប់​ក៏​​មានការថយចុះ ដូច្នេះចំណុចនេះ គឺជាចំណុចវិជ្ជមានមួយ សម្រាប់ការបើកឡើងវិញ នូវសង្គមសេដ្ឋកិច្ច នៅទូ​ទាំង​ប្រទេស​ ហើយក្នុងនោះ ក៏មានវិស័យអប់រំ របស់យើងផងដែរ»។

ប្រមុខរាជរដ្ឋាភិបាល​ បានស្នើឲ្យលោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ដឹកនាំការពិភាក្សា​លើ​បញ្ហានេះ ឲ្យបានម៉ត់ចត់ ដើម្បីឈានទៅបើកសាលារៀនឡើងវិញ ដោយជាដំបូង ត្រូវបើកសាលារៀន នៅ​កន្លែ​ងដែលគ្មានជំងឺឆ្លង ជាពិសេសនៅទីជនបទ​ ដើម្បីចៀសវាងកុមារជនបទ របស់យើង ក្លាយជាជនរងគ្រោះ ពីជំងឺ​កូវីដ-១៩ ក្នុងពេលដែលទីជនបទ ពុំមានដូចនៅទីក្រុង និងទីប្រជុំជននោះឡើយ។

សម្ដេចតេជោ ហ៊ុន សែន បានលើកឡើងទៀតថា «យើងត្រូវអនុវត្ត ដោយភាពឈ្លាសវៃ និងបត់បែន ទន់ភ្លន់ និង​គ្រប់​គ្រងសភាពការណ៍ឲ្យបាន ដើម្បីយើងពន្លឿន ទៅដល់ការអភិវឌ្ឍន៍ ប្រទេសជាតិ ជាពិសេសជំរុញការ​បណ្ដុះ​បណ្ដាលធនធានមនុស្ស បើមិនដូច្នេះទេ កុមាររបស់យើង នឹងបោះបង់ចោល សាលារៀន ហើយក៏អាចឈានទៅ​ដល់ភ្លេចអក្សរ ក្នុងពេលដែលពួកគេ មិនបានរៀន រាប់ទាំងការរៀនពីចម្ងាយផងដែរ ដោយសារតែស្ថានភាពជនបទ ពុំមានអ៊ីនធើណេត និងពុំមានលទ្ធភាពគ្រប់គ្រាន់ ដើម្បីនឹងទទួលបាន នូវការរៀនតាមអនឡាញនោះទេ»៕

អត្ថបទ៖ ឃួន សុភ័ក្រ