ព័ត៌មានជាតិ

តំបន់សេដ្ឋកិច្ចពិសេសនៅខេត្តស្វាយរៀង កកើតដំបូងតាំងពីឆ្នាំ២០០៥

បានផុស

៥ years មុន

នៅ

ថ្ងៃអង្គារ ២៣ វិច្ឆិកា ២០២១

ដោយ

តំបន់សេដ្ឋកិច្ចពិសេស ១១ កន្លែងកំពុងដំណើរការ និងសាងសង់បន្តបន្ទាប់នៅខេត្តស្វាយរៀង។ នេះបើតាមការឲ្យដឹងរបស់លោក រស់ ផារិទ្ធ អភិបាលរងនិងជាអ្នកនាំពាក្យរបស់រដ្ឋបាលខេត្តស្វាយរៀងបានប្រាប់កម្ពុជាថ្មីនៅព្រឹកនេះ។

តំបន់សេដ្ឋកិច្ច ០៨ កន្លែងបានដំណើរការបង្កើតការងារដល់ពលរដ្ឋជាង ៧ ម៉ឺននាក់និង ០៣ កន្លែងទៀតកំពុងដំណើរការសាងសង់ ដែលនឹងបង្កើតការងារបន្ថែមរាប់ពាន់កន្លែងទៀត។

រោងចក្រតម្លើងរថយន្ត របស់ក្រុមហ៊ុន Daehan Auto Cambodia ស្ថិតក្នុងតំបន់សេដ្ឋកិច្ចពិសេស Intervia Automobile Industry Complex ក្នុងក្រុងបាវិត ខេត្តស្វាយរៀង

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករស់ ផារិទ្ធបានបញ្ជាក់ថា តំបន់សេដ្ឋកិច្ចពិសេស នៅខេត្តស្វាយរៀងកើតឡើងតាំងពីឆ្នាំ២០០៥។ រហូតមកដល់ពេលនេះមានរហូតដល់ ០៨ កន្លែង និង ០៣ កន្លែងទៀតកំពុងដំណើរការសាងសង់។

លោកបន្តថា ក្រោមដំបូលសន្តិភាព ដែលមានសម្តេចតេជោ ហ៊ុន សែនជាប្រមុខរដ្ឋាភិបាល ខេត្តស្វាយរៀងមានការអភិវឌ្ឍឥតឈប់ឈរ។

ខេត្តស្វាយរៀងមានសក្ដានុពលលើការទាក់ទាញការវិនិយោគ ដោយសារជាខេត្តមានផ្ទៃដីធំទូលាយមិនលិចទឹក អំណោយផលសម្រាប់ការសាងសង់រោងចក្រសហគ្រាសនានា។ ក្រៅពីមានភូមិសាស្រ្តអំណោយផល ខេត្តស្វាយរៀងមានហេដ្ឋារចនាសម្ព័ន្ធមានផ្លូវជាតិនិងច្រកទ្វារព្រំដែនអន្តរជាតិសំខាន់ពីរភ្ជាប់ជាមួយប្រទេសវៀតណាម។

លោករស់ ផារិទ្ធ បានបញ្ជាក់ថា ការយកមូលដ្ឋានក្រុងបាវិតជាតំបន់ឧស្សាហកម្ម ដោយសារមានទីតាំងជាច្រកចេញចូលសំខាន់ជាមួយប្រទេសវៀតណាម ដែលផ្ដល់ភាពងាយស្រួលសម្រាប់ការដឹកជញ្ជូនវត្ថុធាតុដើម និងផលិតផលផ្សេងៗទៅកាន់ទីផ្សារអន្តរជាតិ។

បើតាមមន្រ្តីអ្នកនាំពាក្យរូបនេះ ក្រៅពីតំបន់សេដ្ឋកិច្ចពិសេសដែលប្រមូលផ្តុំដោយរោងចក្រសហគ្រាសរាប់សិបកន្លែង ខេត្តស្វាយរៀងក៏មានសហគ្រាសតូចធំប្រហែល ១២៨ កន្លែង ដែលបានបង្កើតការងារជាប្រភពចំណូលសម្រាប់ការទ្រង់ទ្រង់ដល់ការរស់នៅរបស់ប្រជាពលរដ្ឋក្នុងខេត្ត។

រដ្ឋបាលខេត្តស្វាយរៀងបានកំណត់តំបន់អភិវឌ្ឍជា ៣ តំបន់ដែលមានតំបន់ឧស្សាហកម្មស្ថិតនៅក្រុងបាវិត ដែលបណ្តុំដោយរោងចក្រសហគ្រាសរាប់សិបកន្លែង។ ទីពីរតំបន់កសិឧស្សាហកម្មដែលមានដាំដុះដំណាំកសិកម្មផង និងកសិឧស្សាហកម្មផង និងតំបន់កសិកម្មដែលមានការដាំដុះដំណាំស្រូវ។

តំបន់ឧស្សាហកម្មក្រៅពីមាននៅក្រុងបាវិត បានពង្រីកដល់តាមស្រុកមួយចំនួនទៀតមាននៅស្រុកចន្រ្ទា និងនៅក្រុងស្វាយរៀង។ ខេត្តស្វាយរៀងមានសក្តានុពលដល់ការវិនិយោគសាងសង់រោងចក្រសហគ្រាសនានា គឹដោយសារជាខេត្តដែលមានហេដ្ឋារចនាសម្ព័ន្ធគាំទ្រដល់ការវិនិយោគ។ ក្រៅពីមានច្រកទ្វារព្រំដែនអន្តរជាតិដល់ទៅពីរមានបាវិត និងព្រៃវល្លិ៍ ក៏មានច្រកទ្វារព្រំដែនទ្វេភាគីនិងច្រកទ្វារតំបន់ព្រំដែនជាច្រើនទៀត រួមទាំងប្រព័ន្ធហេដ្ឋារចនាសម្ព័ន្ធតភ្ជាប់ បង្កលក្ខណៈងាយស្រួលសម្រាប់ការដឹកជញ្ជូននិងលំហូរការធ្វើដំណើររបស់ប្រជាពលរដ្ឋពីតំបន់មួយទៅតំបន់មួយបានងាយស្រួល៕

អត្ថបទ៖ ប៊ុណ្ណារ៉ា

Related Topics:តំបន់សេដ្ឋកិច្ចពិសេស