សម្តេចតេជោ ហ៊ុន សែន​ ទូល​ព្រះមហាក្សត្រថា​ នៅពេលសម្តេច​ដកខ្លួន នឹង​ប្រគល់ការងារ​ឲ្យ​លោក ហ៊ុន ម៉ាណែត

ថ្មីៗនេះសម្តេចតេជោ ហ៊ុន សែន ប្រមុខរាជរដ្ឋាភិបាលបាននាំលោក ហ៊ុន ម៉ាណែត ចូលគាល់ព្រះមហាក្សត្រ និងសម្តេចម៉ែ ហើយក្រោយពីការចូលគាល់នេះ ក៏មានអ្នកវិភាគមួយចំនួនលើកឡើងបែបនេះ បែបនោះ បើតាមសម្តេចតេជោ នេះជាដំណើរការធម្មតាចំពោះទំនាក់ទំនងរវាងព្រះមហាក្សត្រ ជាមួយនាយករដ្ឋមន្ត្រីប៉ុណ្ណោះ។

មានប្រសាសន៍នៅក្នុងពិធីអញ្ជើញបើកការដ្ឋានសាងសង់ ស្ពានអាកាសលើផ្លូវជាតិលេខ៥ ក្បែរទីលានប្រជាធិប តេយ្យ នាព្រឹកថ្ងៃទី៣១ ខែមករា ឆ្នាំ ២០២២នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជា​ណាចក្រកម្ពុជា បានលើកឡើងយ៉ាងដូច្នេះថា “ថ្ងៃមុនគ្រាន់តែខ្ញុំចូលទៅនាំម៉ាណែត ចូលទៅថ្វាយបង្គំគាល់សួរសុខទុក្ខព្រះកូណា និងហ្លួងម៉ែ គេយកទៅវិភាគបានទៀត គេយកទៅវិភាគបានទៀត។ គេថា ហ៊ុន ម៉ាណែត ទៅវាំងហ្នឹង ដូចជាវាអត់សមៗ ជាមេបញ្ជាការជើងគោកគ្មានភារកិច្ចអី ដែលត្រូវរាយការណ៍ថ្វាយព្រះមហាក្សត្រទេ ហើយប្រសិនបើនាំទៅឱ្យស្គាល់ជាបេក្ខជននាយករដ្ឋមន្ត្រីកាន់តែខុសទៅទៀត ដោយសារអី ដោយសារវៀតណាម និងម៉ីង អោងឡាំង នៅមីយ៉ាន់ម៉ាស្គាល់មុនបាត់”។

បើតាមសម្តេចតេជោ ហ៊ុន សែន លោកបណ្ឌិត ហ៊ុន ម៉ាណែត ក្នុងមួយរយៈកាលនៃការប្រឆាំងកូវីដ១៩នេះ ខិតខំយ៉ាងខ្លាំង ដើម្បីការពារព្រះបរមរាជវាំង រៀបចំយ៉ាងណាដើម្បីឱ្យព្រះបរមរាជវាំងមានសុវត្ថិភាព។ ដូច្នេះការដែលសម្តេចនាំលោក ហ៊ុន ម៉ាណែត ទៅព្រះបរមរាជវាំងនេះ ដើម្បីរាយការណ៏អំពីការងារដែលបានធ្វើកន្លងមក។

បើតាមសម្តេចតេជោ ការនាំលោក ហ៊ុន ម៉ាណែត ចូលគាល់ព្រះមហាក្សត្រនេះ ក៏ដើម្បីទូលព្រះអង្គពីការប្រគល់ការងារឲ្យកូនទៅថ្ងៃមុខដែរ។ សម្តេចបញ្ជាក់ថា “និយាយឲ្យត្រង់ទៅក៏ដើម្បីបញ្ជាក់ថ្វាយព្រះអង្គដែរថា ថ្ងៃក្រោយទូលព្រះបង្គំដកខ្លួនហើយ គឺឲ្យកូនបន្តទៅ”។

សម្តេចលើកឡើងថា នេះជាដំណើរការធម្មតាចំពោះទំនាក់ទំនងរវាងព្រះមហាក្សត្រ ជាមួយនាយករដ្ឋមន្ត្រី ព្រះមហា ក្សត្រមិនត្រឹមតែប្រទាននៅសវនាការ សម្រាប់នាយករដ្ឋមន្ត្រីនោះទេ ព្រះអង្គអាចប្រទានទាំងប្រជាពលរដ្ឋផងដែរ ដែលចង់គាល់ព្រះអង្គ។ 

សម្ដេចនាយករដ្ឋមន្ត្រីថា ការយកទៅវិភាគនោះ ហាក់ដូចជាជ្រុលពេក ប្រហែលជាពួកគេអត់ការងារធ្វើ ។ សម្ដេចក៏បានផ្ដាំផ្ញើឲ្យខិតខំរៀនសូត្រ ក្រែងលោបានចេះដឹង ថ្ងៃក្រោយអាចចូលមកធ្វើនយោបាយនៅស្រុកខ្មែរ “កុំដើរវិភាគឡប់ៗទៀត”។

លោក ហ៊ុន ម៉ាណែត កូនប្រុសច្បងរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជាត្រូវបានសន្និបាតគណៈកម្មាធិការកណ្តាលគណបក្សប្រជាជនកម្ពុជា បោះឆ្នោតជ្រើសតាំងជាបេក្ខជននាយករដ្ឋមន្ត្រីសម្រាប់អនាគត កាលពីថ្ងៃទី២៤ ខែធ្នូ ឆ្នាំ២០២១៕

អត្ថបទ៖ កោះកែវ