ពន្ធដារសហការជាមួយសមត្ថកិច្ចចុះត្រួតពិនិត្យយានយន្តមិនប្រកាសពន្ធតាមគោលដៅមួយចំនួន

ក្រុមការងារចម្រុះរាជធានី-ខេត្ត ដឹកនាំដោយមន្រ្តីពន្ធដារ រួមសហការជាមួយអាជ្ញាធរមានសមត្ថកិច្ចថ្នាក់ក្រោមជាតិ បានចុះត្រួតពិនិត្យការប្រកាសបង់ពន្ធលើមធ្យោបាយដឹកជញ្ជួន និងយានជំនិះគ្រប់ប្រភេទប្រចាំឆ្នាំ ២០២១ នៅតាមគោលដៅមួយចំនួន លើកំណាត់ផ្លូវសំខាន់ៗនៃរាជធានី-ខេត្ត ចាប់ពីថ្ងៃទី ០១ ខែកុម្ភៈ ឆ្នាំ ២០២២តទៅ។ នេះបើតាមសេចក្តីជូនដំណឹងរបស់ក្រសួងសេដ្ឋកិច្ច កាលពីថ្ងៃទី ២៨ ខែមករា ឆ្នាំ ២០២២។

សេចក្តីជូនដំណឹងដដែល បានឲ្យដឹងថា ក្នុងករណីម្ចាស់យានយន្តខកខាន មិនបានប្រកាសបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំឆ្នាំ ២០២១កន្លងទៅ ប្រញាប់រួសរាន់ទៅប្រកាសពន្ធ និងបង់ការផាកពិន័យតាមច្បាប់ជាធរមាន នៅអគ្គនាយកដ្ឋានពន្ធដារ ឬនៅតាមសាខាពន្ធដារខេត្ត ខណ្ឌ ឬនៅធរនាគារដែលជាដៃគូសហការជាមួយក្រសួង។

អគ្គនាយកដ្ឋានពន្ធដារ រំពឹងថា ម្ចាស់យានយន្តទាំងអស់ នឹងយកចិត្តទុកដាក់គោរពកាតព្វកិច្ចសារពើពន្ធ និងរួសរាន់ទៅប្រកាសពន្ធឲ្យបានគ្រប់ៗគ្នា ទាន់ពេលវេលាស្របតាមបទប្បញ្ញត្តិនៃច្បាប់ ដើម្បីចៀសវាងក្រុមការងារចម្រុះ សហការជាមួយអាជ្ញាធរមានសមត្ថកិច្ចថ្នាក់ក្រោមជាតិ ធ្វើការឃាត់យានយន្តតាមដងផ្លូវតម្រូវឲ្យបង់ប្រាក់ពន្ធ ដែលនាំឲ្យខាតពេលវេលា និងកកស្ទះចរាចរណ៍ពេលធ្វើដំណើរ ដែលអាចកើតមាននូវបាតុភូមតភាពអសកម្មដោយប្រការណាមួយ ជាយថាហេតុ៕