ថ្ងៃ​​​​នេះ​ លោក​ ម៉ាក្រុង​​ ​ទៅ​​ទស្សន​កិច្ច​នៅ​រុស្ស៊ី​​ ក្រោយពិភាក្សា​​ជា​មួយ​​លោក​ បៃដិន

ប្រធានាធិបតីបារាំង លោក អេម៉ានុយអែល ម៉ាក្រុង កាលពីថ្ងៃអាទិត្យម្សិលមិញបានហៅទូរសព្ទដើម្បីពិភាក្សាជាមួយប្រធានាធិបតីសហរដ្ឋអាមេរិក លោក ចូ បៃដិន នៅក្នុងសន្ទនា«សម្របសម្រួលសមហេតុផល» មុនពេលធ្វើដំណើរទស្សនកិច្ចទៅទីក្រុងមូស្គូ ថ្ងៃចន្ទនេះ។

ការិយាល័យប្រធានាធិបតីបារាំងបាននិយាយថា ៖«ការហៅទូរសព្ទពិភាក្សាគ្នារយៈពេល៤០នាទីបានផ្តល់ឲ្យមេដឹកនាំទាំងពីរចែករំលែកព័ត៌មានគ្នាអំពីការភ្ជាប់ទំនាក់ទំនងដែលត្រូវបានធ្វើឡើងកំឡុងចុងសប្តាហ៍ សម្រាប់ជាការសម្របសម្រួលដ៏ល្អមុនពេលដំណើរទស្សនកិច្ច»។

នៅថ្ងៃចន្ទនេះ លោក ម៉ាក្រុង នឹងធ្វើដំណើរទស្សនកិច្ចទៅប្រទេសរុស្ស៊ី ដែលបានដាក់ពង្រាយកម្លាំងទ័ពរាប់ម៉ឺននាក់នៅព្រំដែនជាមួយអ៊ុយក្រែន ដែលបង្កឲ្យប្រទេសលោកខាងលិចព្រួយបារម្ភផ្ទុះសង្គ្រាម។

ចំណែក សេតវិមានបាននិយាយថា មេដឹកនាំទាំងពីរបានពិភាក្សាគ្នាអំពីកិច្ចខិតខំប្រឹងប្រែងការទូត និងការរារាំងដែលកំពុងបន្តក្នុងការឆ្លើយតបទៅនឹងការបង្កើនកម្លាំងយោធារបស់រុស្ស៊ីនៅព្រំដែនជាមួយអ៊ុយក្រែន។

លោក ម៉ាក្រុង និង លោក បៃដិន បានបញ្ជាក់ជាថ្មីអំពីការគាំទ្ររបស់ពួកគាត់ចំពោះអធិបតេយ្យភាព និងបូរណភាពទឹកដីរបស់អ៊ុយក្រែន ព្រមទាំងបានយល់ព្រមថា ក្រុមរបស់ពួកគាត់នឹងបន្តទំនាក់ទំនង និងបន្តប្រឹក្សាជាមួយសម្ព័ន្ធមិត្ត និងដៃគូ ក្នុងនោះរាប់ទាំងអ៊ុយក្រែនផង។

រុស្ស៊ីបានបដិសេធចំពោះផែនការធ្វើសកម្មភាពផ្ទុះអាវុធណាមួយលើប្រទេសអ៊ុយក្រែន ប៉ុន្តែកម្លាំងទ័ពរាប់ម៉ឺននាក់ដាក់ពង្រាយនៅព្រំដែនប្រទេសជិតខាងជំរុញឲ្យសហរដ្ឋអាមេរិកបញ្ជាបញ្ជូនកម្លាំងទ័ពប្រហែល៣០០០នាក់បន្ថែមទៀតទៅកាន់ប្រទេសប៉ូឡូញ និងរ៉ូម៉ានីដើម្បីពង្រឹងកម្លាំងទ័ពសម្ព័ន្ធមិត្តណាតូ៕

ប្រែសម្រួល៖ វីរបុត្រ
ប្រភព៖ Reuters