ខេត្តបាត់ដំបង ចាប់ផ្ដើមបើកពិធីទទួលសង្ក្រាន្តឆ្នាំថ្មី

នៅតាមសាលារៀនមួយចំនួនក្នុងក្រុងបាត់ដំបង មានការប្រារព្ធពិធីទទួលអបអរសង្ក្រាន្តឆ្នាំថ្មីជាបណ្តើរៗហើយ ដោយមានទាំងការរៀបចំនូវល្បែងប្រជាប្រីយ៍ដើម្បីកំសាន្តផងដែរ។

នៅព្រឹកថ្ងៃទី៤ ខែមេសា ឆ្នាំ២០២២ នេះ លោក ផេង សិទ្ធី អភិបាលក្រុងបាត់ដំបង បានអញ្ជើញជាអធិបតីនៅក្នុងការបើកពិធីស្វាគមន៍សង្ក្រាន្តឆ្នាំថ្មី ដើម្បីចូលរួមទទួលទេវត្តាឆ្នាំថ្មី ដែលនឹងយាងចុះមកនាពេលដ៏ខ្លីខាងមុខនេះ។

ពិធីនេះបានប្រារព្ធធ្វើឡើងនៅក្នុងបរិវេណវិទ្យាល័យ សម្តេចឪ ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ដោយមានការចូលរួមពីសំណាក់ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋយ៉ាងច្រើនកុះករ។

នៅក្នុងឱកាសនោះដែរ លោកអភិបាលក្រុង ផេង សិទ្ធី បានធ្វើការសំណេះសំណាលជាមួយប្អូនៗសិស្សានុសិស្ស ដោយបានលើកឡើងថា នេះជាឱកាសដ៏វិសេសវិសាលបំផុតដែលប្រមុខនៃរាជរដ្ឋាភិបាល បានអនុញ្ញាតអោយមានការបើក​សង្ក្រាន្តឆ្នាំថ្មីឡើងវិញ បន្ទាប់ពីមានការផ្អាករយ:ពេល២ឆ្នាំ ដោយសារការរុករាននៃជំងឺកូវីដ-១៩។

លោកអភិបាលក្រុងក៏បានសង្កត់ធ្ងន់ថា បើទោះបីជាមានការបើកសង្ក្រាន្តឆ្នាំថ្មីឡើងវិញក៏ដោយ ក៏យើងទាំងអស់គ្នាត្រូវបង្កើននូវការប្រុងប្រយ័ត្នអោយបានខ្ពស់បំផុត គឺត្រូវពាក់ម៉ាស់ និងប្រើប្រាស់អាល់កុល ឬជែល អោយបានជាប់ជាប្រចាំ ដើម្បីទប់ស្កាត់អោយបាននូវការរីករាលដាលនៃជំងឺដ៏កាចសាហាវនេះ។

ជាចុងក្រោយ គណអធិបតីទាំងអស់ ក៏បានអញ្ជើញបាញ់ទឹកប្រោះព្រំ លាបម្សៅ រាំងវង់ និងលេងល្បែងប្រជាប្រីយ៍កំសាន្តផងដែរ ដើម្បីជានិមិត្តរូបទទួលស្វាគមន៍សង្ក្រាន្តឆ្នាំថ្មី ដែលនឹងឈានចូលមកដល់នាប៉ុន្មានថ្ងៃខាងមុខនេះ ៕

អត្ថបទ៖ សោ និយមរ័ត្ន