កីឡា

មកស្គាល់ កីឡាករវ័យក្មេងជាងគេ និងចាស់ជាងគេក្នុងក្រុមជម្រើសជាតិកម្ពុជា

បានផុស

៣ years មុន

នៅ

ថ្ងៃអង្គារ ៣១ ឧសភា ២០២២

ដោយ

ក្រុមបាល់ទាត់ជម្រើសជាតិកម្ពុជា បច្ចុប្បន្នបាននឹងកំពុងហ្វឹកហាត់យ៉ាងសកម្ម ដើម្បីត្រៀមការប្រកួតមិត្តភាពអន្ដរជាតិ ជាមួយក្រុមជម្រើសជាតិទីម័រខាងកើត នាល្ងាចថ្ងៃទី០២ ខែមិថុនា សប្ដាហ៍នេះនៅពហុកីឡដ្ឋានជាតិមរតកតេជោ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងក្រុមជម្រើសជាតិឈុតធំ ដែលមានកីឡាករចម្រុះបឋមចំនួន ២៨នាក់ត្រូវបានកោះហៅដើម្បីត្រៀមប្រកួតមិត្តភាពខាងលើ ខណៈក្នុងចំណោមកីឡាករទាំង ២៨រូប សុំណែនាំឱ្យស្គាល់កីឡាករដែលមានវ័យក្មេងជាងគេ និងចាស់ជាងគេ។

កីឡាករក្មេងជាងគេនៅក្នុងក្រុមគឺកីឡាករ ស៊ិន សុវណ្ណមករា បច្ចុប្បន្នរូបគេមានវ័យទើបតែ ១៧ឆ្នាំប៉ុណ្ណោះ ពោលគឺកើតនៅថ្ងៃទី០៦ ខែធ្នូ ឆ្នាំ២០០៤។ កីឡាកររូបនេះលេងក្នុងតួនាទីជាខ្សែបម្រើ មកពីក្លិបព្រៃវែង នៃលីគលំដាប់ទី២ កម្ពុជា។ រូបគេបានជាប់ជម្រើសជាតិឈុតធំកាលពីឆ្នាំ២០២១ ហើយបង្ហាញខ្លួនបាន ១ប្រកួតផងដែរ។

ដោយឡែកកីឡាករដែលមានវ័យចំណាស់ជាងគេក្នុងក្រុមគឺកីឡាករ កុក បូរីស ដោយបច្ចុប្បន្នរូបគេមានវ័យ ៣១ឆ្នាំ ពោលគឺកើតនៅថ្ងៃទី២០ ខែឧសភា ឆ្នាំ១៩៩១។ កីឡាករកូនកាត់ខ្មែរបារាំង រូបនេះលេងក្នុងតួនាទីជាខ្សែការពារ ឬជាខ្សែបម្រើការពារក៏បាន និងជាកីឡាកររបស់ក្លិប Sarawak United នៃលីគកំពូលម៉ាឡេស៊ី ខ្ចីជើងពីក្លិបភ្នំពេញក្រោន។ បូរីស ជាប់ជម្រើសជាតិកម្ពុជា កាលពីឆ្នាំ២០១៥ និងបង្ហាញខ្លួន ២ប្រកួតផងដែរ។

ចំពោះអាយុកីឡាករដទៃទៀតមានដូចជា៖ កែវ សុខសិលា (២៤ឆ្នាំ), វីរៈ ដារ៉ា (១៨ឆ្នាំ), ហ៊ុល គឹមហ៊ុយ (២២ឆ្នាំ), កែន ច័ន្ទសុភ័ក្ត្រ (២៣ឆ្នាំ), សឿយ វិសាល (២៦ឆ្នាំ), ទេស សម្បត្តិ (២១ឆ្នាំ), ឆេង ម៉េង (២៤ឆ្នាំ), សឿត ណាវ៉ា (២១ឆ្នាំ), ជា សុខម៉េង (១៩ឆ្នាំ), តាំង ប៊ុនឆៃ (១៩ឆ្នាំ), អ៊ន ចាន់ប៉ូលីន (២៤ឆ្នាំ), សុះ សូហាណា (៣០ឆ្នាំ), មិន រតនៈ (១៩ឆ្នាំ), ជួន ចាន់ចាវ (២៣ឆ្នាំ), អ៊ាន ពិសី (២០ឆ្នាំ), អ៊ិន សូដាវីដ (២៣ឆ្នាំ), ឡុង ភារ៉ាត (២៤ឆ្នាំ), ជូ ស៊ិនទី (១៩ឆ្នាំ), ធារី ចន្ថាប៊ីន (៣០ឆ្នាំ), ប្រាក់ ធីវ៉ា (២៣ឆ្នាំ), ប្រាក់ មុន្នីឧត្តម (២៨ឆ្នាំ), សៀង ចន្ធា (១៩ឆ្នាំ), កែវ សុខផេង (៣០ឆ្នាំ), សារ ទី (២០ឆ្នាំ), ម៉ាត់ នូរុណ (២៣ឆ្នាំ) និង គី រីណា (២០ឆ្នាំ)៕

អត្ថបទ ៖ មន្នីរ័ត្ន