ប៉ូឡូញ រាយបន្លាលួស នៅព្រំដែនជាប់រុស្ស៊ី ក្រោយមីស៊ីលធ្លាក់ 

កាលពីថ្ងៃព្រហស្បតិ៍ទី១៧ខែវិច្ឆិកា ប្រទេសប៉ូឡូញ បានរាយបន្លាលួស នៅតាមព្រំដែនរបស់ខ្លួនជាប់រុស្ស៊ី បន្ទាប់ពីឧប្បត្តិហេតុធ្លាក់មីស៊ីលសម្លាប់មនុស្សកាលពីថ្ងៃអង្គារទី១៥ខែវិច្ឆិកា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមទាហាន ​ត្រូវ​បាន​គេ​មើល​ឃើញ កំពុងរាយបន្លាលួស​នៅ​ជិត​ភូមិ Szyliny ក្បែរ​តំបន់ Kaliningrad របស់​រុស្ស៊ី។

ចំពេលមានភាពតានតឹងកាន់តែខ្លាំងឡើងរវាងភាគីទាំងពីរ បន្លាលួសការពារកម្ពស់៨ហ្វីតនិងទទឹង១០ហ្វីតត្រូវបានរាយ ដើម្បីការពារការឆ្លងដែនខុសច្បាប់ចូលទៅក្នុងប្រទេសប៉ូឡូញ។

មានការភ័យខ្លាចថា រុស្ស៊ីអាចមានចេតនាបញ្ជូនជនចំណាកស្រុកឲ្យសម្រុកចូលទៅក្នុងទឹកដីប៉ូឡូញ ដើម្បីបង្កភាពវឹកវរនៅក្នុងសហភាពអឺរ៉ុប។

ស្របពេលជាមួយគ្នានោះ រដ្ឋជាសមាជិកអង្គការណាតូ ក៏កំពុងពិភាក្សាគ្នាផងដែរ អំពីការពង្រឹងសមត្ថភាពការពារដែនអាកាសរបស់ពួកគេនៅភាគខាងកើត ដោយប្រទេសស្លូវ៉ាគី បានទាមទារប្រព័ន្ធបន្ថែមពីដៃគូសម្ព័ន្ធមិត្ត ដើម្បីការពារសន្តិសុខពលរដ្ឋរបស់ខ្លួនកាន់តែខ្លាំង។

ចំណែកប្រទេសលីទុយអានីឯណោះវិញ ក៏បានអំពាវនាវសុំឲ្យមានការការពារបន្ថែមទៀតផងដែរ នៅតាមព្រំដែនប៉ូឡូញ-អ៊ុយក្រែន និងនៅតំបន់ខាងកើតរបស់អង្គការណាតូ ដោយលោកប្រធានាធិបតី Gitanas Nauseda និយាយថា “ផ្ទៃមេឃរបស់អង្គការណាតូ ត្រូវតែការពារឲ្យបាន១០០ភាគរយ”៕

ប្រែសម្រួល៖ Vann Vann

ប្រភព៖ Daily Mail 

ចុចអាន៖ លោក Biden ប្រកែកចំពោះការលើកឡើងរបស់លោក Zelensky ទាក់ទិនមីស៊ីលធ្លាក់នៅ ប៉ូឡូញ