ថៃ នឹងហាមឃាត់ការនាំចូលកាកសំណល់ប្លាស្ទិកគ្រប់ប្រភេទ នៅឆ្នាំ២០២៥

​ថៃ នឹងធ្វើ​ការដើម្បី​កាត់​បន្ថយ​កាក​សំណល់​ប្លា​ស្ទិ​ក​របស់​ខ្លួន ហើយ​ប្រទេស​នេះ ​គ្រោង​ហាម​ឃាត់​ការ​នាំ​ចូល​កាកសំណល់​ប្លា​ស្ទិ​កគ្រប់ប្រភេទ​​នៅ​ឆ្នាំ​២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃពុធទី២២ខែកុម្ភៈ គណៈរដ្ឋមន្ត្រីថៃ បានធ្វើការសម្រេចចិត្តហាមឃាត់លើការនាំចូលកាកសំណល់ប្លាស្ទិកទាំងអស់ចាប់ពីថ្ងៃទី ១ ខែមករា ឆ្នាំ២០២៥ទៅ។

ទន្ទឹមនឹងនោះ នៅឆ្នាំនេះ សម្រាប់រោងចក្រកែច្នៃចំនួន១៤ នៅក្នុងតំបន់មិនបង់ពន្ធ បរិមាណកាកសំណល់ដែលនាំចូល មិនត្រូវលើសពីសមត្ថភាពផលិតរួមរបស់ពួកគេគឺ ៣៧២ ៩៩៤ តោននោះទេ។ ហើយនៅឆ្នាំ២០២៤ បរិមាណសំណល់ប្លាស្ទិកដែលត្រូវបានអនុញ្ញាតឲ្យនាំចូលសម្រាប់រោងចក្រទាំងនេះ នឹងត្រូវកាត់បន្ថយមកត្រឹមពាក់កណ្តាលនៃសមត្ថភាពផលិតរួមរបស់ពួកគេ។

ស្របពេលជាមួយគ្នានោះដែរ អ្នកនាំចូលដែលមានបំណងយកកាកសំណល់ប្លាស្ទិកទៅក្រៅតំបន់គ្មានការបង់ពន្ធ នឹងត្រូវបង្ហាញព័ស្តុតាងដែលថា ការនាំចូលគឺចាំបាច់ដោយសារតែកង្វះការផ្គត់ផ្គង់ដើម្បីបំពេញតម្រូវការផលិតកម្មរបស់ពួកគេ។

អ្នកនាំពាក្យរដ្ឋាភិបាលលោកស្រី Tipanan Sirichana និយាយថា បទប្បញ្ញត្តិដ៏តឹងរ៉ឹង និងការហាមឃាត់ជាលើការនាំចូលកាកសំណល់ប្លាស្ទិក គឺមានគោលបំណងការពារបរិស្ថាន និងគ្រប់គ្រងការបំពុល ដើម្បីការពារសុខភាពរបស់ប្រជាពលរដ្ឋ។

គួរបញ្ជាក់ថា ​ថៃ​ស្ថិត​ក្នុង​ចំណោម​ប្រទេស​កំពូលៗ ​ដែល​តស៊ូ​ជាមួយបញ្ហា​សំណល់​ប្លាស្ទិក​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ។

ក្នុងឆ្នាំ២០២១ វិទ្យាស្ថានស្រាវជ្រាវអភិវឌ្ឍប្រទេសថៃ (TDRI) បានបញ្ជាក់ថា ប្រទេសថៃមានកាកសំណល់ជាមធ្យម ១.០៣តោនក្នុងមួយឆ្នាំៗ ហើយស្ទើរតែពាក់កណ្តាលនៃកាកសំណល់ទាំងនោះបានហូរចូលទៅក្នុងសមុទ្រ៕

ប្រែសម្រួល៖ Vann Vann

ប្រភព៖ Thaiger

ចុចអាន៖ ថៃ ប្រាប់ ឲ្យយុវជន ខំញ៉ាំបាយ