ចិន រិះគន់សេចក្ដីថ្លែងការណ៍រួមរបស់ G7 ថា លាបពណ៌ និងជ្រៀតជ្រែក​កិច្ចការផ្ទៃក្នុងក្រុងប៉េកាំង

ប្រទេសចិនកាលពីថ្ងៃអង្គារបានចេញមកនិយាយប្រឆាំងនឹងការរិះគន់លើគោលនយោបាយរបស់ខ្លួន នៅក្នុងសេចក្តីថ្លែងការណ៍រួមដែលចេញដោយរដ្ឋមន្ត្រីការបរទេសនៃក្រុមប្រទេស G7 បន្ទាប់ពីកិច្ចប្រជុំកំពូលនៅប្រទេសជប៉ុន ។

នៅក្នុងសន្និសីទសារព័ត៌មានមួយដែលធ្វើឡើងនៅទីក្រុងប៉េកាំង, អ្នកនាំពាក្យក្រសួងការបរទេសចិន លោក Wang Wenbin បានហៅសេចក្ដីថ្លែងការណ៍រួមរបស់រដ្ឋមន្ត្រីការបរទេស G7 ថា “លាបពណ៌ចិន” និង “ជ្រៀតជ្រែកក្នុងកិច្ចការផ្ទៃក្នុងរបស់ខ្លួន” ។

អ្នកនាំពាក្យរូបនេះបាននិយាយថា “សេចក្តីថ្លែងការណ៍នេះ ឆ្លុះបញ្ចាំងពីភាពក្រអឺតក្រទម ការរើសអើង និងឆន្ទៈមនសិការរបស់ G7 ក្នុងការទប់ស្កាត់ និងរារាំងប្រទេសចិន” ។​

ទន្ទឹមនោះ បន្ទាប់ពីបានវាយតម្លៃលើ សេចក្តីថ្លែងការណ៍រួមរបស់រដ្ឋមន្ត្រីការបរទេស G7 ទាក់ទងនឹងបញ្ហានៅតៃវ៉ាន់ សមុទ្រចិនខាងកើត និងខាងត្បូង ក៏ដូចជានៅហុងកុង តំបន់ស៊ីនជាំង និងទីបេ, លោក Wang ​ក៏​បាន​និយាយ​ផង​ដែរ​ថា តៃវ៉ាន់​គឺ​ជា​ទឹកដី​ដ៏​ពិសិដ្ឋ​របស់​ចិន ហើយ​គោលការណ៍ “ចិន​តែមួយ” គឺជា​មូលដ្ឋាន​នៃ​សន្តិភាព និង​ស្ថិរភាព​នៅ​ច្រក​សមុទ្រ​តៃវ៉ាន់ ។

លោកបាននិយាយថា “សកម្មភាពដែលសំដៅលើឯករាជ្យភាពរបស់តៃវ៉ាន់ត្រូវតែប្រឆាំង ដើម្បីសម្រេចបានសន្តិភាពពិតប្រាកដនៅក្នុងច្រកសមុទ្រតៃវ៉ាន់” ។

ដោយឡែកចំពោះបញ្ហាទាក់ទងនឹងហុងកុង តំបន់ស៊ីនជាំង និងទីបេ គឺជា “កិច្ចការផ្ទៃក្នុងរបស់ចិនទាំងស្រុង” ហើយលោក Wang បាននិយាយថា “គ្មានមហាអំណាចបរទេសណាមួយមានសិទ្ធិជ្រៀតជ្រែក ក្រោមលេស ឬតាមមធ្យោបាយណាមួយឡើយ” ។

ចំណែករឿងរ៉ាវពាក់ព័ន្ធនឹងស្ថានភាពនៅសមុទ្រចិនខាងកើត និងសមុទ្រចិនខាងត្បូង, លោកបាននិយាយថា “ប្រទេសពាក់ព័ន្ធគួរតែគោរពកិច្ចខិតខំប្រឹងប្រែងរបស់ប្រទេសក្នុងតំបន់ ដើម្បីរក្សាសន្តិភាព និងស្ថិរភាព ហើយបញ្ឈប់ការសាបព្រួសគ្រាប់ពូជនៃភាពចលាចល និងបង្កើតអន្តរកម្មនៃការប្រឈមមុខដាក់គ្នាជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ប្រមុខណាតូ អំពាវនាវឲ្យ ចិន ចូលរួមក្នុងការបង្កើតក្របខ័ណ្ឌគ្រប់គ្រងអាវុធ