ព័ត៌មានជាតិ

ជួសជុលជណ្តើរឡើងភ្នំត្បែង កម្ពស់ជាង ២០០ ម៉ែត្រ នាំអ្នកទស្សនា ចម្ការចេកដាច់កន្ទុយភ្នែក

បានផុស

៥ years មុន

នៅ

ថ្ងៃព្រហស្បតិ៍ ២១ មករា ២០២១

ដោយ

deth leng

ទិដ្ឋភាពការឡើងភ្នំត្បែងមានជ័យខេត្តព្រះវិហារ។ រូបភាពហ្វេសប៊ុក

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាំជណ្តើរឡើងភ្នំត្បែងមានជ័យជាង ២០០ ម៉ែត្រស្ថិតក្នុងភូមិសាស្ត្រខេត្តព្រះវិហារ ដែលរងការខូចខាត នឹងត្រូវចាប់ផ្តើមជួសជុលឡើងវិញចាប់ពីថ្ងៃទី ២៣ ខែមករា ផ្តល់ភាពងាយស្រួលដល់ការធ្វើដំណើរឡើងទៅកម្សាន្ត។

លោកសំ លាងទ្រី ប្រធានមន្ទីរសាធារណការ និងដឹកជញ្ជូន ខេត្តព្រះវិហារ បានប្រាប់កម្ពុជាថ្មីនៅព្រឹកនេះថា ពិធីក្រុងពាលីជួសជុលកាំជណ្តើរភ្នំត្បែង នឹងត្រូវរៀបចំឡើងនៅថ្ងៃសៅរ៍ ទី ២៣ ខែមករានេះ ដែលមានប្រវែងជាង ២០០ ម៉ែត្រ។

លោកប្រធានមន្ទីរបន្តថា ជណ្តើរចាស់មានសភាពចាស់ទ្រុឌទ្រោម និងបែកបាក់ដោយកន្លែង។ ការចំណាយទៅលើការជួសជុលឡើងវិញនេះ គឺជាការចូលរួមថវិការបស់សប្បុរសជន ដែលបានមកពីការរ៉ៃអង្គាសក្នុងកម្មវិធីបុណ្យនានា ហើយថាមិនទាន់កំណត់ពេលណាថានឹងជួសជុលរួច អាស្រ័យលើថវិកា។

ភ្នំត្បែងមានជ័យស្ថិតនៅក្នុងភូមិក្រាំងដូង ឃុំព្រះឃ្លាំង ស្រុកត្បែងមានជ័យ ខេត្តព្រះវិហារ ដែលមានកាំជណ្តើរ ១៣៤៥ កាំ។ ភ្នំត្បែងគឺជាតំបន់ធម្មជាតិដ៏ស្រស់ស្អាតដែលមានទឹកធ្លាក់ ព្រៃធម្មជាតិធំល្វឹងល្វើយ និងសត្វព្រៃ រួមទាំងជាតំបន់ប្រវត្តិសាស្ត្រដែលព្រះរាជាខ្មែរកាលពីសម័យបូរាណបានធ្វើពិធីផ្សេងៗ។

មុននឹងទៅដល់ទីតាំងទាំងនេះ អ្នកធ្វើដំណើរត្រូវឆ្លងកាត់ផ្លូវជម្រាលភ្នំ អមសងខាងដោយចំការចេកដាច់កន្ទុយភ្នែក។

រាជរដ្ឋាភិបាលកម្ពុជា បានដាក់បញ្ចូលតំបន់ភ្នំត្បែងចូលជាសម្បត្តិបេតិកភណ្ឌធម្មជាតិកាលពីថ្ងៃទី១៣ ខែកញ្ញា ឆ្នាំ២០១៦។ តំបន់បេតិកភណ្ឌភ្នំត្បែងគ្រប់ដណ្តប់ចំនួន៥ស្រុក គឺស្រុក គូលេន សង្គមថ្មី ត្បែងមានជ័យ ក្រុងព្រះវិហារ និងរវៀង៕