UN ព្រមានថា ប្រាំឆ្នាំបន្ទាប់ នឹងជារយៈពេលក្តៅខ្លាំងបំផុត ក្នុងប្រវត្តិសាស្រ្តមនុស្សជាតិ

អង្គការសហប្រជាជាតិ (UN) បានព្រមានកាលពីថ្ងៃពុធទី១៧ខែឧសភាថា ប្រាកដណាស់ ឆ្នាំ២០២៣ដល់ឆ្នាំ២០២៧ នឹងក្លាយជារយៈពេលប្រាំឆ្នាំក្តៅបំផុត មិនធ្លាប់មានក្នុងប្រវត្តិសាស្រ្តមនុស្សជាតិ ហើយកត្តាដែលធ្វើឲ្យសីតុណ្ហភាពកើនឡើងខ្លាំងនេះ គឺបណ្តាលមកពីឧស្ម័នផ្ទះកញ្ចក់ និងបាតុភូត El Nino។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បាតុភូត El Nino ជា​កម្ដៅ​នៅ​ប៉ែក​ខាង​កើត​មហាសមុទ្រ​ប៉ាស៊ីហ្វិក ជាពិសេស​តាម​បណ្ដោយ​ខ្សែ​បន្ទាត់​អេក្វាទ័រ​នៃ​ផែនដី​។ កម្ដៅ​នៃ​ទឹក​សមុទ្រ​ បាន​បក់​បោក​មក​កាន់​ប៉ែក​ខាង​លិច​មហាសមុទ្រ​ប៉ាស៊ីហ្វិក តាម​រយៈ​ខ្យល់ ហើយបាតុភូតអាកាសធាតុនេះ ជាធម្មតាកើតឡើងរៀងរាល់២ទៅ៧ឆ្នាំម្តង។

ជាធម្មតា El Nino បានបង្កើនសីតុណ្ហភាពសកលក្នុងឆ្នាំ បន្ទាប់ពីវាវិវឌ្ឍ ដែលនៅក្នុងវដ្តនេះនឹងមកដល់ក្នុងឆ្នាំ២០២៤។

អង្គការឧតុនិយមពិភពលោក (WMO) របស់​ UN បាននិយាយថា សីតុណ្ហភាពសកល នឹងកើនឡើង លើសគោលដៅមហិច្ឆតាដែលបានកំណត់ក្នុងកិច្ចព្រមព្រៀងអាកាសធាតុទីក្រុងប៉ារីស។

កិច្ចព្រមព្រៀងទីក្រុងប៉ារីសឆ្នាំ២០១៥ បានកំណត់ឲ្យប្រទេសនានា ត្រូវយល់ព្រមកាត់បន្ថយការឡើងកម្តៅផែនដីជាមធ្យម ទាបជាង២អង្សាសេ ឬក្រោម១.៥អង្សាសេ ប្រសិនបើអាចទៅរួច

ទោះបីជាយ៉ាងណាក៏ដោយ រយៈពេលប្រាំបីឆ្នាំដែលក្តៅបំផុតមិនធ្លាប់មាន គឺត្រូវបានកត់ត្រានៅចន្លោះឆ្នាំ២០១៥ដល់ឆ្នាំ២០២២ ប៉ុន្តែសីតុណ្ហភាពត្រូវបានគេព្យាករថានឹង ហក់ឡើងបន្ថែមទៀត ពេលដែលអាកាសធាតុ បម្រែបម្រួលកាន់តែខ្លាំង។

យោងតាម WMO, មានលទ្ធភាព៩៨ភាគរយ ដែលយ៉ាងហោចណាស់មួយក្នុងចំណោម៥ឆ្នាំខាងមុខ ហើយរយៈពេល៥ឆ្នាំទាំងមូល នឹងមានភាពក្តៅបំផុតក្នុងប្រវត្តិសាស្រ្ត៕

ប្រែសម្រួល៖ Vann Vann

ប្រភព៖ Straits Times

ចុចអាន៖​ វៀតណាម នឹងជួបប្រទះរលកកម្តៅសាជាថ្មី ចាប់ពីថ្ងៃនេះទៅ