វៀតណាម នឹងជួបប្រទះរលកកម្តៅសាជាថ្មី ចាប់ពីថ្ងៃនេះទៅ

ទីក្រុងហាណូយ និងដាណាង នឹងជួបអាកាសធាតុក្តៅសាជាថ្មីម្តងទៀត ចាប់ផ្តើមពីថ្ងៃអង្គារទី១៦ខែឧសភាទៅ បន្ទាប់ពីអាកាសធាតុចុះត្រជាក់កាលពីសប្តាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មជ្ឈមណ្ឌលជាតិជលសាស្ត្រនិងការព្យាករឧតុនិយម បាននិយាយថា តំបន់សម្ពាធទាបក្តៅនឹងវិវត្តម្តងទៀតនៅភាគខាងលិចចាប់ពីថ្ងៃចន្ទ ហើយនឹងបង្កើនសីតុណ្ហភាព នៅក្នុងតំបន់ទាំងពីរ។

មជ្ឈមណ្ឌលនេះព្យាករថា សីតុណ្ហភាពអតិបរមានៅពេលថ្ងៃ នឹងឡើងលើស៣៥អង្សាសេចាប់ពីថ្ងៃពុធទៅ។

ស្របពេលជាមួយគ្នានោះ គេហទំព័រអាមេរិក AccuWeather បាននិយាយថា នៅថ្ងៃអង្គារ សីតុណ្ហភាពខ្ពស់បំផុតក្នុងទីក្រុងហាណូយ នឹងឈានដល់ ៣៧ អង្សាសេនៅពេលថ្ងៃ និង ២៥ អង្សាសេនៅពេលយប់ ហើយនៅថ្ងៃពុធ​ សីតុណ្ហភាពខ្ពស់បំផុតនឹងឈានដល់ ៣៨អង្សាសេនៅពេលថ្ងៃ និង ២៧អង្សាសេនៅពេលយប់។

ចំណែកនៅ Sa Pa នឹងមានសីតុណ្ហភាពចន្លោះពី ១៧ដល់២៣អង្សាសេនៅថ្ងៃអង្គារ និង ១៧ដល់២៥អង្សាសេនៅថ្ងៃពុធ។

រីឯតំបន់កណ្តាល សីតុណ្ហភាពពេលថ្ងៃគឺចាប់ពី៣៦ដល់៣៩អង្សាសេ ហើយនៅកន្លែងខ្លះ អាចលើស៤០អង្សាសេទៀត។

ប៉ុន្តែអ្នកឧតុនិយមនិយាយថា រលកកម្តៅនេះ នឹងមិនខ្លាំងដូចកាលពីដើមខែឧសភាទេ ពេលដែលកំណត់ត្រាសីតុណ្ហភាព បានឡើងដល់៤៤.២អង្សាសេនៅថ្ងៃទី៧ខែឧសភា៕

ប្រែសម្រួល៖ Vann Vann

ប្រភព៖​ VN Express