មេធំល្បែងអនឡាញចាប់បាននៅថៃ ជាបណ្តាញ​លាង​លុយកខ្វក់ មានលំហូរប្រាក់ប្រចាំឆ្នាំជាង ៣៥០ លានដុល្លារ

កាលពីថ្ងៃពុធទី៩ខែកក្កដាឆ្នាំ២០២៥ ប៉ូលិសអន្តោប្រវេសន៍ថៃ បានចាប់ខ្លួនមេធំល្បែងអនឡាញនិងបណ្តាញលាងលុយកខ្វក់ ពាក់ព័ន្ធគេហទំព័រ HYDRA888។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេក្លោងរូបនេះគឺជាជនជាតិម៉ាឡេស៊ីមានឈ្មោះ Steven Choong អាយុ២៦ឆ្នាំ ត្រូវបានចាប់ខ្លួននៅឯអាកាសយានដ្ឋាន ដនមឿន ក្នុងទីក្រុងបាងកកនៃប្រទេសថៃ តាមដីការបស់តុលាការខេត្ត Nonthaburi ដែលចេញតាំងតែពីថ្ងៃទី១៦ខែធ្នូឆ្នាំ២០២៤មកម្ល៉េះ។

តាមការស៊ើបអង្កេតបង្ហាញថា Steven Choong គឺជា ម្ចាស់ក្រុមហ៊ុនមួយ ដែលបន្លំប្រើប្រាស់ធ្វើជាបណ្តាញសម្រាប់លាងលុយពីគេហទំព័រល្បែងស៊ីសងអនឡាញ HYDRA888 ដោយមានលំហូរប្រាក់ប្រចាំឆ្នាំលើសពី ៣៥៣ លានដុល្លារអាមេរិក។

ប៉ូលិសធ្វើការចាប់ខ្លួនលោកក្រោយ​ចាប់ខ្លួនលោក Choong ក្រោយដឹងថា រូបគេនឹងមកដល់ប្រទេសថៃ តាមព្រលានយន្តហោះនេះ ហើយបន្ទាប់ពីចាប់បាន ជនសង្ស័យ​ត្រូវ​បញ្ជូន​ទៅ​ការិយាល័យ​ប្រឆាំង​បទល្មើស​បច្ចេកវិទ្យាទី​២ ដើម្បី​ចាត់ការ​បន្ត​តាម​ផ្លូវច្បាប់​។

តាមពិតទៅ គេហទំព័រល្បែងអនឡាញ HYDRA888 ត្រូវបាននាយកដ្ឋានស៊ើបអង្កេតឧក្រិដ្ឋកម្មបច្ចេកវិទ្យា នៃប្រទេសថៃ បើកការវាយឆ្មក់ជាទ្រង់ទ្រាយធំម្តងរួចមកហើយកាលពីខែកុម្ភៈឆ្នាំ២០២៥។

ក្នុងពេលវាយឆ្មក់នោះ អាជ្ញាធរថៃមិនបានចាប់ខ្លួនលោក Khanaphon Wichaikij ឬគេស្គាល់ថា «Top» ដែលជាម្ចាស់ពិតប្រាកដនៃគេហទំព័រ HYDRA888 ទេ ព្រោះរូបគេបានរត់គេចខ្លួនទៅកាន់ប្រទេសវៀតណាមបាត់ទៅហើយ។

ទោះបីជាយ៉ាងណាក៏ដោយ ការចាប់ខ្លួនលោក Steven Choong ពេលនេះគឺជាជំហានដ៏សំខាន់មួយឆ្ពោះទៅរកការបំបែកបណ្តាញល្បែងស៊ីសងអនឡាញដ៏ធំ និងកាត់ផ្តាច់ខ្សែសង្វាក់លាងលុយកខ្វក់របស់ពួកគេ៕

អត្ថបទ៖ សុខ សុវណ្ណ

ចុចអាន៖ ក្រុម​ឆបោក​តាម​ទូរសព្ទ​ដ៏​ធំ​បំផុត​របស់​ថៃ ត្រូវ​កាត់ទោស​ឲ្យ​ជាប់គុក​២៤​ឆ្នាំ