UN៖ មីយ៉ាន់ម៉ាស្ថិតលើផ្លូវទៅរក​ការបំផ្លាញខ្លួនឯង ប្រសិនបើអំពើហិង្សាមិនបញ្ចប់

បេសកជនពិសេសរបស់អង្គការសហប្រជាជាតិ លោកស្រី Julie Bishop បានប្រាប់មហាសន្និបាតអង្គការសហប្រជាជាតិថា មីយ៉ានម៉ាស្ថិតក្នុងគ្រោះថ្នាក់ធ្ងន់ធ្ងរក្នុងការបំផ្លាញខ្លួនឯង ប្រសិនបើការប្រយុទ្ធមិនឈប់ ហើយបើមិនមានកិច្ចខិតខំប្រឹងប្រែងពិតប្រាកដដើម្បីសន្តិភាពចាប់ផ្តើមក្នុងពេលឆាប់ៗនេះទេ។ នេះបើយោងតាមការចេញផ្សាយរបស់​ UN News នៅ​ថ្ងៃ១១ខែមិថុនា​ឆ្នាំ​២០២៥។

ប្រទេសមីយ៉ាន់ម៉ានៅតែស្ថិតក្នុងវិបត្តិជិតបីខែបន្ទាប់ពីការរញ្ជួយដីដ៏សាហាវ ខណៈដែលសង្រ្គាមស៊ីវិលនៅតែបន្តកើត​ឡើង​​បន្ទាប់ពីរដ្ឋប្រហារយោធាឆ្នាំ២០២១។ ទោះបីជាមានការអំពាវនាវឱ្យមានបទឈប់បាញ់ក៏ដោយ ការប្រយុទ្ធនៅតែបន្ត ព្រម​ទាំង​ការរារាំងជំនួយមនុស្សធម៌ និងការស្តារឡើងវិញ។ អ្នកនៅរស់រានមានជីវិតនិយាយថា ពួកគេគ្រាន់តែចង់ឱ្យអំពើហិង្សាបញ្ឈប់ដូច្នេះពួកគេអាចរស់នៅដោយសន្តិភាព។

លោកស្រី Bishop បានសង្កត់ធ្ងន់ថា បើគ្មានបទឈប់បាញ់ និងការសន្ទនាគ្នាទេ សន្តិភាពយូរអង្វែងគឺមិនអាចទៅរួចទេ។ លោកស្រីក៏បានរិះគន់ផែនការរបស់របបយោធាក្នុងការរៀបចំការបោះឆ្នោតដោយបញ្ជាក់ថា ជាមួយនឹងមេដឹកនាំនយោបាយដូចជាលោកស្រី Aung San Suu Kyi និង Win Myint នៅតែជាប់ពន្ធនាគារ ការបោះឆ្នោតណាមួយនឹងខ្វះភាពស្របច្បាប់ ហើយអាចនាំឱ្យមានអស្ថិរភាពបន្ថែមទៀត។

ជាមួយគ្នានេះ ស្ថានភាពរបស់ជនជាតិរ៉ូហ៊ីងយ៉ាកាន់តែធ្ងន់ធ្ងរ ដោយអ្នកដែលបានភៀសខ្លួនទៅជំរុំជនភៀសខ្លួនក្នុងប្រទេសបង់ក្លាដែស កំពុងជួបការលំបាក ដោយសារតែមិនមានអាហារគ្រប់គ្រាន់ ឬជំនួយទៀតទេ។ មនុស្ស​ជា​ច្រើន​ក៏ត្រូវ​បាន​បង្ខំ​ឱ្យ​ចូល​រួម​ក្នុង​ការ​ប្រយុទ្ធ និង​ត្រូវ​បាន​គេ​ធ្វើ​បាប​នៅ​ក្នុង​តំបន់​សង្គ្រាម។ លោកស្រី Bishop បានសង្កត់ធ្ងន់ថាអនាគតមីយ៉ាន់ម៉ាត្រូវតែរួមបញ្ចូលសុវត្ថិភាព សិទ្ធិមនុស្ស និងយុត្តិធម៌សម្រាប់សហគមន៍ទាំងអស់ ជាពិសេសជនជាតិរ៉ូហ៊ីងយ៉ា៕

អត្ថបទ៖ ប៊ុន សុភាព