ក្រសួងពាណិជ្ជកម្មបើកឱកាសដល់ម្ចាស់អាជីវកម្មចូលរួមការបង្ហាញម៉ូតគ្រឿងអលង្ការទំនើបៗ នៅឥណ្ឌា

ឥណ្ឌា នឹងរៀបចំព្រឹត្តិការណ៍ពិព័រណ៍គ្រឿងអលង្ការ នៅថ្ងៃទី ២៦-២៨ ខែមិថុនា ឆ្នាំ២០២៣ ខាងមុខ នៅមជ្ឈមណ្ឌលតាំងពិព័រណ៍ហ្រ្គីតធ័រណយដាឥណ្ឌា ទីក្រុងញូដេលី្ល ប្រទេសឥណ្ឌា។ នេះបើតាម​ការជូនដំណឹងរបស់ក្រសួងពាណិជ្ជកម្មកម្ពុជា។

ក្រសួងពាណិជ្ជកម្មកម្ពុជា បានបញ្ជាក់ថា ការដាក់បង្ហាញម៉ូតគ្រឿងអលង្ការនេះ នឹងផ្តល់ឱកាសម្ចាស់ក្រុម​ហ៊ុន/សហគ្រាស  អ្នកនាំចូល ពាណិជ្ជករកម្ពុជា បានសិក្សាស្វែងយល់បន្ថែមពីសិល្បៈ​ហត្ថកម្មដ៏អស្ចារ្យ​បំផុតរបស់ឥណ្ឌា និងសិល្បៈដែលធ្វើឡើងដោយភាពល្អឥតខ្ចោះជាមួយនឹងការរចនាបែបទំនើប និងសម្ភារលម្អរាងកាយ ជាច្រើនប្រភេទ។

លើសពីនេះទៅទៀត ការដាក់បង្ហាញនេះ នឹងមានម៉ូដគ្រឿងអលង្ការឥណ្ឌា ឆ្លុះបញ្ចាំងពីកេរដំណែលដ៏​សំបូរបែប​នៃស្នាដៃប្រពៃណីរបស់ជនជាតិឥណ្ឌា ដែលបានបញ្ចូលគ្នាជាមួយការរចនាបទប្រកបដោយភាពច្នៃប្រឌិត។ ដោយក្នុងនោះ មានក្រុមហ៊ុនប្រហែល ២៥០ក្រុមហ៊ុន មកពីគ្រប់តំបន់ នៃប្រទេសឥណ្ឌានឹង​មកបង្ហាញគ្រឿង​អលង្ការផងដែរ៕

អត្ថបទ៖ ផល ធារិត