អ៊ីមែលរបស់ក្រសួងការបរទេស អាមេរិក ប្រហែល ៦ ម៉ឺនករណីត្រូវគេលួច

ក្រសួងការបរទេសសហរដ្ឋអាមេរិកបាននិយាយថា អ៊ីមែលរបស់ក្រសួងប្រហែល ៦០,០០០ អ៊ីមែលត្រូវបានគេលួចនៅក្នុងការវាយប្រហារតាមអ៊ីនធឺណិត ខណៈគេសង្ស័យថាប្រព្រឹត្តដោយក្រុម Hacker ដែលមានមូលដ្ឋាននៅប្រទេសចិន ។

អ្នកនាំពាក្យក្រសួងការបរទេសលោក Matthew Miller បានបង្ហាញករណីនេះនៅក្នុងសន្និសីទសារព័ត៌មានមួយកាលពីថ្ងៃព្រហស្បតិ៍ ប៉ុន្តែលោក​បានលើកឡើង​ថា ប្រព័ន្ធ​រក្សាទុកឯកសារ​សម្ងាត់មិន​ត្រូវ​បាន​គេ​លួច​ចូលនោះ​ទេ ។

លោក Miller បញ្ជាក់ថា រដ្ឋាភិបាល​អាមេរិក​កំពុង​ប្រុង​ប្រយ័ត្ន​ខ្ពស់​មែនទែនចំពោះរឿងរ៉ាវវាយ​ប្រហារ​តាម​អ៊ីនធឺណិត​ពី​ប្រទេស​ចិន ដោយសារតែចិនតែងតែធ្វើសកម្មភាពតាមអ៊ីនធឺណិត ក្នុងចិត្តគំនិតអាក្រក់ ហើយពួកគេធ្វើបែបនេះជាមធ្យោបាយនៃការព្យាយាមប្រឆាំងនឹងអំណាចយោធារបស់សហរដ្ឋអាមេរិក ។

ទន្ទឹមនោះ ក្រុមហ៊ុន Microsoft បានប្រកាសកាលពីខែកក្កដាថា ក្រុម Hacker ដែលមានមូលដ្ឋាននៅប្រទេសចិនបានលួចចូលគណនីអ៊ីមែលដែលមានដំណភ្ជាប់ទៅទីភ្នាក់ងារ និងអង្គការរដ្ឋាភិបាលប្រហែល ២៥ អង្គភាព ខណៈក្រសួងការបរទេស​ក៏​បាន​និង​កំពុង​ស៊ើបអង្កេត​លើករណី​នេះផងដែរ ។

ពាក់ព័ន្ធនឹងបញ្ហានេះដែរ ប្រព័ន្ធផ្សព្វផ្សាយរបស់សហរដ្ឋអាមេរិកបានរាយការណ៍ថា គណនីអ៊ីមែលរបស់ក្រសួងការបរទេសចំនួន ១០ ត្រូវបានគេលួចចូល ហើយគណនីចំនួន ៩ ក្នុងចំណោមគណនីទាំង ១០ នោះ គឺជាគណនីរបស់ក្រុមមន្ត្រីដែលធ្វើការលើកិច្ចការអាស៊ីបូព៌ា និងប៉ាស៊ីហ្វិក ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អាមេរិក ប្រកាសផ្តល់ប្រាក់រង្វាន់ ៥លានដុល្លារសម្រាប់ព័ត៌មាន ឈានដល់ការចាប់ខ្លួនឃាតក សម្លាប់ បេក្ខជនប្រធានាធិបតី អេក្វាឌ័រ