មិនត្រឹមជំរំជនភៀសខ្លួននិងមន្ទីរពេទ្យ ពេលនេះ អ៊ីស្រាអែល បាញ់កម្ទេចស៊ីទែនទឹក នៅហ្គាហ្សា ទៀត

បន្ទាប់ពីជំរំជនភៀសខ្លួននិងមន្ទីរពេទ្យ ពេលនេះ អ៊ីស្រាអែល បានបើកការវាយប្រហារជាច្រើន ដោយកំណត់គោលដៅស៊ីទែនទឹកសាធារណៈ ដែលផ្គត់ផ្គង់ដល់សង្កាត់ជាច្រើននៅភាគខាងកើតទីក្រុង Rafah នៃតំបន់ហ្គាហ្សា ទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទូរទស្សន៍ Al Aqsa ដែលមានទំនាក់ទំនងជាមួយក្រុមហាម៉ាសបានបង្ហោះលើ Telegram ថា កងទ័ពអ៊ីស្រាអែល ថែមទាំងបានកំណត់គោលដៅច្រកចូលមន្ទីរពេទ្យកុមារ Al Nasr នៅភាគខាងលិចទីក្រុង ហ្គាហ្សា ទៀតផង។

ទូរទស្សន៍ដដែលនេះបន្ថែមថា វិហារឥស្លាមមួយនៅកណ្តាលសង្កាត់ Sabra ដែលមានប្រជាជនច្រើន នាភាគខាងលិចតំបន់ហ្គាហ្សា ក៏ត្រូវរងការទម្លាក់គ្រាប់បែកដែរ។

មិនទាន់អស់ឡើយ បើយោងតាមអ្នកឆ្លើយឆ្លងព័ត៌មាន Al Jazeera, កងកម្លាំងអ៊ីស្រាអែលបានកំណត់គោលដៅលើបន្ទះស្រូបពន្លឺព្រះអាទិត្យ (ផ្ទាំងសូឡា) នៅក្នុងទីក្រុង ហ្គាហ្សា ដែលបម្រើជាប្រភពអគ្គិសនីតែមួយគត់ សម្រាប់ប្រជាជនដែលនៅសេសសល់។

កងទ័ពអ៊ីស្រាអែលបានពង្រីកការវាយប្រហារតាមផ្លូវអាកាស និងជើងគោកលើតំបន់ហ្គាហ្សាស្ទ្រីប ក្រោយការទម្លាក់គ្រាប់បែកនិងបាញ់មីស៊ីលឥតដកដៃ ចាប់តាំងពីការវាយលុកដ៏គួរឲ្យភ្ញាក់ផ្អើលដោយក្រុមហាម៉ាសប៉ាឡេស្ទីន កាលពីថ្ងៃទី៧ខែតុលា។

មនុស្សជិត១០៨០០នាក់ត្រូវបានសម្លាប់នៅក្នុងជម្លោះ ក្នុងនោះមានជនជាតិប៉ាឡេស្ទីន៩២២៧នាក់ និងអ៊ីស្រាអែលជិត ១៥៤០នាក់៕

ប្រែសម្រួល៖ Vann Vann

ប្រភព៖ TRT

ចុចអាន៖ អ៊ីស្រាអែលប្រកាសថា ប្រទេសណាមិនគាំទ្រខ្លួន ប្រទេសនោះគឺនៅខាងក្រុមហាម៉ាស