ទ្រុងរថយន្តក៏កាត់ ស៊ីភ្លេក៏ដកហូត ទប់ស្កាត់ការបំផ្លាញផ្លូវនិងភាពអាណាធិបតេយ្យតាមដងផ្លូវ

ដើម្បីពង្រឹង​ក្នុងការដឹកជញ្ជូនដែលបង្កឲ្យខូចខាតផ្លូវតាមរយៈការដឹកជញ្ជូនលើសការកំណត់នៃច្បាប់ ដោយរថយន្តមួយចំនួន​បានតទ្រុងខុសបច្ចេកទេស​ដើម្បីផលប្រយោជន៍ក្រុមហ៊ុនឬឯកជន ដោយមិនគិតអំពីផលប្រយោជន៍រួម មន្ទីរ សាធារណះការ និងដឹកជញ្ជូនខេត្តបាត់ដំបង​បានសហការជាមួយកម្លាំងសមត្ថកិច្ចចំនួន ២ ស្ថាប័ន មានប៉ូលិស និង ប៉េអឹម បានចុះពិនិត្យលើគោលដៅសំខាន់ៗនៅថ្ងៃទី ១៨ ខែមីនានេះ។

លោក ព្រួញ រិទ្ធថា ប្រធានមន្ទីរសាធារណះការ និងដឹកជញ្ជូនខេត្តបាត់ដំបង​បានឲ្យដឹងថា ស្របការអនុវត្តជាប្រចាំទៅ​លើ​ហេដ្ឋារចនាសម្ព័ន្ធគ្រប់គោលដៅតាមបណ្តាស្រុក ក៏ដូចជាក្នុងក្រុងក្រោយការខូចខាតផ្លូវជាច្រើនខ្សែ ដែលបានបង្កដោយគ្រោះទឹកជំនន់បានវាយលុកនាពេលកន្លងមក លោកបានសហការជាមួយកម្លាំងសមត្ថកិច្ចចំនួន ២ ស្ថាប័ន មានប៉ូលិស និង ប៉េអឹម បាន​ចុះពិនិត្យលើរថយន្តដែលបានបង្កឲ្យខូចខាតផ្លូវ តាមរយះការដឹកលើសទម្ងន់ មានការតទ្រុងរថយន្ត ហើយក្នុងនោះលោកក៏បានធ្វើការដកហូតស៊ីភ្លេ​រថយន្តបានជាច្រើនផងដែរ ដែលបានបង្កភាពអាណាធិបតេយ្យតាមដងផ្លូវ ក្នុងរយះពេលប៉ុន្មានថ្ងៃចុងក្រោយនេះ ស្របតាមអនុសាសន៍ណែនាំពីរាជរដ្ឋាភិបាលផង ពាក់ព័ន្ធនិងសកម្មភាពរាំដោយអាណាធិបតេយ្យនៅតាមដងផ្លូវនេះ។

លោកបន្តថា ការចុះពង្រឹងលើប្រភេទរថយន្តនេះមិនមែនជាលើកដំបូងទេ គឺជាប្រចាំនៅតាមគោលដៅសំខាន់ៗតាមបណ្តាស្រុកនានាក្នុងខេត្ត ហើយនៅថ្ងៃទី១៨ខែមីនាឆ្នាំ២០២៤ ក្រុមការងារត្រួតពិនិត្យយានយន្តខុសលក្ខណៈបច្ចេកទេសនៃអនុគណៈកម្មការសុវត្ថិភាពចរាចរណ៍ផ្លូវគោកខេត្តបាត់ដំបង បន្តចុះត្រួតពិនិត្យកាត់ទ្រុងយានយន្តកែច្នៃខុសលក្ខណៈបច្ចេកទេសតាមដងផ្លូវ នៅត្រង់ចំណុចផ្លូវវាងក្រុងទី២PK២៨២+ ៧៤០ ភូមិ បោះពោរ ឃុំអូរដំបង១ ស្រុកសង្កែ ខេត្តបាត់ដំបង។

ក្នុងសកម្មភាពមន្ត្រីជំនាញបានដកហូតស៊ីភ្លេរថយន្តខ្នាតយក្ស ​ពលរដ្ឋ​បានសាទរ​ទាក់ទងចំណាត់ការនេះជាពិសេស​ពាក់ព័ន្ធ​ក្រុមរាំតាមសម្លេងស៊ីភេ្លរថយន្ត​គឺសុទ្ធសឹងជាសិស្សភាគច្រើន ដោយភ្លើតភ្លើនតៗគ្នា។ បើតាមពលរដ្ឋ​ឈ្មោះ​ ចាន់ថា រស់នៅ​ក្នុង​ខេត្ត​បាត់ដំបង​បាន​សាទរនិងចំណាត់ការរបស់មន្ត្រីជំនាញ ដោយស្រ្តីរូបនេះ​មើលឃើញពី​សកម្មភាពការ​រាំ​ញាក់​តាម​ស៊ីភ្លេ​រថយន្ត​នៅ​លើបណ្តាញសង្គម ដែលនាំ​ឲ្យប៉ះពាល់ដល់សណ្តាប់ធ្នាប់សង្គមនិងអាច​​បង្ក​គ្រោះថ្នាក់នៅ​តាមដង​ផ្លូវ​ផងដែរ៕

អត្ថបទ៖ សៅ សារិទ្ធ