មន្ត្រី UN កើតក្ដីព្រួយបារម្ភអំពីការប្រើអាវុធ AI នៅក្នុងសង្គ្រាម

មន្ត្រីអង្គការសហប្រជាជាតិ (UN) មានការព្រួយបារម្ភយ៉ាងខ្លាំងអំពីអាវុធ AI និងចង់បង្កើតការយល់ដឹងអំពីផលប៉ះពាល់នៃការប្រើប្រាស់បច្ចេកវិទ្យាមួយនេះ ខណៈបច្ចុប្បន្នមានការប្រើប្រាស់អាវុធ AI នៅក្នុងសង្គ្រាមរួចទៅហើយ ។ នេះបើយោងតាមសេចក្ដីរាយការណ៍របស់ទូរទស្សន៍ជាតិជប៉ុន NHK កាលពីថ្ងៃទី៧ ខែឧសភាកន្លងទៅ ។

យោងតាមអគ្គលេខាធិការរង និងជាតំណាងជាន់ខ្ពស់ទទួលបន្ទុកកិច្ចការរំសាយអាវុធរបស់ UN លោកស្រី Nakamitsu Izumi បានឲ្យដឹងថា ការប្រើប្រាស់ AI ដើម្បីធ្វើជាអាវុធនឹងបង្កើនហានិភ័យដល់ពិភពលោក ខណៈតាមសេចក្ដីរាយការណ៍ AI គឺត្រូវបានប្រើរួចទៅហើយនៅតំបន់ហ្គាហ្សា និងអ៊ុយក្រែន ហើយបច្ចុប្បន្នប្រទេសជាច្រើនក៏កំពុងអភិវឌ្ឍអាវុធបែបនេះផងដែរ ។

លោកស្រី Nakamitsu លើកឡើងទៀតថា ពិភពលោកនឹងមានវិបត្តិ ដោយសារតែអាវុធ AI ត្រូវបានបង្កើតឡើងដើម្បីប្រើប្រាស់ក្នុងសម័យសង្គ្រាមដែលនឹងនាំមកនូវការផ្លាស់ប្តូវិធីសាស្ត្រប្រយុទ្ធ និងធ្វើសង្រ្គាម ។ ជាពិសេសប្រព័ន្ធអាវុធដ៏ប្រល័យ (LAWS) ដែលប្រព័ន្ធអាវុធទាំងនោះវាយប្រហារគោលដៅដោយគ្មានការបញ្ជាពីមនុស្សនោះទេ ។ លោកស្រីបានសង្កត់ធ្ងន់ថា AI ផ្ដល់ផលប្រយោជន៍វិជ្ជមាន ប៉ុន្តែការប្រើប្រាស់ AI ខុសអាចផ្តល់ផលអវិជ្ជមានយ៉ាងខ្លាំងនិងគ្រោះថ្នាក់ជាទីបំផុត ។

គួរបញ្ជាក់ថា កាលពីឆ្នាំមុន អគ្គលេខាធិការអង្គការសហប្រជាជាតិ លោក Antonio Guterres ក៏បានអំពាវនាវឲ្យរដ្ឋជាសមាជិកអនុម័តក្របខ័ណ្ឌច្បាប់យ៉ាងយូរត្រឹមឆ្នាំ ២០២៦ ដោយសារតែបច្ចុប្បន្នមិនមានច្បាប់អន្តរជាតិគ្រប់គ្រងការប្រើប្រាស់ AI នោះទេ ៕

អត្ថបទ ៖ ប៊ុន សុភាព