ទីផ្សារចិនចាប់ផ្តើមបើកផ្លូវនាំចូលម្រេចពីកម្ពុជា

ភ្នំពេញ៖ កម្ពុជាបានចាប់ផ្តើមធ្វើការនាំចេញម្រេចដោយផ្ទាល់ទៅកាន់ទីផ្សារចិនជាលើកដំបូង ក្រោយពីប្រទេសទាំងពីរបានចុះហត្ថលេខាលើអនុស្សរណៈយោគយល់គ្នាស្តីពីតម្រូវការភូតគាមអនាម័យសម្រាប់ការនាំចេញម្រេចកាលពីខែវិច្ឆិកាឆ្នាំមុ​ន។

ក្រុមហ៊ុន Sela Pepper Cambodia គឺជាក្រុមហ៊ុនដំបូងដែលបានទទួលការអនុញ្ញាតធ្វើការនាំចេញម្រេចប្រមាណ៣០តោនទៅកាន់ទីផ្សារចិនកាលពីថ្ងៃទី២០ខែមេសាកន្លងមកនេះ។

អ្នកស្រី Anna Cai នាយកក្រុមហ៊ុន Sela Pepper បានប្រាប់កម្ពុជាថ្មីកាលពីថ្ងៃទី ៩ ឧសភាថា ក្រុមហ៊ុនរបស់លោកស្រីបានធ្វើការនាំចេញម្រេចចំនួន៣០តោនទៅកាន់ទីក្រុង Qingdao ក្នុងខេត្ត Shandong ​នៃប្រទេសចិន។

លោកស្រីថា ការនាំចេញនេះធ្វើឡើង បន្ទាប់ពីរដ្ឋាភិបាលចិន តាមរយៈស្ថានទូតចិននៅកម្ពុជាបានប្រកាសកាលពី ខែឧសភាឆ្នាំមុន​ថា ការនាំចូលម្រេចរបស់ព្រះរាជាណាចក្រកម្ពុជានឹងត្រូវបានអនុញ្ញាត។

លោកស្រីបានលើកឡើងថា៖« ដើម្បីនាំចេញទៅប្រទេសចិន ម្រេចត្រូវគោរពតាមបទប្បញ្ញត្តិរបស់រដ្ឋបាលគយនៃសាធារណៈរដ្ឋប្រជាមានិតចិន (GACC)។ ក្រុមហ៊ុនរបស់ខ្ញុំ​គឺបាន​បំពេញ​តាម​ស្តង់ដារ​គុណភាព​របស់​ប្រទេស​ចិន ទើបបានជាយើងជាក្រុមហ៊ុនដំបូងដែលធ្វើការនាំចេញទៅកាន់ទីផ្សារចិន។ ការណ៍នេះក៏បង្ហាញអំពីការប្រារព្ធខួប១ឆ្នាំ ចាប់តាំងពីរដ្ឋាភិបាលចិនបានបើកភ្លើងខៀវដល់ប្រទេសកម្ពុជាយើងអាចនាំចេញម្រេចទៅប្រទេសចិន»។

លោកស្រី Cai បានពន្យល់ថាក្រុមហ៊ុនរបស់ខ្លួនបានដំណើរការអស់រយៈពេលជិត១ទសវត្សមកហើយនៅកម្ពុជា ដោយធ្វើការជាមួយកសិករដើម្បីដាំដុះម្រេចដែលមានគុណភាពសម្រាប់ទីផ្សារក្នុងស្រុកនិងនាំចេញ។

លោក ងួន ឡាយ​ ​ប្រធាន​សមាគម​លើកកម្ពស់​ម្រេច​កំពត បានសាទរ ចំពោះការចាប់ផ្តើម​នាំចេញ ម្រេចដោយផ្ទាល់ទៅកាន់ទីផ្សារចិន ដែលជាការត្រួសត្រាយផ្លូវ ក្នុងការជំរុញ ការនាំ​ចេញផលិតម្រេចទៅកាន់ទីផ្សារដ៏ធំរបស់អាស៊ីមួយនេះ។

លោកបានថ្លែងថាក្រុមហ៊ុន Sela Pepper ក៏ជាសមាជិករបស់លោកផងដែរ ដែលក្រុមហ៊ុន​បានធ្វើការដោយផ្ទាល់ជាមួយកសិករក្នុងការដាំដុះម្រេចដែលមានគុណភាពខ្ពស់សម្រាប់ទាំងការនាំចេញនិងលក់ក្នុងស្រុក។

ក្នុង​ឆ្នាំ​២០២៣ កម្ពុជា​បាន​នាំ​ចេញ​ម្រេច​សរុប​ជាង​៦ ​ពាន់​តោន​ទៅ​កាន់​ទីផ្សារ​អន្តរជាតិ ដែល​មាន​ការ​ថយ​ចុះ​ជិត​២៧​ភាគរយ បើ​ធៀប​នឹង​ឆ្នាំ​២០២២៕