សមាគមម្រេចកំពង់ធំ មានសមត្ថភាពផ្គត់ផ្គង់ម្រេចរហូតដល់ ១០០ តោននៅក្នុងទីផ្សារ

សមាគមម្រេចសរីរាង្គកំពង់ធំស្ថិតនៅឃុំទំរីង ស្រុកសណ្តាន់ ខេត្តកំពង់ធំ មានផ្ទៃដីដាំដុះម្រេចសរុបចំនួន ៩៣ ហិកតា ដែលមានសមាជិក ៦០ គ្រួសារ និងមាន​សមត្ថភាព​​​ផ្គត់​ផ្គង់​ម្រេចពី ៦០-១០០ តោន ក្នុងមួយឆ្នាំនៅលើទីផ្សារ។

លោក ឈុំ ឆុនលី អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី ៤-៥ ខែ​សីហា ឆ្នាំ ២០២៥ បាន​ដឹកនាំក្រុមការងារ ជួប​ពិភាក្សាការងារ ជាមួយសហព័ន្ធម្រេចកម្ពុជា និងសមាគមម្រេចសរីរាង្គ។

ផលិតផលម្រេចរបស់សមាគម​ទទួលបានការគាំទ្រពីទីផ្សារ ដោយមានក្រុមហ៊ុនមួយ​ចំនួនដូច​ជា​៖ ក្រុមហ៊ុន អូឡាំ (Olam) ក្រុមហ៊ុន Agree Cook ក្រុមហ៊ុន Sela pepper Co.Ltd ក្រុមហ៊ុន S.E.A.T.S Inc ក្រុមហ៊ុន Sing natures of Asia Co.Ltd។

ក្រៅពីការគាំទ្រពីទីផ្សារនៅក្នុងស្រុក​សមាគមក៏មាន​បំណង​នាំម្រេចសុវត្ថិភាពទៅកាន់ទីផ្សារ​ប្រទេស​​ចិនថែមទៀត។ នៅក្នុងការជួយគាំទ្រដំណាំម្រេចកម្ពុជានេះ ក្រសួងកសិកម្ម ក៏បាន​សហ​ការ​រៀបចំបែបបទជាមួយសហព័ន្ធម្រេចកម្ពុជាយ៉ាងសកម្មផងដែរ។

លោក ម៉ាក់ នី ប្រធានសមាគមសហព័ន្ធម្រេច និងគ្រឿងទេសកម្ពុជា (CPSF) ប្រាប់កម្ពុជា​ថ្មីថា ស្ដុកម្រេចនៅលើពិភពលោកប្រឈមនឹងការធ្លាក់ចុះ ធ្វើឱ្យការនាំចេញធ្លាក់ចុះ ខណៈការប្រមូល​ផលម្រេច​មិនទាន់បញ្ចប់នៅឡើយទេ ចំណែកឯតម្លៃម្រេចធម្មតានៅ​កម្ពុជា​​បានកើន​ដល់​ចន្លោះពី ២៥០០០-២៦៥០០ រៀល ក្នុងមួយ​គីឡូ​ក្រាម ដែលមានភាពល្អប្រសើរជាងឆ្នាំមុន។

យោងតាមក្រសួងពាណិជ្ជ នៅឆមាសទី១ ឆ្នាំ ២០២៥ កម្ពុជានាំ​ចេញ​ម្រេចសម្រេចបានទំហំទឹកប្រាក់ជិត​ ២០ លានដុល្លារ ធ្លាក់ចុះ ២១,៣៧% ធៀបនឹងរយៈ​ពេល​ដូចគ្នានៅឆ្នាំ ២០២៤ ដែលមានទំហំទឹកប្រាក់ ២៥ លានដុល្លារ។

យោងតាមសមាគម​សហព័ន្ធ​ម្រេច នៅក្នុងឆ្នាំ ២០២៤ ផលិតកម្ម​ម្រេច​នៅ​កម្ពុជា​សម្រេច​បាន​ប្រមាណ ៩ ពាន់តោន ធ្លាក់ចុះពី ៤០-៥០ ភាគរយ បើធៀបនឹងឆ្នាំ ២០២៣ ប៉ុន្តែ​តម្លៃ​ម្រេច​បាន​កើនឡើង​ទ្វេ​ដងដែលមានតម្លៃ ២ ម៉ឺន ៤ ពាន់រៀល​ក្នុង​មួយ​គីឡូ​ក្រាម។

ក្នុងមួយឆ្នាំកម្ពុជាប្រមូលផលម្រេច​បានក្នុងរង្វង់ ១,៧​ តោន ទៅ ២ ម៉ឺនតោន​លើផ្ទៃ​ដី​ជាង ៦ ពាន់​ហិកតា​ ខណៈទីផ្សារម្រេចកម្ពុជាត្រូវបាននាំទៅកាន់ប្រទេសវៀតណាមប្រមាណ ៨០ ភាគ​រយ និងប្រទេស​បន្ទាប់បន្សំដូចជា ចិន តៃវ៉ាន់ ថៃ ជប៉ុន កូរ៉េ និងសហគមនអឺរ៉ុប៕

អត្ថបទ៖ ឡេង ដេត