ព័ត៌មានអន្ដរជាតិ

រលកកម្ដៅ៥២អង្សា ប្រល័យជីវិតអ្នកចូលរួមធម្មយាត្រា Hajj ជាង១០០០នាក់ហើយ

បានផុស

២ years មុន

នៅ

ថ្ងៃសុក្រ ២១ មិថុនា ២០២៤

ដោយ

Chheang

តួលេខចុងក្រោយនៃអ្នកបាត់បង់ជីវិតព្រោះរលកកម្ដៅ នៅក្នុងព្រឹត្តិការណ៍ធម្មយាត្រា Hajj នៅអារ៉ាប៊ីសាអូឌីត បានកើនឡើងជាង ១០០០នាក់ហើយ។ នេះបើយោងតាមការចុះផ្សាយរបស់សារព័ត៌មាន AFP កាលពីរសៀលថ្ងៃទី២០ ខែមិថុនា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន AFP បានផ្សាយថា ក្នុងចំណោមអ្នកស្លាប់ ១ ០៨១នាក់ មានប្រមាណ ៦៣០នាក់ គឺជាអ្នកចូលរួមដែលមិនបានចុះឈ្មោះផ្លូវការ ដែលពិបាកក្នុងការកំណត់អត្តសញ្ញាណ។ មជ្ឈមណ្ឌលឧតុនិយមជាតិអារ៉ាប៊ីសាអូឌីត បានប្រកាសថា សីតុណ្ហភាពក្នុងសប្ដាហ៍នេះ នៅពេលធ្វើធម្មយាត្រា Hajj បានកើនឡើងខ្លាំងរហូតដល់ ៥១,៨អង្សាសេឯណោះ នៅទីក្រុង Mecca។ បើតាមការសិក្សារបស់អារ៉ាប៊ីសាអូឌីត សីតុណ្ហភាពនៅតំបន់នោះ កំពុងកើនឡើងជារៀងរាល់ឆ្នាំ ដោយក្នុង១ទសវត្ស កើនកម្ដៅប្រមាណ ០,៤អង្សាសេ ដែលជាហេតុបង្កឲ្យមានគ្រោះថ្នាក់ខ្លាំងចំពោះប្រជាជន ជាពិសេសគឺអ្នកចូលរួមក្នុងពិធីសាសនាធំៗដូចជា ធម្មយាត្រា Hajj ជាដើម។

ជារៀងរាល់ឆ្នាំ អ្នកកាន់សាសនាឥស្លាមតែងតែធ្វើដំណើរទៅកាន់ទីក្រុង Mecca ដើម្បីធ្វើធម្មយាត្រា Hajj ក្នុងខែមិថុនា ដែលជាខែមានអាកាសធាតុក្តៅខ្លាំង។ តាមសេចក្តីរាយការណ៍ មនុស្សស្លាប់មួយចំនួន គឺបណ្តាលមកពីដាច់សរសៃរឈាមខួរក្បាលដោយសារតែមេឃក្តៅខ្លាំងពេក រីឯអ្នកខ្លះបាត់បង់ជាតិទឹកក្នុងខ្លួនធ្ងន់ធ្ងរ។

សូមបញ្ជាក់ថា យោងតាមស្ថិតិអារ៉ាប៊ីសាអូឌីត, ធម្មយាត្រា Hajj ឆ្នាំ២០២៤នេះ មានមនុស្សជាង១,៨លាននាក់ បានមកចូលរួមក្នុងពិធីជួបជុំសាសនាដ៏ធំបំផុតមួយរបស់ពិភពលោក។

មនុស្សស្លាប់ក្នុងពិធីនេះមិនមែនជារឿងថ្មីឡើយ តួយ៉ាងដូចកាលពីឆ្នាំមុន មានមនុស្ស ២៤០នាក់ ត្រូវបាត់បង់ជីវិត ហើយរឿងដែលគេនៅតែចាំមិនភ្លេចគឺជាគ្រោះមហន្តរាយដ៏រន្ធត់ឆ្នាំ២០១៥ ដែលការរត់ជាន់គ្នាបានសម្លាប់មនុស្សជាង ២ ០០០នាក់៕

ដោយ៖ ឈាង

Related Topics:ប្រទេសអារ៉ាប៊ីសាអូឌីត ពិធីបុណ្យ Hajj