ប្រទេសតំបន់អារ៉ាប់​ ថ្កោលទោសអ៊ីស្រាអែល ដែលរំលោភបំពានលើតំបន់សាសនា នៅក្រុង ហ្សេរុយសាឡឹម

រដ្ឋមន្ត្រីការបរទេសនៃ​បណ្តា​ប្រទេសតំបន់​អារ៉ាប់ រួមមាន ប្រទេសអារ៉ាប៊ីសាអូឌីត អេមីរ៉ាតអារ៉ាប់រួម ហ្ស៊កដានី តួកគី អេហ្ស៊ីប ឥណ្ឌូនេស៊ី ប៉ាគីស្ថាន និងកាតា កាលពីថ្ងៃព្រហស្បតិ៍ទី២៣មេសា បានរួមគ្នាថ្កោលទោសចំពោះ «ការរំលោភបំពានម្តងហើយម្តងទៀតរបស់អាជ្ញាធរយោធាកាន់កាប់របស់អ៊ីស្រាអែល» ទៅលើស្ថានភាពដើមនៃប្រវត្តិសាស្ត្រ និងច្បាប់​នៃ​ទីតាំងសក្ការៈបូជាសាសនាអ៊ីស្លាម និងគ្រិស្តសាសនា នៅក្នុងទីក្រុងហ្សេរុយសាឡឹម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីថ្លែងការណ៍មួយដែលចេញដោយក្រសួងការបរទេសនៃព្រះរាជាណាចក្រ (អារ៉ាប៊ីសាអូឌីត) ពួកគេបានថ្កោលទោស «ការចូលរំលោភបំពានដដែលៗពីសំណាក់ក្រុមអ្នកតាំងទីលំនៅអ៊ីស្រាអែល និងបណ្តារដ្ឋមន្ត្រីជ្រុលនិយមទៅក្នុងវិហារអាល់អាកសា (Al-Aqsa) ព្រមទាំងការបង្ហូតទង់ជាតិអ៊ីស្រាអែល នៅតាមទីធ្លានៃវិហារនោះផងដែរ។

យោងតាមទីភ្នាក់ងារ alarabiya រដ្ឋមន្ត្រីបានបញ្ជាក់ជាថ្មីថា «សកម្មភាពញុះញង់ទាំងនេះនៅវិហារអាល់អាកសា បង្កើតបានជាការរំលោភបំពានយ៉ាងធ្ងន់ធ្ងរលើច្បាប់អន្តរជាតិ និងច្បាប់មនុស្សធម៌អន្តរជាតិ ហើយតំណាងឲ្យការញុះញង់ដែលមិនអាចទទួលយកបានចំពោះប្រជាជនមូស្លីមទូទាំងពិភពលោក»។

ក្រុមរដ្ឋមន្ត្រីបានបន្តថ្កោលទោសចំពោះសកម្មភាពពង្រីកការតាំងទីលំនៅខុសច្បាប់ដែលកំពុងកើនឡើងយ៉ាងឆាប់រហ័ស រួមទាំងការសម្រេចចិត្តរបស់អ៊ីស្រាអែលក្នុងការអនុម័តលើការតាំងទីលំនៅថ្មីជាង ៣០ កន្លែងបន្ថែមទៀត ព្រមទាំងការបន្តបង្កើនអំពើហិង្សាពីសំណាក់ក្រុមអ្នកតាំងទីលំនៅ (អ៊ីស្រាអែល) ប្រឆាំងនឹងប្រជាជនប៉ាឡេស្ទីន នៅតំបន់ West Bank ដែលកំពុងស្ថិតក្រោមការកាន់កាប់៕

អត្ថបទ៖ សាង ស្រីល័ក្ខ