ការវាយប្រហារ​ ឆេះ​​​​រោងចក្រថាមពល​នុយក្លេអ៊ែរ​អារ៉ាប់រួម កំពុង​អង្រួន​នៅមជ្ឈិមបូព៌ា​

ប្រទេសអារ៉ាប៊ីសាអូឌីត នៅ​ថ្ងៃអាទិត្យទី១៧ ខែឧសភា បានថ្កោលទោស​​ធ្ងន់ៗ​​ចំពោះការវាយប្រហារដោយដ្រូន លើ​​ប្រទេស​អារ៉ាប់រួម (UAE) ដែលបានបង្កឲ្យមានអគ្គិភ័យឆាបឆេះនៅខាងក្រៅបរិវេណខាងក្នុងនៃរោងចក្រថាមពល​នុយក្លេអ៊ែរ Barakah ខណៈដែលអាជ្ញាធរអារ៉ាប់រួមកំពុងស៊ើបអង្កេតរកប្រភពនៃការវាយប្រហារនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន timesofisrael ក្រសួងការពារជាតិរបស់អារ៉ាប់រួម បានឲ្យដឹងថា ខ្លួនបានស្ទាក់ចាប់ដ្រូនចំនួនពីរគ្រឿងដោយជោគជ័យ ខណៈដែលដ្រូនទីបី បានធ្លាក់ចំម៉ាស៊ីនភ្លើងក្បែរទីតាំងនុយក្លេអ៊ែរ ស្ថិតក្នុងតំបន់ al-Dhafra នៃរដ្ឋធានី​អាប៊ូដាប៊ី។ ដ្រូនទាំងនោះបានហោះចូលមកពីព្រំដែនខាងលិច ប៉ុន្តែមិនបានផ្តល់ព័ត៌មានលម្អិតបន្ថែមនោះទេ។

នៅក្នុងសេចក្តីថ្លែងការណ៍មួយ ក្រសួងការបរទេសអារ៉ាប៊ីសាអូឌីត បានលើកឡើង​ពី​ការ​​​ថ្កោលទោស​ចំពោះ «ការវាយប្រហារដ៏គគ្លើន» ទាំងនេះ ដែលខ្លួនបានចាត់ទុកថា កំពុងគំរាមកំហែងដល់សន្តិសុខ និងស្ថិរភាពក្នុងតំបន់។ ក្រសួងក៏បាន​បញ្ជាក់ជាថ្មីពីសាមគ្គីភាពរបស់អារ៉ាប៊ីសាអូឌីតជាមួយអារ៉ាប់រួម និងការគាំទ្ររបស់ខ្លួនចំពោះ រាល់វិធានការទាំងឡាយដែលអារ៉ាប់រួមចាត់ចែង ដើម្បីការពារអធិបតេយ្យភាព សន្តិសុខ និងបូរណភាពទឹកដីរបស់ខ្លួន។

ដោយឡែក ក្រសួងការបរទេសរបស់អារ៉ាប់រួមបានថ្កោលទោសការវាយប្រហារនេះ ដោយពណ៌នាថាជា ការកើនឡើងកម្តៅដ៏គ្រោះថ្នាក់មួយ។ សេចក្តីថ្លែងការណ៍របស់ក្រសួងបានសង្កត់ធ្ងន់ថា «សហភាពអារ៉ាប់រួមបញ្ជាក់ថា ខ្លួននឹងមិនអត់ឱនចំពោះការគំរាមកំហែងណាមួយដល់សន្តិសុខ និងអធិបតេយ្យភាពរបស់ខ្លួន ទោះស្ថិតក្នុងកាលៈទេសៈណាក៏ដោយ»។

នៅល្ងាចថ្ងៃអាទិត្យដដែលនោះ ទីប្រឹក្សាប្រធានាធិបតីអារ៉ាប់រួម លោក Anwar Gargash បានពណ៌នាការកំណត់គោលដៅលើរោងចក្រ Barakah ថាជាសកម្មភាព «ភេរវកម្ម» ដោយលើកឡើងថា ទោះបីជាវាត្រូវបានអនុវត្តដោយផ្ទាល់ដោយប្រទេសអ៊ីរ៉ង់ ឬ «តាមរយៈក្រុមប្រូកស៊ី (ក្រុមតំណាង) ណាមួយរបស់ខ្លួន» ក៏ដោយ វាបានបង្ហាញពីការវិវត្តន៍ដ៏ខ្មៅងងឹតមួយ ដែលរំលោភលើច្បាប់ និងបទដ្ឋានអន្តរជាតិទាំងអស់ ព្រមទាំងឆ្លុះបញ្ចាំងពីការមិនខ្វល់ខ្វាយបែបព្រហ្មទណ្ឌចំពោះជីវិតរបស់ប្រជាពលរដ្ឋស៊ីវិលនៅក្នុងប្រទេសអារ៉ាប់រួម និងតំបន់ជុំវិញ។

លោកបានបន្ថែមថា៖ «គ្មាននរណាម្នាក់អាចគំរាមកំហែង អារ៉ាប់រួមបានឡើយ ហើយក៏គ្មាននរណាម្នាក់អាចបំផ្លាញចក្ខុវិស័យ ជោគជ័យ និងសារដ៏មានឥទ្ធិពលរបស់ខ្លួនទៅកាន់ប្រជាជននៅក្នុងតំបន់ ដែលផ្ដោតលើសន្តិសុខ ស្ថិរភាព ការអភិវឌ្ឍន៍ និងវិបុលភាពនោះបានដែរ»៕

អត្ថបទ៖ សាង ស្រីល័ក្ខ

អារ៉ាប់រួម បញ្ជាក់ជំហររឹងមាំ និងបដិសេធការចោទប្រកាន់របស់អ៊ីរ៉ង់ ក្នុងកិច្ចប្រជុំប្លុក BRICS