ក្រសួងសុខាភិបាលតាមដានដំណេីរការ ផ្តល់សេវាសុខាភិបាល តាមមណ្ឌលសុខភាព ១៣ ខេត្ត

វេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានដឹកនាំកិច្ចប្រជុំក្រុមការងារបច្ចេកទេសសេវាសុខភាពបឋមនៅកម្រិតមណ្ឌលសុខភាព ក្នុងខេត្តចំនួន ១៣ ដូចជា បន្ទាយមានជ័យ សៀមរាប ឧត្តរមានជ័យ ព្រះវិហារ កំពង់ធំ កំពង់ចាម ត្បូងឃ្មុំ ក្រចេះ មណ្ឌលគីរី រតនគីរី ស្ទឹងត្រែង ព្រៃវែង និងស្វាយរៀង។

គោលបំណងកិច្ចប្រជុំពិភាក្សានេះ គឺស្វែងរកការបញ្ជាក់ ដើម្បីជាការឆ្លើយតបទៅនឹងសំណួររបស់ថ្នាក់ដឹកនាំ សំដៅធ្វេីឱ្យបានល្អប្រសេីរឡេីងនូវដំណេីរការមណ្ឌលសុខភាពនៅក្នុងខេត្តទាំង១៣ ។

សាស្ត្រាចារ្យរដ្ឋមន្ត្រី វេជ្ជបណ្ឌិត ឱ វណ្ណឌីន បានរំលេច និងអំពាវនាវដល់ថ្នាក់ដឹកនាំមន្ទីរសុខាភិបាល រួមទាំងក្រុមការងារ និងមន្ត្រីពាក់ព័ន្ធគ្រប់ជាន់ថ្នាក់ ត្រូវបន្តការពង្រឹងការផ្ដល់សេវាជូនជាពលរដ្ឋឱ្យបាន ២៤ម៉ោង/៧ថ្ងៃ ការធ្វើបដិសណ្ឋារកិច្ចល្អ ការបង្កើនការយកចិត្តទុកលើអនាម័យ និងភាពស្អាតបាត ការពង្រឹងសមត្ថភាពបុគ្គលិក ការពង្រឹងគុណភាពសម្ភារបរិក្ខារពេទ្យ និងឱសថ ការកត់ត្រាជាប់លាប់ ការបង្កើនការយកចិត្តទុកដាក់ និងតាមដានជាប់ជាប្រចាំគ្រោះថ្នាក់ នៃការឆ្លងរោគ ក៏ដូចជាការបង្កើនជាប់ជាប្រចាំនូវសកម្មភាពអប់រំសុខភាពផងដែរ។

គួរបញ្ជាក់ថា កិច្ចប្រជុំនេះបានធ្វើឡើងតាមរយៈប្រព័ន្ធនិមិត្ត Zoom នាថ្ងៃទី៣១ ខែកក្កដា ឆ្នាំ២០២៤ ដោយមានអ្នកចូលរួមសរុបចំនួន ៦៧នាក់ រួមមាន អភិបាលរងខេត្ត ប្រធានមន្ទីរសុខាភិបាល នៃរដ្ឋបាលខេត្ត អនុប្រធានមន្ទីរសុខាភិបាល ប្រធានការិយាល័យបច្ចេកទេស និងមន្ត្រី នៃមន្ទីរសុខាភិបាល ក្នុងខេត្តទាំង ១៣៕