កីឡា

លោក អាំង សិរីពិសិដ្ឋ ថា ក្រុមបាល់ទះវិសាខា ប្រឈមអត់បានលេងពានសម្តេច ស ខេង

បានផុស

២ years មុន

នៅ

ថ្ងៃសុក្រ ២៣ សីហា ២០២៤

ដោយ

ក្រុមបាល់ទះវិសាខាអាចនឹងអត់បានប្រកួតពានរង្វាន់សម្តេចក្រឡាហោម ស ខេង រដូវកាលថ្មី បន្ទាប់ពីលក្ខន្តិកៈនៃការប្រកួតត្រូវបានកែប្រែដើម្បីឲ្យការប្រកួតប្រជែងកាន់តែទូលំទូលាយទាំងរាជធានី និងខេត្ត។

លោក អាំង សិរីពិសិដ្ឋ អគ្គលេខាធិការ និងជាអនុប្រធានសហព័ន្ធកីឡាបាល់ទះកម្ពុជា បានឲ្យដឹងថា ពានរង្វាន់សម្តេចក្រឡាហោម ស ខេង ជាព្រឹត្តិការណ៍បាល់ទះធំលំដាប់ទី២នៅប្រទេសកកម្ពុជា បន្ទាប់ពីលីគបាល់ទះកំពូលកម្ពុជាដែលហៅកាត់ថា តេជោលីគ។ សម្រាប់រដូវកាលថ្មីខាងមុខនេះនឹងមានការកែប្រែគោលការណ៍ប្រកួតខ្លះដើម្បីឲ្យកាន់តែមានស្មើភាពគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តថា រដូវកាលមុន ពានរង្វាន់នេះតម្រូវឲ្យក្រុមកម្រិត B និងក្រុមតាមបណ្តាខេត្តចូលរួមប្រកួត ខណៈក្រុមកម្រិត A មិនអាចចូលរួមប្រកួតបានទេ ពួកគេត្រូវចូលរួមប្រកួតតេជោលីគ។ ទោះបីជាយ៉ាងណា ការកំណត់ឲ្យក្រុមកម្រិត B ចូលរួមបានធ្វើឲ្យមានបញ្ហាស្មុគស្មាញ ពីព្រោះក្រុមអាជីពខ្លះបែរជាដាក់កីឡាករខ្លះពីកម្រិត A មកកម្រិត B ហើយកីឡាករខ្លះពីកម្រិត B ទៅកម្រិត A វិញ។ ប្រការនេះបានធ្វើឲ្យមានការប្រកួតប្រជែងមិនសូវស្មើភាពគ្នាជាមួយក្រុមតាមបណ្តាខេត្ត។

លោក អាំង សិរីពិសិដ្ឋ បាននលើកឡើងថា ៖«តាមបណ្តាក្លិបដែលយើងបានរាយនាមកីឡាករទាំង២៧ដែលយើងបានចែកជូននោះគឺយើងចាត់ទុកពួកគាត់ជាកីឡាករមានគុណផលខ្ពស់ ដូច្នេះក្រុមអាចប្រើប្រាស់កីឡាករទាំងនោះបានតែ២នាក់ប៉ុណ្ណោះ។ ជាក់ស្តែងកាលពីឆ្នាំមុន ក្រុមវិសាខា A ដែលយើងចាត់ទុកជាជម្រើសជាតិអត់បានលេង តែលើកនេះពួកគាត់នឹងបានលេង តែមិនមែនក្នុងនាមក្រុមវិសាខា។ យើងបានបើកទីផ្សារដោះដូរឲ្យខ្ចីជើង។ អីចឹងបណ្តាក្រុម២៥រាជធានី-ខេត្តអាចខ្ចីជើងកីឡាករលំដាប់ A ពីវិសាខា ពីក្លិបលំដាប់ A ផ្សេងទៀត។ ការបំបែកកីឡាករដែលមានគុណផលខ្ពស់ឲ្យទៅតាមតាមបណ្តាក្រុមរាជធានី-ខេត្ត ធ្វើឲ្យការប្រកួតប្រជែងផុសផុលខ្លាំង»។

«ទីពីរយើងបើកលទ្ធភាពឲ្យក្រុមទាំងអស់អាចនាំចូលកីឡាករបរទេស១នាក់។ ក្រុមដែលមានធនធានអាចនាំចូលកីឡាករបរទេសចូលរួមប្រកួតពានសម្តេចក្រឡាហោម ស ខេង បាន១នាក់។ ខ្ញុំចង់ឃើញពានរង្វាន់នេះបានទៅក្រុមថ្នាក់ខេត្តច្រើនជាង។ ដោយឡែកក្រុមយុវជនជម្រើសជាតិកម្ពុជាអាយុ២០ឆ្នាំដាក់ឲ្យលេងពានសម្តេចក្រឡាហោម ហើយពួកគេមានកៅអីដោយស្វ័យប្រវត្តិទៀតលេងតេជោលីគ»។ លោក អាំង សិរីពិសិដ្ឋ បានរៀបរាប់។

លោកបានបញ្ជាក់ថា វិសាខា ជាក្រុមដែលមានកីឡាករគុណផលខ្ពស់គឺកម្រិត A ប៉ុន្តែនឹងត្រូវចែកផ្លូវគ្នាតាមរយៈការខ្ចីជើងទៅក្រុមផ្សេងដែលមួយក្រុមៗអាចដាក់កីឡាករកម្រិត A បាន២នាក់ ហើយក្រុមយុវជនវិសាខាភាគច្រើនជាក្រុមយុវជនម្រើសជាតិកម្ពុជាដែលចូលលេងក្នុងនាមក្រុមយុវជនជម្រើសជាតិ ដូច្នេះវិសាខាអាចប្រឈមអត់មានក្រុមលេងពានរង្វាន់នេះទេ។

កាលពីឆ្នាំ២០២៣ ពានរង្វាន់សម្ដេចក្រឡាហោម ស ខេង លើកទី២ បានរៀបចំប្រកួតពីថ្ងៃទី១០-១៩ ខែវិច្ឆិកា ដោយក្រុមចំនួន២៩ចូលរួមប្រកួតប្រជែង។ ក្រុមបាល់ទះក្រសួងមហាផ្ទៃ B បានក្លាយជាជើងឯកជាមួយប្រាក់រង្វាន់៥០លានរៀល ខណៈលេខ២បានទៅក្រុមរដ្ឋបាលរាជធានីភ្នំពេញទទួលបានប្រាក់រង្វាន់២០លានរៀល និងក្រុមបញ្ជាការដ្ឋានកងអង្គរក្សទទួលបានលេខ៣ប្រាក់រង្វាន់១២លានរៀល៕

អត្ថបទ៖ វីរបុត្រ

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា