រដ្ឋមន្រ្តីសុខាភិបាល ណែនាំគ្លីនិកឯកជនដែលមានសេវាសម្រាលកូនត្រូវមានកញ្ចប់សេវាសង្គ្រោះបន្ទាន់

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាលបានណែនាំដល់គ្លីនិកសេវាឯកជនដែលមានសេវាសម្រាលកូន
សុំឱ្យរៀបចំកន្លែងឱ្យបានត្រឹមត្រូវ និងមានកញ្ចប់សេវាសង្គ្រោះបន្ទាន់ដើម្បីសង្គ្រោះទារកនៅនឹងកន្លែងឱ្យបានទាន់ពេលវេលា ព្រោះអ្នកធ្វើការងារសម្ភពរោគស្ត្រី ជាអ្នកសង្គ្រោះជីវិតមាតា និងទារក។

ថ្លែងបើកទិវាលើកទី២៣ នៃសមាគមសម្ភព និងរោគស្ត្រីវិទ្យាកម្ពុជា ក្រោមប្រធានបទ “រួមគ្នាដើម្បីលើកកម្ពស់សុខភាពស្ត្រី” នៅព្រឹកថ្ងៃទី២២វិច្ឆិកា លោករដ្ឋមន្ត្រីបានលើកឡើងថា «អ្នកប្រកបវិជ្ជាជីវៈសុខាភិបាលផ្នែកសម្ភព និងរោគស្រ្តីពិតជាដើរតួនាទីយ៉ាងសំខាន់ណាស់ក្នុងការជួយសង្រ្គោះអាយុជីវិតមាតា និងទារក»។

លោករដ្ឋមន្ត្រីបានណែនាំដល់សមាគមសម្ភព និងរោគស្ត្រីវិទ្យាកម្ពុជា ត្រូវរៀបចំឱ្យមានវគ្គបណ្តុះបណ្តាលបន្តជាប្រចាំ
និងត្រូវធ្វើបច្ចុប្បន្នភាពបច្ចេកទេសទាន់សម័យ រួមទាំងឧបករណ៍ សម្ភារ និងឱសថ។ អ្នកផ្តល់សេវាទាំងអស់ត្រូវចុះបញ្ជីគណៈវិជ្ជាជីវៈរបស់ខ្លួនឱ្យបានត្រឹមត្រូវដោយត្រូវមានបញ្ជិកាឱ្យបានត្រឹមត្រូវ ហើយត្រូវផ្ទៀងផ្ទាត់ឱ្យគ្រប់តាមលក្ខខណ្ឌ ជាពិសេសធនធានមនុស្សសមស្រប និងឯកសារបទដ្ឋានដាក់បិទផ្សាយនៅលើជញ្ជាំង។ ត្រូវរាយការណ៍ឱ្យបានជាប់ជាប្រចាំជាមួយផ្នែកពាក់ព័ន្ធទាំងផ្នែកសុខាភិបាលមូលដ្ឋាន និងអាជ្ញាធរមូលដ្ឋាន។

ជាមួយគ្នានេះដែរលោករដ្ឋមន្ត្រីបានលើកទឹកចិត្តឱ្យសេវាឯកជនចូលរួមជាសមាជិកសមាគមសម្ភព និងរោគស្ត្រីវិទ្យាកម្ពុជា ដើម្បីស្វែងយល់ជាមួយគ្នា ធ្វើការជាមួយគ្នាប្រុងប្រយ័ត្នជាមួយគ្នា អាចជួយគ្នាបាន។ ចំណែកនៅតាមគ្លីនិក/សេវាឯកជនដែលមានសេវាសម្រាលកូនសុំឱ្យរៀបចំកន្លែងត្រឹមត្រូវ មានកញ្ចប់សេវាសង្គ្រោះបន្ទាន់ដើម្បីសង្គ្រោះទារកនៅនឹងកន្លែងបានទាន់ពេលវេលាព្រោះអ្នកធ្វើការងារសម្ភពរោគស្ត្រី ជាអ្នកសង្គ្រោះជីវិតមាតា និងទារក។

លោករដ្ឋមន្ត្រីបានអំពាវនាវដល់ថ្នាក់ដឹកនាំសមាគមសម្ភព និងរោគស្រ្តីវិទ្យាកម្ពុជារួមគ្នាយកចិត្តទុកដាក់ក្នុងការពង្រឹងការលើកកម្ពស់សុខភាពមាតា ទារក និងកុមារនៅកម្ពុជា ទាំងផ្នែកសេវាសាធារណៈ ជាពិសេសសេវាឯកជនក្នុងនោះត្រូវយកចិត្តទុកដាក់ទៅលើការកសាងសមត្ថភាពតាមរយៈការរៀបចំវគ្គបណ្តុះបណ្តាលបន្ថែម និងបង្កើនចំនួនគ្រូបង្គោលការគោរពនិយាមក្រមសីលធម៌វិជ្ជាជីវៈ ការពង្រឹងធនធានមនុស្ស ហេដ្ឋារចនាសម្ព័ន្ធសម្ភារ និងគោរពតាមនិយាម គោលការណ៍ណែនាំរបស់ក្រសួងសុខាភិបាលការបង្កើនកិច្ចសហការបច្ចេកទេសជាមួយដៃគូឱ្យបានទូលំទូលាយ
និងការពង្រឹងកិច្ចប្រាស្រ័យទាក់ទងឱ្យបានជិតស្និទ្ធ ការផ្សព្វផ្សាយ អប់រំសុខភាព និងជំរុញឱ្យមានការចូលរួមពីសហគមន៍៕

អត្ថបទ៖ សំអឿន