ខឹងគោះទ្វារមិនបើក បុរសម្នាក់ចាក់សាំងដុតផ្ទះប្អូនស្រីបង្កើត

បុរសម្នាក់ បានចាក់សាំងដុតផ្ទះប្អូនស្រីបង្កើតរបស់ខ្លួន ប៉ុន្តែមិនបានសម្រេច ត្រូវសមត្ថកិច្ចឃាត់ខ្លួន បញ្ជូនទៅស្នងការដ្ឋាននគរបាលខេត្តមណ្ឌលគិរី។ ហេតុការណ៍នេះ បានកើតឡើងកាលពីយប់ថ្ងៃទី២៣ វិច្ឆិកា នៅភូមិពូហ៊ូង ឃុំចុងផ្លាស់ ស្រុកកែវសីមា ខេត្តមណ្ឌលគិរី។

តាមសម្ដីជនរងគ្រោះដែលមានឈ្មោះពៅ ពេជ្រ អាយុ ៣៨ឆ្នាំ បានឲ្យដឹងថា កន្លងមក បងប្រុសរបស់ខ្លួន តែងគំរាមកំហែងខ្លួនជាច្រើនដងមកហើយ តាំងពីឪពុកម្ដាយ បានស្លាប់មក។ នាងបញ្ជាក់ទៀតថា នៅពេលស្រវឹងម្ដងៗ បងប្រុសរបស់ខ្លួន តែងមកសុំនេះសុំនោះ បើមិនបានដូចបំណង តែងតែគំរាមប្រើអំពើហិង្សាផ្សេងៗ។ ជាក់ស្ដែង នៅយប់កើតហេតុ បងប្រុសរបស់ខ្លួន បានមកគោះទ្វារ ស្រែកឮៗ ទាំងមានកាន់កាំបិតនៅដៃផង។ ក្រោយខឹងមិនមានអ្នកបើកទ្វារឲ្យ បុរសជាបង បានយកសាំងពីម៉ូតូ ចាក់លើទ្វារផ្ទះ រួចដុតឆេះសន្ធោសន្ធៅ។

យ៉ាងណាក្ដី ក្រោយមានការអន្តរាគមន៍ទាន់ពេល ភ្លើងបានរលត់ មិនបង្កការខូចខាតដល់ផ្ទះនោះទេ។ ចំណែកបុរសបង្ក ដែលមានអាយុ ៤២ឆ្នាំ ត្រូវបានសមត្ថកិច្ចបញ្ចូនខ្លួនទៅស្នងការដ្ឋាននគរបាលខេត្ត និងកសាងសំណុំរឿងបញ្ជូនទៅតុលាការ៕

អត្ថបទ៖ រៀម សុខហេង