ខេត្តតាកែវប្រកាសផ្លាស់ប្តូរអភិបាលស្រុកចំនួន​២​

រដ្ឋបាលខេត្តតាកែវ បានរៀបចំពិធីប្រកាសផ្ទេរភារកិច្ច និងតែងតាំងអភិបាលស្រុកចំនួន២​ កាលពីថ្ងៃទី២៥ ខែវិច្ឆិកា ឆ្នាំ២០២៤។

ពិធីនេះចូលរួមជាអធិបតីដោយលោក​ យស ណាស៊ី ប្រធានក្រុមប្រឹក្សាខេត្ត និងលោក វ៉ី សំណាង អភិបាលនៃគណៈអភិបាលខេត្តតាកែវ និងមន្ត្រីនៃមន្ទីរចំណុះរដ្ឋបាលខេត្តជាច្រេីនរូបផងដែរ។​ ក្នុងពិធីប្រកាសនេះ​ដែរ​ពេលព្រឹក​ ប្រកាសលោក កៅ វគ្គសែល អភិបាលស្រុកត្រាំកក់​ ទៅទទួលតួនាទីថ្មី​ ជាអភិបាលស្រុកសំរោង ដោយឡែក​ពេលរសៀលថ្ងៃខែឆ្នាំដដែលលោក កេត ម៉ៅ អភិបាលស្រុកសំរោង​ ត្រូវបានផ្ទេរទៅជាអភិបាលស្រុកត្រាំកក់វិញ។

សូមបញ្ជាក់ដែរថា​ បេីយោងតាមអនុក្រឹត្យលេខ ១១០៩ អនុក្រ.តត ស្ដីពីការផ្ទេរភារកិច្ចមន្រ្តីរាជការ ត្រូវបានផ្ទេរភារកិច្ច លោក កៅ វគ្គសែល ឋានន្តរស័ក្ដិឧត្តមមន្រ្តី ថ្នាក់លេខ៦ ពី អភិបាលស្រុកត្រាំកក់ ឱ្យកាន់មុខតំណែងជា អភិបាលស្រុកសំរោង ថ្មី និងលោក កេត ម៉ៅ ឋានន្តរស័ក្ដិឧត្តមមន្រ្តី ថ្នាក់លេខ៣ ពីអភិបាលស្រុកសំរោង ឱ្យកាន់មុខតំណែង ជា អភិបាលស្រុកត្រាំកក់៕

​អត្ថបទ៖ វីរ: