ព័ត៌មានជាតិ

ពលរដ្ឋ ស្នើ មន្ត្រីជំនាញពាក់ព័ន្ធ ជួសជុលជង្ហុកលើផ្លូវ ២០០៤ រងការខូចខាតយូរហើយ និងបង្កការលំបាកដល់អ្នកដំណើរ

បានផុស

២ years មុន

នៅ

ថ្ងៃអង្គារ ២៤ ធ្នូ ២០២៤

ដោយ

ប្រជាពលរដ្ឋខណ្ឌសែនសុខ ស្នើ មន្ត្រីជំនាញពាក់ព័ន្ធ ជួយជួសជុលជង្ហុកលើផ្លូវ ២០០៤ ប្រវែងជាង ១០ ម៉ែត្រ ដែលរងការខូចខាតយូរហើយ ប៉ុន្តែមិនទាន់ឃើញមានអាជ្ញាធរមកជួសជុលនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងតាមបណ្ដោយផ្លូវ ២០០៤ ដែលរងការខូចខាតប្រវែងជាង ១០ ម៉ែត្រ នេះ ស្ថិតក្បែរស្ថានីយប្រេងឥន្ធនៈ ភីធីធី សង្កាត់អូរបែកក្អម ខណ្ឌសែនសុខ កំពុងបង្កការលំបាកក្នុងពេលធ្វើដំណើររបស់ប្រជាពលរដ្ឋ។

លោក សំ ថារ័ត្ន ប្រជាពលរដ្ឋខណ្ឌសែនសុខ បានប្រាប់ឲ្យ កម្ពុជាថ្មី ដឹងថា ផ្លូវជង្ហុកខាងលើនេះ រងការខូចខាតយូរគួរសមដែរហើយ ហើយចំណុចនេះគឺជាផ្លូវមានចរាចរណ៍មមាញឹក ដែលបង្កការលំបាករាល់ពេលធ្វើដំណើរឆ្លងកាត់ម្តងៗ។

ប្រជាពលរដ្ឋខណ្ឌសែនសុខ រូបនេះ បន្តថា គាត់ឧស្សាហ៍ឃើញមានអ្នកបើកបរម៉ូតូឆ្លងកាត់ តែងជិះធ្លាក់ចូលជង្ហុកនេះម្តងៗ ស្ទើរតែដួលទៅហើយ ទោះបីចំណុចនេះខូចជាង ១០ ម៉ែត្រ ក៏ពិតមែន ប៉ុន្តែជង្ហុកមានរាងជ្រៅ ដែលជាហេតុបង្កផលប៉ះពាល់ដល់ការធ្វើដំណើររបស់ប្រជាពលរដ្ឋ។

ដោយឡែក ប្រជាពលរដ្ឋម្នាក់ទៀត សុំមិនបញ្ចេញឈ្មោះ និងជាអ្នកដំណើរឆ្លងកាត់ជាប្រចាំ បានបញ្ជាក់ដែរថា គាត់តែងតែឆ្លងកាត់ចំណុចនេះ ជួបផលលំបាកគួរសមដែរ ដោយសារតែផ្លូវនេះជាផ្លូវធំ មានជង្ហុកជ្រៅ ធ្វើឲ្យរាល់ពេលធ្វើដំណើរជួបបញ្ហាស្ទើរតែដួលចូលរថយន្តថែមទៀត។

ប្រជាពលរដ្ឋដដែល បន្តថា ជង្ហុកខាងលើនេះ បើមើលពីចម្ងាយគឺមិនឃើញនោះទេ ទាល់តែពេលជិះឆ្លងកាត់ជិតដល់ទើបមើលឃើញ ដែលងាយនឹងអាចកើតមាននូវគ្រោះថ្នាក់ជាយថាហេតុនៅពេលណាមួយសម្រាប់រូបគាត់ផ្ទាល់ ក៏ដូចជាពលរដ្ឋឆ្លងកាត់តំបន់នេះ។

ទាក់ទិនចំពោះផ្លូវកំពុងខូចខាតនេះ កម្ពុជាថ្មី បានទំនាក់ទំនងទៅកាន់ លោក យឹម រ័ត្ន ចៅសង្កាត់អូរបែកក្អម តាមរយៈទូរស័ព្ទដៃ ចំនួន ០៧ ដង ហើយ ប៉ុន្តែមិនមានការឆ្លើយតបនោះឡើយ។

ពាក់ព័ន្ធបញ្ហានេះដែរ ប្រជាពលរដ្ឋ ក៏បានស្នើសុំ អាជ្ញាធរ និង មន្ត្រីជំនាញពាក់ព័ន្ធ សូមជួយស្ថាបនាផ្លូវដែលកំពុងរងការខូចខាតនេះផង ដើម្បីជួយសម្រួលផលលំបាករាល់ពេលធ្វើដំណើរ និងការពារកុំឲ្យកើតមាននូវគ្រោះថ្នាក់ណាមួយ៕

អត្ថបទ ៖ រដ្ឋា

Related Topics:ខណ្ឌសែនសុខ