កម្ពុជា-សិង្ហបុរី សហការគ្នាពង្រឹងលើកម្មសិទ្ធិឧស្សាហកម្ម

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) និងអង្គភាពកម្មសិទ្ធិបញ្ញាសិង្ហបុរី (IPOS) បានចុះហត្ថលេខាបន្តសុពលភាពនៃអនុស្សរណៈយោគយល់ ស្តីពីកិច្ចសហប្រតិបត្តិការផ្នែកកម្មសិទ្ធិឧស្សាហកម្មរវាងប្រទេសទាំងពីរឱ្យកាន់តែមានប្រសើរឡើង។

ការចុះហត្ថលេខា ដែលធ្វើឡើងតាមប្រព័ន្ធអនឡាញកាលពី​ទី២៣ ខែមករា ឆ្នាំ២០២៥  ដោយលោក ហែម វណ្ណឌី ដែលជារដ្ឋមន្រ្តី MISTI ដែលបង្ហាញពីការខិតខំប្រឹងប្រែងក្នុងការពង្រឹងការការពារកម្មសិទ្ធិបញ្ញា (IP) ក្នុងវិស័យឧស្សាហកម្មរបស់ប្រទេសទាំងពីរ ។

បើបយោងតាម MISTI  ការចុះហត្ថលេខាននេះជាការបន្តសុពលភាពលើកទី២ លើអនុស្សរណៈយោគយល់ដំបូង ដែលបានចុះហត្ថលេខាកាលពីឆ្នាំ២០១៥ និងបានបន្តសុពលភាពរយៈពេល៥ឆ្នាំម្តង។ អនុស្សរណៈនេះផ្តោតលើការលើកកម្ពស់ទំនាក់ទំនងសេដ្ឋកិច្ច និងគាំទ្រប្រព័ន្ធអេកូឡូស៊ីនវានុវត្តន៍របស់កម្ពុជា តាមរយៈការកសាងសមត្ថភាព ការការ​ពារកមុ្មសិទ្ធិបញ្ញា និងការអនុលោមតាមក្របខ័ណ្ឌអន្តរជាតិ។

កិច្ចសហប្រតិបត្តិការសំខាន់ៗក្រោមអនុស្សរណៈនេះរួមមាន ការបន្តចុះបញ្ជីឡើងវិញនូវប្រកាសនីយបត្រតក្កកម្មសិង្ហបុរីក្នុងប្រទេសកម្ពុជា កម្មវិធីបណ្តុះបណ្តាលពង្រឹងសមត្ថភាពមន្ត្រីកម្ពុជា និងការបន្តកិច្ចសហការដើម្បីកែលម្អអភិបាលកិច្ចកម្មសិទ្ធិបញ្ញា។ អនុស្សរណៈនេះក៏សម្រួលដល់ការប្រើប្រាស់ធនធានហិរញ្ញវត្ថុ និងបច្ចេកទេស ដើម្បីជំរុញប្រព័ន្ធចុះបញ្ជីប្រកាសនីយបត្រតក្កកម្ម និងគំនូរឧស្សាហកម្មនៅកម្ពុជាផងដែរ។

ពិធីចុះហត្ថលេខានេះបង្ហាញពីភាពជាដៃគូមួយទសវត្សរ៍រវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងអង្គភាពកម្មសិទ្ធិបញ្ញាសិង្ហបុរី ដែលឆ្លុះបញ្ចាំងពីចក្ខុវិស័យរួមគ្នារបស់ភាគីទាំងពីរ សម្រាប់នវានុវត្តន៍ និងការអភិវឌ្ឍវិស័យកម្មសិទ្ធិបញ្ញានៅក្នុងតំបន់។

លោក ហែម វណ្ណឌី បានមានប្រសាសន៍ថា៖« ​តាមរយៈការសហការជាផ្លូវការលើការងារ ដូចជាប្រកាស​នីយបត្រតក្កកម្ម គំនូរឧស្សាហកម្ម ការបណ្តុះបណ្តាល និងការចែករំលែកឧត្តមានុវត្តន៍ យើងបានពង្រឹងប្រព័ន្ធកម្មសិទ្ធិបញ្ញា និងជំរុញការការពារកម្មសិទ្ធិឧស្សាហកម្មនៅក្នុងប្រទេសទាំងពីរ។ កិច្ចសហប្រតិបត្តិនេះ មិនត្រឹមតែជួយសម្រួលដល់ការទទួលស្គាល់កម្មសិទ្ធិបញ្ញាទៅវិញទៅមកប៉ុណ្ណោះទេ តែក៏ជាការបញ្ជាក់ពីកិច្ចខិតខំប្រឹងប្រែងរួមគ្នាក្នុងការអភិវឌ្ឍសេដ្ឋកិច្ច ក្នុងបរិបទនៃការវិវត្តជឿនលឿនយ៉ាងឆាប់រហ័សផ្នែកបច្ចេកវិទ្យា»។

កាលពីថ្ងៃទី១៤ ខែមករា ឆ្នាំ២០២៥ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានសហការជាមួយអង្គការកម្មសិទ្ធិបញ្ញាពិភពលោក (WIPO) និងអង្គភាពកម្មសិទ្ធិបញ្ញាជប៉ុន (JPO) ដាក់ឱ្យដំណើរការសេវាកម្មចុះបញ្ជីអនឡាញសម្រាប់ប្រកាសនីយបត្រតក្កកម្ម វិញ្ញាបនបត្រម៉ូដែលមានអត្ថប្រយោជន៍ និងគំនូរឧស្សាហកម្ម។

«គំនិតផ្តួចផ្តើមនេះគាំទ្រដល់កិច្ចខិតខំប្រឹងប្រែងរបស់ក្រសួង ក្នុងការធ្វើឌីជីថលូបនីយកម្មសេវាសាធារណៈ និងជំរុញប្រព័ន្ធអេកូឡូស៊ីសម្រាប់ការអភិវឌ្ឍឧស្សាហកម្ម និងនវានុវត្តន៍។ កិច្ចសហការជាមួយអង្គភាពកម្មសិទ្ធិបញ្ញាសិង្ហបុរី នឹងរួមចំណែកបន្ថែមដល់ការលើកកម្ពស់សេវានេះ»។ នេះបើយោងតាម MISTI៕