កីឡា

ស៊ុយ ខន ប្រាប់ថា ឥឡូវលែងហានស្រមៃពានឯកត្តជន

បានផុស

១ year មុន

នៅ

ថ្ងៃចន្ទ ២៤ កុម្ភៈ ២០២៥

ដោយ

កីឡាករវាយផ្តាច់ជំនាញដៃឆ្វេងរបស់ក្រុមបញ្ជាការដ្ឋានអង្គរក្ស ស៊ុយ ខន លែងហានស្រមៃចង់បានពានរង្វាន់ឯកត្តជនដូចកាលពីមុនទៀតហើយ ដោយបានត្រឹមតែបង្ហាញសមត្ថភាពលើទីលានជួយឲ្យក្រុមទទួលបានជោគជ័យគឺគ្រប់គ្រាន់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស៊ុយ ខន បានក្លាយជាចំណែកដ៏សំខាន់ក្នុងការជួយក្រុមបញ្ជាការដ្ឋានអង្គរក្ស គ្រងជើងឯកលីគបាល់ទះកំពូលកម្ពុជា«តេជោលីគ»ពីរលើកជាប់គ្នាគឺឆ្នាំ២០២៤ និងឆ្នាំ២០២៥។ កីឡាកររូបនេះត្រូវបានអ្នកគាំទ្រមើលឃើញពីកម្រិតសមត្ថភាពលេចធ្លោតាមរយៈការប្រើដៃឆ្វេងក្នុងការវាយសេវា និងវាយផ្តាច់។

ទោះបីជាយ៉ាងណា រហូតដល់ពេលនេះ ស៊ុយ ខន មិនធ្លាប់បានឈ្នះពានរង្វាន់ឯកត្តជន និងមិនធ្លាប់ជាប់ជម្រើសជាតិកម្ពុជាឡើយ។ ជុំវិញរឿងនេះ កីឡាករបានប្រាប់ក្នុងបទសម្ភាស ក្រោយចប់តេជោលីគ កាលពីយប់ថ្ងៃអាទិត្យ ទី២៣ ខែកុម្ភៈ ឆ្នាំ២០២៥ ថា កាលពីមុនខ្លួនចង់ឈ្នះពានរង្វានឯកត្តជនរាល់ពេលប្រកួតក្នុងព្រឹត្តិការណ៍ផ្លូវការ ប៉ុន្តែខ្លួនស្គាល់សមត្ថភាពខ្លួនឯងច្បាស់ និងកម្ពស់ទាបដែលពិបាកក្នុងការប្រកួតប្រជែងជាមួយកីឡាករខ្ពស់ៗ។

ជាមួយគ្នានេះ នៅ ក្រុមជម្រើសជាតិ ជាទូទៅត្រូវការកីឡាករដែលមានកម្ពស់ខ្ពស់ៗទើបអាចប្រកួតប្រជែងជាមួយបរទេសបាន ដូច្នេះហើយទើបបានជាខ្លួនមិនធ្លាប់បានជាប់ជម្រើសជាតិកម្ពុជា។

ស៊ុយ ខន បានប្រាប់ថា ៖«ខ្ញុំដឹងខ្លួនឯងមានកម្ពស់ទាប អីចឹងរឿងតែមួយគត់ដែលខ្ញុំគិតគឺខំប្រឹងហ្វឹកហាត់ឲ្យខ្លាំងជាងអ្នកមានកម្ពស់ខ្ពស់ ហើយទទួលបានឱកាសលេងនៅលើទីលានដូចគេខ្ពស់។ ខ្ញុំគិតតែម្យ៉ាងគឺជួយក្រុមឲ្យទទួលបានជ័យជម្នះ ឈ្នះពានរង្វាន់រួមគ្នា។ ឥឡូវនេះមិនហានស្រមៃចង់ឈ្នះពានឯកត្តជនទេ»។