ថៃនឹងជួយ​ចំណាយទេសចរ ​ដើម្បីជំរុញទេសចរណ៍ក្នុងស្រុកនៅរដូវទាប

ក្រសួងទេសចរណ៍ និងកីឡាថៃ គ្រោងនឹងដាក់ចេញកញ្ចប់ឧបត្ថម្ភធន​ថ្មី ​ដែល​​រដ្ឋាភិបាល​ជួយចំណាយ​ប្រាក់ដល់អ្នកទេសចរថៃសម្រាប់​កន្លែង​ស្នាក់នៅ និង​អាហារ​ នៅ​ពេល​ពួកគេ​ធ្វើដំណើរកម្សាន្តក្នុងស្រុក​​ ​ដើម្បីជំរុញវិស័យ​ទេសចរណ៍​ក្នុងរដូវទាប។ នេះបើតាម​ការ​ចុះ​ផ្សាយ​របស់​កាសែត The Nation។

រដ្ឋមន្ត្រីរបស់​ក្រសួង​ លោក Sorawong Thienthong គ្រោងនឹងស្នើសុំថវិកា​​ចំនួន ៣,៥ ប៊ីលាន​បាត (១០៣ លាន​ដុល្លារ) ​ពីកញ្ចប់ថវិកាបន្ទាន់​របស់​រដ្ឋាភិបាល ដើម្បីផ្តល់ហិរញ្ញប្បទានដល់គម្រោង​ជំរុញទេសចរណ៍មួយ​នេះ។

លោក Sorawong បាននិយាយថា កម្មវិធី «Rao Thiew Duak Kan» ឬ «យើង​ដើរកម្សាន្ត​ទាំងអស់គ្នា» ជុំ​ថ្មី ​នឹងបង្កើនអត្រាឧបត្ថម្ភធនដល់អ្នកទេសចរដល់ ៥០ ភាគរយ ធៀន​នឹង​អត្រា ៤០ ភាគរយ កាលពីជុំ​មុន​។ ​

ជុំចាស់នៃកម្មវិធី «យើង​ដើរកម្សាន្ត​ទាំងអស់គ្នា» ត្រូវបានអតីត​រដ្ឋាភិបាល​របស់​លោក ប្រាយុទ្ធ ចាន់អូចា ដាក់ចេញ​ដើម្បីស្ដារវិស័យ​ទេសចរណ៍ពីវិបត្តិកូវីដ១៩ ដោយរដ្ឋាភិបាលជួយ​ចេញ​ថ្លៃបន្ទប់ស្នាក់នៅ និងអាហារ ដល់អ្នកទេសចរក្នុងស្រុកថៃប្រមាណ ៤០ ភាគរយ​។​

បើតាម​លោក Sorawong ​គម្រោងជុំថ្មីនេះនឹងផ្តល់ប័ណ្ណមួយលានសន្លឹកសម្រាប់ភ្ញៀវទេសចរថៃ។ បន្ទាប់ពីការចុះឈ្មោះដោយជោគជ័យ អ្នក​ទេសចរ​នឹងអាចប្រើប្រាស់ប័ណ្ណរបស់​ខ្លួន ដើម្បីទទួលបានការឧបត្ថម្ភ ៥០ ភាគរយ​ សម្រាប់តម្លៃបន្ទប់ស្នាក់នៅ និងតម្លៃអាហារ ចន្លោះពី​ខែឧសភា ដល់ខែកញ្ញា ឆ្នាំនេះ។

គួរគូស​បញ្ជាក់ថា​ រដូវទាបសម្រាប់វិស័យទេសចរណ៍ក្នុងប្រទេសថៃ គឺចាប់ផ្ដើម​ពីខែឧសភា ដល់ខែកញ្ញា។ ក្រសួង​សង្ឃឹម​ថា ​កញ្ចប់​ប្រាក់ឧបត្ថម្ភធន​​​នឹង​ជំរុញ​ឱ្យ​ប្រជាជន​ថៃ ​ធ្វើ​ដំណើរ​ និង​ចំណាយ​កាន់​តែ​ច្រើន ចំពេល​ដែល​សេដ្ឋកិច្ចថៃ​ដើរយឺតយ៉ាង ដោយសារតែបំណុលគ្រួសារខ្ពស់ ដែល​កាត់បន្ថយ​ការចំំណាយរបស់​ប្រជាជន​៕