កីឡា

លោក ឃឹម សុជាតិ និយាយពីវិន័យ និងការគ្រប់គ្រងក្លឹបគុនខ្មែរដូនតា

បានផុស

១ year មុន

នៅ

ថ្ងៃអង្គារ ៨ មេសា ២០២៥

ដោយ

លោក ឃឹម សុជាតិ ថាចំពោះវិន័យក្នុងការគ្រប់គ្រងរបស់លោកក្នុងក្លឹបគុនខ្មែរដូនតានេះកីឡាករ កីឡាការិនី ណាល្មើសដូចជាបាត់មុខពីការហ្វឹកហាត់គឺដកឈ្មោះចោលមិនឲ្យឡើងប្រកួតជាដាច់ខាតបើធ្ងន់ធ្ងរឈានដល់ដាក់បញ្ឈរជើងតែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃឹម សុជាតិ

ធ្លាប់តែឃើញលោក ឃឹម សុជាតិ ឡើងធ្វើអាជ្ញាកណ្ដាល ឬចៅក្រមតាមសង្វៀនផ្សេងៗ ប៉ុន្តែលោកក៏ជាគ្រូ និងកំពុងគ្រប់គ្រងសិស្សខ្ទង់ ៤០នាក់នៅក្លឹបគុនខ្មែរដូនតា។ លោកក៏ជាគ្រូម្នាក់ដែលកាច និងតឹងរ៉ឹងចំពោះសិស្សមួយរូបផងដែរ។

លោក ឃឹម សុជាតិ បានលើកឡើងថា ច្បាប់វិន័យនៅក្លឹបគុនខ្មែរដូនតានេះគឺសិស្សគុនគ្រប់រូបមិនអាចទៅណាមកណាដោយស្រេចតែចិត្តឯង គ្មានដំណឹង ឬគ្មានការស្នើសុំនោះឡើយ។ ការស្នាក់នៅ ការហូបចុក និងការហ្វឹកហាត់ត្រូវធ្វើតាមពេលវេលាដែលបានកំណត់ ចំពោះសិស្សណាមានរវល់ ឬឈឺ ត្រូវផ្ដល់ដំណឹងមកលោកហើយលោកផ្ទាល់ជម្រាបទៅថ្នាក់លើឲ្យដឹងបន្តទៀត។

ទិដ្ឋភាពសិស្សកំពុងហាត់

ការហ្វឹកហាត់ធ្វើឡើងពេញមួយសប្ដាហ៍ ៧ថ្ងៃ ដោយលក្ខណៈវិលជុំសម្រាប់អ្នកប្រកួតហើយអាចសម្រាកបានតាមការកំណត់របស់គ្រូ។ ចំណែកអ្នកមានឈ្មោះឡើងប្រកួតត្រូវចូលមកហាត់វិញ។ មួយថ្ងៃហាត់ ២ពេលគឺចាប់ពីម៉ោង ៦ ដល់ ១០ព្រឹក ចំណែកពេលថ្ងៃចាប់ពីម៉ោង ២ ដល់ ៥ ទើបចប់។ អ្នកដែលមានឈ្មោះប្រកួតតែមិនមកហាត់គឺមិនអនុញ្ញាតឲ្យឡើងប្រកួតឡើយហើយក្នុងករណីធ្ងន់ធ្ងរអាចនឹងដាក់បញ្ឈរជើងមួយខែជាដើម។

លោក ឃឹម សុជាតិ

ការហូបចុកស្នាក់នៅជាការទទួលបន្ទុកដោយម្ចាស់ក្លឹបផ្ទាល់តែម្ដង មានការលើកទឹកចិត្ត និងទំនុកបម្រុងសព្វគ្រប់ ដូច្នេះម្នាក់ៗគឺប្រឹងតែហ្វឹកហាត់ឡើងប្រកួតឲ្យអស់ពីសមត្ថភាពជូនថ្នាក់ដឹកនាំតែប៉ុណ្ណោះ។ ចំពោះលទ្ធផលចាញ់-ឈ្នះយ៉ាងណាជាកីឡា ប៉ុន្តែសុំឡើងទៅប្រកួតឲ្យអស់ពីសមត្ថភាព និងត្រៀមខ្លួនឲ្យបានល្អរាល់ការប្រកួត។

លោក ឃឹម សុជាតិ

បញ្ជាក់ដែរថា ក្លឹបគុនខ្មែរដូនតាជាក្លឹបថ្មី ប៉ុន្តែកីឡាករភាគច្រើនគឺផ្ទេរពីក្លឹបចាស់នាយកដ្ឋានអង្គរក្សរបស់លោក ស៊ន អេលីត។ កីឡាករល្បីឈ្មោះនៅក្លឹបនោះរួមមាន ចំរើន គុនខ្មែរ ភក្ដី គុនខ្មែរ សាន់ គុនខ្មែរ រស្មី គុនខ្មែរ សម្ឆស គុនខ្មែរ សំអាត គុនខ្មែរ និងកីឡាករជាច្រើនរូបទៀត។ ក្លឹបនេះគេដឹងថាជាក្លឹបចំណុះរបស់ស្ថានីយទូរទស្សន៍ថោន ដោយមានឯកឧត្ដម វ៉ា សុធា និងអ្នកគ្រប់គ្រងជាច្រើននាក់ទៀតជួយមើលការខុសត្រូវ៕

អត្ថបទដោយ៖ នួន ស៊ីណា

Related Topics:កីឡាប្រដាល់គុនខ្មែរ