គួរឲ្យបារម្ភ! ថៃ រកឃើញមនុស្សឆ្លងជំងឺឈាមខ្មៅថែមទៀត ខណៈ ៦៣៨នាក់ ជាប់ពាក់ព័ន្ធនឹងប្រភពចម្លង

ប្រទេសថៃកំពុងបារម្ភ ក្រោយមានករណីមនុស្សបាត់បង់ជីវិតដោយសារជំងឺឈាមខ្មៅ (Anthrax) លើកដំបូងក្នុងរយៈពេល៣ទសវត្សរ៍ ហើយពេលនេះមិត្តភក្តិរបស់អ្នកស្លាប់ក៏ឆ្លងជំងឺនេះដែរ ខណៈមនុស្សរហូតដល់ទៅ៦៣៨នាក់ មានជាប់ពាក់ព័ន្ធនឹងប្រភពចម្លង។ នេះបើតាមការចុះផ្សាយរបស់ Bangkok Post កាលពីថ្ងៃទី២ខែឧសភាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធបញ្ហានេះ លោក Boonyakrit Pinprasong អគ្គនាយករងនៃនាយកដ្ឋានអភិវឌ្ឍបសុសត្វ ​(DLD) បញ្ជាក់ថា អ្នកជំងឺដែលស្លាប់គឺបុរសវ័យ៥៣ឆ្នាំ ជាអ្នកស្រុក Don Tan នៃខេត្ត Mukdahan។ គាត់បានឆ្លងជំងឺឈាមខ្មៅ ក្រោយប៉ះពាល់និងទទួលទានសាច់គោដែលមានផ្ទុកមេរោគ Bacillus ក្នុងអំឡុងពិធីបុណ្យសាសនាមួយ។ គាត់មានចេញរោគស​ញ្ញាឡើងកន្ទួលស្បែក ដំបៅនៅដៃស្តាំនិងហើមក្លៀកខាងស្តាំ ហើយឥឡូវ មិត្តភក្តិរបស់គាត់ក្នុងខេត្តតែមួយ ក៏ចេញរោគសញ្ញាដូចគ្នានេះដែរ។

ក្រៅពីមិត្តភក្តិរបស់គាត់ នៅមានជនទី៣ម្នាក់ទៀត ដែលចេញរោគសញ្ញាគួរឲ្យសង្ស័យ ប៉ុន្តែគេមិនទាន់បញ្ជាក់ថាតើគាត់ពិតជាឆ្លងជំងឺឈាមខ្មៅមែនឬក៏អត់នោះទេ។ យ៉ាងណា អាជ្ញាធរសុខាភិបាលថៃ កំពុងតាមដានមនុស្សរហូតដល់ទៅ៦៣៨នាក់ ដែលបានចូលរួមក្នុងពិធីបុណ្យសាសនា ហើយជាប់ពាក់ព័ន្ធនឹងប្រភពចម្លងរោគ។

ដោយសារតែក្តីបារម្ភ ខេត្តនានានៅជិត Mukdahan ដូចជា Amnat Charoen, Kalasin និង Nakhon Phanom បានចាត់វិធានការប្រុងប្រយ័ត្នខ្ពស់ ហើយព្រមានឲ្យពលរដ្ឋកុំទទួលទានសាច់គោឆៅឲ្យសោះ។

សូមជម្រាបថា ឈាមខ្មៅ គឺជាជំងឺឆ្លងធ្ងន់ធ្ងរដែលបណ្តាលមកពីបាក់តេរី Bacillus។ វាកើតឡើងដោយធម្មជាតិនៅក្នុងដី ហើយជាទូទៅប៉ះពាល់ដល់សត្វក្នុងស្រុក និងសត្វព្រៃ។

មនុស្សអាចឆ្លងជំងឺនេះតាមរយៈការប៉ះពាល់ផ្ទាល់ឬដោយប្រយោលជាមួយសត្វឈឺ ហើយរោគ​សញ្ញាជំងឺនេះមានដូចជាចេញពងបែក​តូចៗ ឈឺក្បាល រាគ​ ​និងដង្ហើម​ខ្លី ហើយរោគសញ្ញានឹងចេញក្រោយការឆ្លង២ខែ។ បើមិនមានការព្យាបាលទាន់ពេលទេ មនុស្សអាចស្លាប់បាន។

ប្រទេស​ថៃ​បាន​រាយការណ៍ពី​ករណី​ឆ្លង​ជំងឺឈាមខ្មៅ​លើ​មនុស្ស​លើក​ចុង​ក្រោយបំផុត​ក្នុង​ឆ្នាំ២០១៧ ដោយឆ្លងមនុស្ស​ពីរ​នាក់ ប៉ុន្តែមិន​ឈានដល់បាត់បង់ជីវិតទេ៕

អត្ថបទ៖ សុខ សុវណ្ណ

ចុចអាន៖ ថៃ បារម្ភការរាលដាលជំងឺឈាមខ្មៅ ក្រោយមានអ្នកស្លាប់ ព្រោះបរិភោគសាច់គោ ផ្ទុកមេរោគ