កីឡា

កីឡាករអេស្ប៉ាញ Mario ចាត់ទុក កម្ពុជា ជាផ្ទះទី២របស់ខ្លួន

បានផុស

១ ខែ មុន

នៅ

ថ្ងៃសុក្រ ១៦ ឧសភា ២០២៥

ដោយ

កីឡាករអេស្ប៉ាញ Mario Alvarez បានពេញចិត្តចំពោះការប្រកួតរបស់ខ្លួនយ៉ាងខ្លាំងនៅលើទឹកដីប្រទេសកម្ពុជារហូតរូបចាត់ទុកដូចជាផ្ទះទី២របស់ខ្លួន។

កាលពីថ្ងៃទី១៤ ខែឧសភា ឆ្នាំ២០២៥ Mario បានចាញ់សន្លប់ក្រោមកណ្តាប់ដៃរបស់កីឡាករ ពេជ្រ សម្បត្តិ ក្នុងទឹកទី២សម្រាប់ការប្រកួតដណ្តើមខ្សែក្រវាត់។ បរាជ័យនេះត្រូវបានរូបគេចាត់ទុកជាការចាញ់ក្រោមសមត្ថភាពរបស់អ្នកខ្លាំងពិតប្រាកដ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រឹកថ្ងៃទី១៦ ខែឧសភា ឆ្នាំ២០២៥ Mario Alvarez បានលើកឡើងថា ៖«សូមទោសកម្ពុជា។ ពេលនេះ ខ្ញុំបានចាញ់ជើងឯកពិតប្រាកដគឺកីឡាករ ពេជ្រ សម្បត្តិ។ នេះជាលើកដំបូងសម្រាប់ខ្ញុំប្រកួតប្រើហ្គង់ដៃចេញម្រាម MMA។ វាជាពិតបទពិសោធដ៏ចម្លែកថ្មីមួយ ប៉ុន្តែខ្ញុំនៅតែចង់ប្រកួតនៅទីនេះបន្តទៀត។ កម្ពុជាគឺជាផ្ទះទី២របស់ខ្ញុំ»។

កីឡាករអេស្ប៉ាញ Mario Alvarez ជាជើងខ្លាំងម្នាក់ធ្លាប់បានឈ្នះ ឈុត សេរីវ៉ាន់ថង ពីរដង និង ឃីម បូរ៉ា ម្តង ប៉ុន្តែរូបគេធ្លាប់ចាញ់ពិន្ទុ មាស ប៊ុនថេន នៅពេលរូបគេមកប្រកួតនៅកម្ពុជាលើកទី១កាលពីឆ្នាំ២០២៤ និងមកប្រកួតនៅកម្ពុជាលើកទី២បានចាញ់ ពេជ្រ សម្បត្តិ ដោយសន្លប់ក្នុងទឹកទី២។

រាល់ការមកប្រកួតនៅប្រទេសកម្ពុជារបស់ Mario បានទទួលការរាក់ទាក់យ៉ាងកក់ក្តៅពីម្ចាស់ផ្ទះកម្ពុជា និងអ្នកគាំទ្រយ៉ាងច្រើនកុះករបានស្រឡាញ់ចូលចិត្តកីឡាកររូបនេះ។ តាមការគាំទ្រ និងការទទួលយ៉ាងកក់ក្តៅបែបនេះបានធ្វើឲ្យរូបគេពេញចិត្តយ៉ាងខ្លាំង។

ក្រោយចប់ការប្រកួត Mario និងកីឡាករអេស្ប៉ាញផ្សេងទៀតបានដើរកម្សាន្តនៅក្នុងទីក្រុងភ្នំពេញដូចជានៅមុខព្រះរាជវាំង ជិះទូកនៅទន្លេសាបមុខព្រះរាជវាំង និងសារមន្ទីរជាតិជាដើម ហើយរូបគេទទួលម្ហូបខ្មែរជាច្រើន៕

អត្ថបទ៖ វីរបុត្រ

Related Topics:កីឡាប្រដាល់គុនខ្មែរ