ព័ត៌មានជាតិ

អគ្គមេបញ្ជាការទ័ព៖ សមយុទ្ធនាគមាសបានក្លាយជានិមិត្តរូបនៃកិច្ចសហប្រតិបត្តិការមិនអាចបំបែកបានរវាងកម្ពុជា-ចិន

បានផុស

១ year មុន

នៅ

ថ្ងៃសៅរ៍ ១៧ ឧសភា ២០២៥

ដោយ

អគ្គមេបញ្ជាការកងយុទ្ធពលខេមរភូមិន្ទ នាយឧត្តមសេនីយ៍ វង្ស ពិសេន បានលើកឡើងថាបន្ទាប់ពីបានធ្វើសមយុទ្ធរួមគ្នា៧លើក សមយុទ្ធនាគមាសបានក្លាយជានិមិត្តរូបនៃកិច្ចសហប្រតិបត្តិការដែលមិនអាចបំបែកបានរវាងប្រទេស និងកងទ័ពកម្ពុជា ចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបើកសមយុទ្ធនាគមាសលើកទី៧ ឆ្នាំ២០២៥ នៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជំរាយ ស្រុកសាមគ្គីមានជ័យ ខេត្តកំពង់ឆ្នាំង ព្រឹកថ្ងៃទី១៧ ខែឧសភា ឆ្នាំ២០២៥ នាយឧត្តមសេនីយ៍ វង្ស ពិសេន បានថ្លែងថា ការធ្វើសមយុទ្ធនាគមានឆ្នាំ២០២៥ គឺដើម្បីអភិវឌ្ឍឱ្យកាន់តែស៊ីជម្រៅនូវទំនាក់ទំនងជាដៃគូកិច្ចសហប្រតិបត្តិការ ពង្រឹងទំនុកចិត្តនយោបាយកម្រិតខ្ពស់ ផ្លាស់ប្ដូរបទពិសោធន៍ ទស្សនៈ សម្របសម្រួលសហការរវាងកងទ័ពកម្ពុជា ចិន ក្នុងគោលបំណងថែរក្សាសន្ដិភាពតំបន់ លើកកម្ពស់ និងស្ថាលទ្ធភាពប្រយុទ្ធជាក់ស្ដែងនៃកងកម្លាំងផងដែរ។

លោកបញ្ជាក់ថាពេលនេះសមយុទ្ធនាគមាសបានក្លាយជានិមិត្តរូបនៃកិច្ចសហប្រតិបត្តុការមិនអាចបំបែកបានរវាងកងទ័ពទាំងពីរហើយ។

លោកថា៖ «សមយុទ្ធនេះបានធ្វើឱ្យកងទ័ពយើងបង្កើននូវទំនាក់ទំនងល្អ បង្កើនចំណងសាមគ្គីភាព ចេះសម្របសម្រួល អាចរស់នៅ និងធ្វើការរួមគ្នាជាមួយជាតិសាសន៍ដ៏ទៃក្នុងពេលធ្វើប្រតិបត្តិការរួមដើម្បីឆ្លើយតបយ៉ាងមានប្រសិទ្ធភាព និងទាន់ពេលវេលាក្នុងប្រតិបត្តិការទាំងថ្នាក់ជាតិ-អន្តរជាតិ ក្នុងគោលបំណងចូលរួមទប់ស្កាត់ និងដោះស្រាយបញ្ហាប្រឈមនានា ដែលអាចកើតឡើងជាយថាហេតុ»។

កម្ពុជា-ចិនបានបង្កើតទំនាក់ទំនងការទូតជាមួយគ្នាអស់រយៈពេល៦៧ឆ្នាំហើយ និងត្រូវបានពង្រឹងជាបន្តបន្ទាប់រហូតឈានដល់ កិច្ចសហប្រតិបត្តិការភាពជាដៃគូរយុទ្ធសាស្ត្រគ្រប់ជ្រុងជ្រោយ។ សមិទ្ធផលនេះត្រូវបានអគ្គមេបញ្ជាការទ័ពកម្ពុជាថាបានឆ្លុះបញ្ចាំងពីឆន្ទៈនយោបាយ មនោសញ្ចេតនាក្នុងនាមជាបងប្អូន ជាមិត្តដែកថែប អមតៈ រួមសុខរួមទុក្ខ ស្រលាញ់គ្នាក្នុងគ្រាក្រលំបាក និងជាដៃគូដ៏ល្អ។

គួរឱ្យដឹងផងដែរថា សមយុទ្ធនាគមាសឆ្នាំ២០២៥ ដែលធ្វើឡើងរវាងកងទ័ពកម្ពុជា និងចិន រៀបចំពីថ្ងៃទី១៤ ដល់ថ្ងៃទី១៩ ខែឧសភា ឆ្នាំ២០២៥ ក្រោមប្រធានបទ ប្រតិបត្តុការប្រឆាំងភេរវកម្មរួមគ្នា និងការងារសង្គ្រោះមនុស្សធម៌» មានអ្នកចូលរួមជាង២ពាន់នាក់ ក្នុងនោះចិនជាង៨០០នាក់។ សមយុទ្ធនេះធ្វើឡើងធំជាងឆ្នាំមុនៗដោយបានចែកជា២ផ្នែក ដោយ១នៅសមយុទ្ធលើគោក និងអាកាស នៅមជ្ឈមណ្ឌលហ្វឹកហ្វឺនអាវុធហត្ថភ្នំជំរាយ ខេត្តកំពង់ឆ្នាំ និងទី២ ជាសមយុទ្ធសមុទ្រនិងការអាកាសធ្វើនៅខេត្តព្រះសីហនុ៕