ពូទីន អះអាងថា រុស្ស៊ី មានអាវុធនុយក្លេអ៊ែរ ទំនើបជាងគេលើលោក

ថ្លែងក្នុងកិច្ចប្រជុំស្តីពីកម្មវិធីសព្វាវុធជាតិរបស់រដ្ឋាភិបាលទីក្រុងមូស្គូ ប្រមុខវិមានក្រឹមឡាំង វ្ល៉ាឌីមៀរ ពូទីន អះអាងថា រុស្ស៊ីជាប្រទេសមានអាវុធនុយក្លេអ៊ែរទំនើបជាងគេនៅលើពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT កាលពីថ្ងៃពុធទី១១ខែមិថុនាឆ្នាំ២០២៥ថា ក្នុងកិច្ចប្រជុំនោះ លោក ពូទីន បានលើកឡើងសាជាថ្មី អំពីសមត្ថភាពនុយក្លេអ៊ែររបស់ប្រទេស ក្នុងវិស័យការពារជាតិ ដោយបញ្ជាក់ថា ភាគហ៊ុននៃសព្វាវុធទំនើបនៅក្នុងអាវុធនុយក្លេអ៊ែររបស់រុស្ស៊ីគឺមានចំនួន ៩៥%។ នេះគឺជាតួលេខខ្ពស់បំផុតនៅទូទាំងពិភពលោក។

លោក ពូទីន និយាយថា រុស្ស៊ីមានអាវុធនុយក្លេអ៊ែរទំនើបបំផុតនៅក្នុងពិភពលោក ដោយធានាបាននូវអធិបតេយ្យភាពរបស់ប្រទេស និងតុល្យភាពអំណាចពិភពលោក។

យោងតាមមេដឹកនាំវិមានក្រឹមឡាំង, ទីក្រុងមូស្គូមិនគួរផ្តោតតែលើអាវុធនុយក្លេអ៊ែរប៉ុណ្ណោះទេ ប៉ុន្តែរដ្ឋាភិបាលក៏គួរតែបង្កើតកម្មវិធីអាវុធដ៏យូរអង្វែងមួយ ដែលផ្តោតលើប្រព័ន្ធអាវុធទំនើបបំផុតប្រភេទផ្សេងៗ និងផ្អែកលើបទពិសោធន៍ដែលទទួលបានក្នុងអំឡុងពេលមានជម្លោះនៅប្រទេសអ៊ុយក្រែន។

មីស៊ីលអន្តរទ្វីប Satan II ឬគេស្គាល់ថា RS-28 Sarmat ត្រូវរុស្ស៊ីអួតថា ជាអាវុធនុយក្លេអ៊ែរសាហាវបំផុតលើពិភពលោក ដែលជាមីស៊ីលដ៏អស្ចារ្យគ្មានអ្វីបញ្ឈប់បាន ហើយមានសមត្ថភាពបំពាក់ក្បាលគ្រាប់នុយក្លេអ៊ែរ អាចវាយប្រហារទឹកដីអាមេរិកឬទ្វីបអឺរ៉ុប យ៉ាងលឿនមិននឹកស្មានដល់។

Satan II ហោះក្នុងល្បឿនកំពូល ៧គីឡូម៉ែត្រក្នុងមួយវិនាទី។ វាមានប្រវែង៣៥ម៉ែត្រ ទម្ងន់២០៨តោន ជាមួយរយៈចម្ងាយយ៉ាងតិច ១៨ ០០០គីឡូម៉ែត្រ។

កាលពីចុងឆ្នាំមុន លោកពូទីន បានចេញបញ្ជាឲ្យរុស្ស៊ីសម្រុកផលិតមីស៊ីលប្រភេទនេះ ដើម្បីត្រៀមធ្វើសង្គ្រាមជាមួយបណ្តាប្រភេទលោកខាងលិច ព្រោះតែភាពតានតឹងចេះតែកើនឡើងពីមួយថ្ងៃទៅមួយថ្ងៃ៕

អត្ថបទ៖ សុខ សុវណ្ណ

ចុចអាន៖ ពូទីន អនុម័ត​គម្រោងក្លាយ​ខ្លួន​ជា​​មហាអំណាច​ដែន​សមុទ្រ​នៅ​ឆ្នាំ​២០៥០