ពូទីន អនុម័ត​គម្រោងក្លាយ​ខ្លួន​ជា​​មហាអំណាច​ដែន​សមុទ្រ​នៅ​ឆ្នាំ​២០៥០

ប្រធានាធិបតីរុស្ស៊ី វ្ល៉ាឌីមៀរ ពូទីន បានអនុម័តយុទ្ធសាស្ត្ររយៈពេលវែងមួយ ដើម្បីកែលម្អ​កងកម្លាំងជើងទឹករបស់​ក្រុង​មូស្គូ ក្នុងគោលបំណងបង្កើតអំណាចដែនសមុទ្រ​នៅឆ្នាំ​២០៥០។ នេះ​បើ​យោង​តាម​​អ្នក​នាំពាក្យ​វិមាន​​ក្រឹមឡាំង លោក Nikolai Patrushev កាលពីថ្ងៃអាទិត្យ​ទី​៩ខែ​មិថុនា។

ផែនការថ្មីនេះ មាន​ឈ្មោះ​ថា «យុទ្ធសាស្រ្តសម្រាប់ការអភិវឌ្ឍនៃកងទ័ពជើងទឹករុស្ស៊ីរហូតដល់ឆ្នាំ​២០៥០» ដែល​បង្ហាញពីកិច្ចខិតខំប្រឹងប្រែងទំនើបកម្មប្រកបដោយមហិច្ឆតា ដោយ​នឹងផ្លាស់ប្តូររចនាសម្ព័ន្ធ សមត្ថភាព និងការឈានទៅដល់​កម្រិត​សកលលោកនៃកងនាវាចររុស្ស៊ី។ យោងតាមលោក Patrushev គំនិតផ្តួចផ្តើមនេះឆ្លុះបញ្ចាំងពីការសង្កត់ធ្ងន់របស់វិមានក្រឹមឡាំងលើផែនការយុទ្ធសាស្រ្តរយៈពេលវែង ក្នុងការប្រឈមមុខនឹងការវិវត្តនៃការគំរាមកំហែងជាសកល។

ទោះបីជាមានការខាតបង់ក្នុងអំឡុងពេលជម្លោះដែលកំពុងបន្តនៅក្នុងប្រទេសអ៊ុយក្រែនក៏ដោយ ប៉ុន្តែបច្ចុប្បន្នរុស្ស៊ីនៅតែរក្សាបាននូវកងនាវាចរធំជាងគេ​លំដាប់​ទីបីរបស់ពិភពលោក ដោយតាមពីក្រោយតែសហរដ្ឋអាមេរិក និងចិនប៉ុណ្ណោះ។ កងនាវារបស់រុស្ស៊ី​មាននាវាមុជទឹកចំនួន ៧៩​គ្រឿង​ក្នុង​នោះ​មាន​នាវាមុជទឹកនុយក្លេអ៊ែរ ១៤​គ្រឿង និងនាវាចម្បាំងលើផ្ទៃដីជាង ២២០​គ្រឿង។ កងនាវាចរភាគខាងជើង ដែលមានទីស្នាក់ការកណ្តាលនៅ​ទីក្រុង Severomorsk បន្តបម្រើជាស្នូលនៃអំណាចកងទ័ពជើងទឹករបស់ប្រទេស។

ការអនុម័តយុទ្ធសាស្ត្រនេះ កើតឡើងនៅពេលដែលរុស្ស៊ីកំពុងបង្កើនការចំណាយលើវិស័យការពារជាតិដល់កម្រិតដែលមិន​ធ្លាប់​មាន​គិត​ចាប់តាំងពីសង្គ្រាមត្រជាក់មក។ ខណៈពេលដែលព័ត៌មានលម្អិតអំពីលទ្ធកម្មមិនត្រូវបានបង្ហាញ អ្នកវិភាគរំពឹងថា ការផ្តោតសំខាន់​នឹងរួមបញ្ចូលការធ្វើទំនើបកម្មកងនាវាមុជទឹក ការទិញនាវាចម្បាំង និងនាវាពិឃាតជំនាន់ថ្មី ព្រម​ទាំង​ការពង្រឹងសមត្ថភាពនៅតំបន់អាក់ទិក និងផ្លូវទឹកយុទ្ធសាស្ត្រផ្សេងទៀត។

លោក Patrushev បានសង្កត់ធ្ងន់ថា ផែនការនេះមានគោលបំណង​ជំរុញ​ឲ្យ​​​រុស្ស៊ី​ត្រៀមខ្លួនសម្រាប់«បញ្ហាប្រឈមសកល និងក្នុងតំបន់នាពេលអនាគតនៅ​លើ​ផ្ទៃ​សមុទ្រ»។ លោកបានពណ៌នាអំពីយុទ្ធសាស្ត្រនេះថាជាធាតុផ្សំដ៏សំខាន់នៃគោលលទ្ធិការពារដ៏ទូលំទូលាយរបស់វិមានក្រឹមឡាំង ដោយពង្រឹងតួនាទីរបស់ខ្លួន​ក្នុងនាមជាតួអង្គដែនសមុទ្រ​ដ៏​សំខាន់​ក្នុង​សកលលោក៕

ដោយ៖ ឈាង