វប្បធម៌ ជំនឿ

ពាងស្រាបុរាណខេត្តរតនគិរី អាយុកាលរាប់ពាន់ឆ្នាំ ផ្សារភ្ជាប់ពិធីសែនព្រេននៅតាមភូមិស្រុក

បានផុស

១២ ខែ មុន

នៅ

ថ្ងៃព្រហស្បតិ៍ ៣ កក្កដា ២០២៥

ដោយ

ស្រាពាង ជាប្រភេទស្រាម្យ៉ាងដែលផលិតដោយជនជាតិដើមភាគតិច តាំងពីបុរាណកាលមក។ ស្រាពាង ជាឈ្មោះស្រាម្យ៉ាងមានរសជាតិផ្អែម បិតពីអង្ករ និងអង្កាម ស្រកក្នុងពាងទុកនៅតាមផ្ទះជនជាតិដើមភាគតិចសម្រាប់ពិធីសែនព្រេនឲ្យខ្មោចពេលឈឺម្ដងម្កាល។ ពាងស្រា មាន ២ ប្រភេទ គឺ ពាងស្រាបុរាណដែលផលិតក្នុងប្រទេសកម្ពុជា និងពាងស្រាសម័យថ្មី ផលិតនៅរោងចក្រប្រទេសវៀតណាម។ ជនជាតិដើមភាគតិច ស្ទើរតែគ្រប់ផ្ទះ តែងតែមានពាងនេះ ដើម្បីទុកបិតស្រា តជំនាន់ ដោយកាលពីមុនពុំមានប្រភេទស្រាផ្សេងក្រៅពីនេះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក រាំង អារួង ជាជនជាតិដើមភាគតិចគ្រឹង អាយុ ៥៤ ឆ្នាំ បានរៀបរាប់ថា កាលពីគាត់នៅកំលោះ នៅមុនរបបប៉ុលពត មានរោងចក្រផលិតពាងស្រាមួយ នៅមុំឃុំបាក់កាឡាន ស្រុកវើនសៃ ខេត្តរតនគិរី។ ម្តាយឪពុកលោកបានទៅទិញយកមកប្រើប្រាស់ មានសម្បុរខ្មៅ រូបរាងធំៗ រូបរាងខ្មៅ ពីព្រោះទំហំផ្ទុកអង្ករ ១ កាផា ទៅ ២ កាផា បិតតែមួយពាង ពេលកម្មវិធីក្នុងគ្រួសារ ឬ ផឹកមួយភូមិ ចំនួន ២ ទៅ ៣ ថ្ងៃ ទើបសាបរសជាតិស្រា។

លោក សេង ពេជ្រ ជាម្ចាស់ភូមិអភិរក្សពាងបុរាណ ដែលស្ថិតនៅភូមិកាទៀង ឃុំល្បាំង ២ ស្រុកលំផាត់ ខេត្តរតនគិរី បានឲ្យដឹងថា ពាងបុរាណនេះ ជាតំណាងអត្តសញ្ញាណជនជាតិដើមភាគតិចភូមិភាគឦសាន ខេត្តរតនគិរី។

លោកបន្តថា កន្លែងរបស់លោកមានការដាក់តាំងនេះ មានពាង ២ ប្រភេទ គឺ ពាងខ្នាតធំ និងពាងតូច សម្រាប់សែនអមគ្នា នៅពេលរៀបចំពិធីបុណ្យធំៗ បើគិតទៅដល់អាយុរបស់ពាង ចាប់ពី ៦០០ ៧០០ ៣០០ ឆ្នាំ។

លោកបន្តទៀតថា ពេលលោកចុះទៅតាមភូមិ ឃើញថាជាវត្ថុបុរាណ ក៏ស្នើសុំម្ចាស់ពាងយកទៅទុកដាក់បង្ហាញសាធារណជនចូលទស្សនានៅភូមិរបស់លោក។ បើតាមការស៊ើបសួរប្រវត្តិរឿងរ៉ាវពាងទាំងនេះ ជនជាតិដើមភាគតិចក្នុងខេត្តរតនគិរី ពាងទាំងអស់នេះរក្សាទុកនៅតាមផ្ទះស្លាប់មនុស្ស ៥ ,៦, ៧, ៨, តំណរបស់មនុស្សដែលបានស្លាប់ ហើយពាងនេះប្រមូលពីស្រុកអូរជុំ វើនសៃ តាវែង។ បច្ចុប្បន្ននេះ ត្រូវបានរក្សាទុកមានចំនួនសរុប ៩ ពាង និងមានពាងមួយចំនួនទៀត បែកបាក់ខ្លះ ដោយចាស់ខូច។ នៅក្នុងពិធីធំៗ ចាស់ទុំក្នុងភូមិ ប្រើពាងធំអមជាមួយឆ្នាំងបុរាណសម្រាប់ចាក់ទឹក បន្សាបជាតិពុលផ្សេងៗ ដើម្បីសែនព្រេនក្នុងពិធី ហើយមេកន្ទ្រាញដួសទឹកចាក់ចូលក្នុងពាងស្រា បន្ទាប់មកគាត់វ៉ឺតជាមួយបំពង់ទុយោ។ រូបរាងសណ្ឋានពាងធ្វើពីដីដុត សម្រាប់ជនជាតិដើមភាគតិច តាមជំនឿជាវត្ថុតំណាងឲ្យព្រះរបស់ខ្លួនសម្រាប់គោរពបូជា តែងតែយកមកបិតស្រា កាប់គោ ក្របី មាន់ទា ជ្រូក នៅតាមកំណត់ឆ្នាំដែលត្រូវសែនក្នុងពិធីផ្សេង ដើម្បីសុំសេចក្តីសុខ ភាពរីកចម្រើន ឲ្យរួចពីទុក្ខភ័យ អន្តរាយផ្សេងៗ នៅក្នុងផ្ទះតាមសហគមន៍នីមួយៗ។ ការសែនរបស់ទាំងអស់នេះទៀតសោត មានការច្រូចឈាមសត្វនឹងស្រាពាងនេះ ទើបស្នើសុំទៅកាន់ព្រលឹងដូនតាស័ក្ដិសិទ្ធិដែលនៅតាមបន្តរហូតមកដល់សព្វថ្ងៃនេះ៕

អត្ថបទ ៖ ចាប

សូមទស្សនាវីដេអូខាងក្រោម ៖