ព័ត៌មានជាតិ

រដ្ឋមន្ត្រីអប់រំលើកទឹកចិត្តគ្រូ និង សិស្សត្រូវតែចេះប្រើ Ai ដើម្បីលើកកម្ពស់គុណភាពការរៀន និងការបង្រៀន

បានផុស

១១ ខែ មុន

នៅ

ថ្ងៃព្រហស្បតិ៍ ១០ កក្កដា ២០២៥

ដោយ

លោក បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាបានលើកទឹកចិត្តដល់លោកគ្រូ អ្នកគ្រូ និងសិស្សានុសិស្ស ត្រូវតែចេះប្រើប្រាស់ បញ្ញាសិប្បនិម្មិត (AI) ប្រកបដោយការទទួលខុសត្រូវខ្ពស់ដើម្បីលើកកម្ពស់គុណភាពការរៀននិងការបង្រៀនឱ្យកាន់តែប្រសើរឡើងថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីសម្ពោធជាផ្លូវការអគារសិក្សាថ្មីនៃសាលាចំណេះទូទៅអន្តរជាតិនិងពិធីបញ្ចុះបឋមសិលាបើកការដ្ឋានសាងសង់អគារសិក្សាថ្មីនៃសាលាអន្តរជាតិបាត់ដំបង ខេត្តបាត់ដំបងនៅថ្ងៃទី១០កក្កដានេះ លោកបណ្ឌិតសភាចារ្យ បានលើកឡើងថា បច្ចេកវិទ្យា AI នេះនឹងជួយឱ្យការសិក្សារៀនសូត្ររបស់សិស្សានុសិស្សកាន់តែមានភាពងាយស្រួលដោយអាចរៀនពីចម្ងាយបាន ឬអាចស្វ័យសិក្សាដោយខ្លួនឯងបានគ្រប់ពេលវេលា និងគ្រប់ទីកន្លែង។

ប៉ុន្តែក្រសួងអប់រំនៅតែលើកទឹកចិត្តឱ្យប្រើប្រាស់បច្ចេកវិទ្យានេះប្រកបដោយការទទួលខុសត្រូវខ្ពស់ ទោះបីជាវាមានអត្ថប្រយោជន៍ច្រើនក៏ដោយ។ ព្រោះថា ការអប់រំក្នុងយុគសម័យបញ្ញាសិប្បនិម្មិត (AI)នេះទាមទារឱ្យការអប់រំមានការប្រែប្រួល និងសម្របខ្លួនទៅនឹងបច្ចេកវិទ្យាថ្មីៗ។

យ៉ាងណាក៏ដោយ លោក បណ្ឌិតសភាចារ្យ ឧបនាយករដ្ឋមន្ត្រីក៏បានក្រើនរំលឹកឱ្យសាលារៀនត្រូវគិតគូរពីការដាក់បញ្ចូលភាសាខ្មែរនិងខ្លឹមសារបេតិកភណ្ឌជាតិទៅក្នុងកម្មវិធីសិក្សារបស់ខ្លួនផងដែរ។

លោក បណ្ឌិតសភាចារ្យ ឧបនាយករដ្ឋមន្ត្រីបានបញ្ជាក់ថា «ខេត្តបាត់ដំបង គឺជាខេត្តមួយដែលសម្បូរទៅដោយបេតិកភណ្ឌ វប្បធម៌ដ៏ល្អផូរផង់ ដូចនេះសូមលើកទឹកចិត្តឱ្យសាលាទាំងអស់មានការយកចិត្តទុកដាក់បញ្ចូលនូវខ្លឹមសារពី បេតិកភណ្ឌជាតិទៅក្នុងកម្មវិធីសិក្សា ក៏ដូចជា លើកកម្ពស់ការរៀនភាសាខ្មែរដែលជាភាសាជាតិរបស់យើង ដើម្បីសិក្សាឱ្យស្គាល់ច្បាស់នូវអត្តសញ្ញាណជាតិរបស់ខ្លួនឱ្យបានច្បាស់លាស់ ដោយនេះគឺជាកិច្ចការសំខាន់មួយដើម្បីរក្សាបាននូវឫសគល់វប្បធម៌ដ៏ថ្លៃថ្លារបស់យើង។ ក្រសួងក៏បានពង្រីកផ្នែកអប់រំកូមារតូច និងលើកទឹកចិត្តឱ្យសិស្សចូលរៀនមត្តេយ្យសិក្សាកាន់តែច្រើន ដែលជាដំណាក់កាលមូលដ្ឋានគ្រឹះដ៏សំខាន់សម្រាប់អនាគតការសិក្សារបស់កុមារ»។

លោកបណ្ឌិតសភាចារ្យ ឧបនាយករដ្ឋមន្ត្រី ជឿជាក់យ៉ាងមុតមាំថា ជាមួយនឹងការគាំទ្រពីគ្រប់ភាគីពាក់ព័ន្ធ និងការខិតខំប្រឹងប្រែងពីលោកគ្រូ អ្នកគ្រូ ព្រមទាំងសិស្សានុសិស្ស សាលាទាំងពីរនេះនឹងបន្តរួមចំណែកយ៉ាងសកម្មក្នុងការបណ្តុះបណ្តាលធនធានមនុស្សប្រកបដោយគុណភាព ដើម្បីចូលរួមកសាងសង្គមជាតិឱ្យកាន់តែរីកចម្រើន ជាពិសេសចូលរួមចំណែកដើម្បីសម្រេចបានចក្ខុវិស័យអភិវឌ្ឍន៍ជាតិឆ្នាំ២០៣០ និង២០៥០៕

អត្ថបទ ៖ សំអឿន