ឧបនាយករដ្ឋមន្រ្តី ហ៊ុន ម៉ានី ៖ ការងារ​ស្ម័គ្រចិត្ត​ធ្វើ​ឱ្យ​យើង​ចេះអត់ធ្មត់​ចេះធ្វើការងារ​ជាក្រុម​និង​អភិវឌ្ឍន៍​ខ្លួន​ឱ្យ​កាន់​តែ​តឹងមាំ

ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ ប្រធានសហភាពសហព័ន្ធយុវជនកម្ពុជា និងជាប្រធានកិត្តិយសក្រុមការងារ គ្រូពេទ្យស្ម័គ្រចិត្ត ឯកឧត្តម ហ៊ុន ម៉ានីបានលើកឡើងថា ការចូលរួមការងារស្ម័គ្រចិត្តជួយឱ្យយើងចេះអត់ធ្មត់ ចេះធ្វើការងារជាក្រុម អភិវឌ្ឍស្មារតី ចំណេះ និងជំនាញ​ព្រម​ទាំង​ធ្វើ​ឱ្យ​យើង​ឱ្យ​កាន់​តែ​មាន​ភាព​រឹងមាំ។

ថ្លែង​ក្នុង​ពិធី​សំណេះសំណាល​ជាមួយ​សមាជិកថ្មី របស់ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ប្រចាំសាកលវិទ្យាល័យវិទ្យាសាស្ត្រសុខាភិបាលនៅព្រឹកថ្ងៃទី១៧កក្កដានេះ ឯកឧត្តម ហ៊ុន ម៉ានី បានបន្តថា ការងារស្ម័គ្រចិត្តត្រូវការទឹកចិត្តចេញពីបេះដូងនិងជាការវាស់វែងភាពអត់ធ្មត់ ការជួបប្រទះនូវការប្រតិបត្តិដោយផ្ទាល់រវាងការរៀននៅក្នុងថ្នាក់ និងការអនុវត្តជាក់ស្តែង ដើម្បីទទួលនូវការហ្វឹកហាត់ជាក់ស្តែង និងទទួលនូវបទពិសោធន៍ នាំមកនូវអនុស្សាវរីយ៍យូរអង្វែង។

ឯកឧត្ដម ហ៊ុន ម៉ានី បានបន្តទៀតថា ការ​ចូលរួមការងារស្ម័គ្រចិត្ត មិនត្រឹមតែសម្រាប់ជាប្រយោជន៍ដល់សង្គមប៉ុណ្ណោះទេ តែដើម្បីអភិវឌ្ឍស្មារតី ចំណេះ ជំនាញរបស់បុគ្គលរៀងៗខ្លួនម្នាក់ៗផងដែរ។ ឯកឧត្ដមបានពន្យល់បន្ថែមថា អំឡុងពេលបំពេញការងារស្ម័គ្រចិត្ត បុគ្គលម្នាក់ៗអាចសិក្សាអំពីកម្រិតនៃការអត់ធ្មត់ តស៊ូ របស់ខ្លួនដោយសារការងារស្ម័គ្រចិត្តទាមទារការតាំងចិត្ត ការលះបង់ខ្ពស់ទាំងស្មារតី និងកម្លាំងដើម្បីសម្រេចគោលដៅណាមួយ។ ទន្ទឹមនេះ អ្នកស្ម័គ្រចិត្តទាំងអស់អាចដកស្រង់ពិសោធន៍ និងអនុវត្តជាក់ស្តែងលើការងារទំនាក់ទំនង សម្របសម្រួល និងការសម្រេចចិត្ត ដែលសុទ្ធតែជាធាតុសំខាន់ក្នុងការបណ្តុះ និងសម្រួចភាពជាអ្នកដឹកនាំសម្រាប់ខ្លួនឯងផ្ទាល់។

លើសពីនោះទៀតសោត ការ​ចូលរួមរបស់អ្នកស្ម័គ្រចិត្តទាំងអស់ ក៏នឹងក្លាយជាភាព​ជា​គំរូ​ដល់​យុវជនដទៃទៀត​ឱ្យបន្តស្មារតី និងសកម្មភាពវិជ្ជមានដែលជះឥទ្ធិពលទៅលើសង្គម និងប្រទេសជាតិ ។

លោក សាស្រ្តាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល, ជាសាកលវិទ្យាធិការនៃសាកលវិទ្យាល័យវិទ្យាសាស្រ្តសុខាភិបាល និង​ជា​អនុប្រធានប្រតិបត្តិទទួលបន្ទុកជាប្រធានប្រតិបត្តិក្រុមការងារគ្រូពេទ្យស័្មគ្រចិត្ត ឯកឧត្ដម ហ៊ុន ម៉ានី ប្រចាំសាកលវិទ្យាល័យវិទ្យាសាស្រ្តសុខាភិបាលបានថ្លែងថា ការងារស្ម័គ្រចិត្តនេះគឺជាការផ្តល់ឱកាសដល់និស្សិត សាកលវិទ្យាល័យវិទ្យាសាស្ត្រសុខាភិបាល បានទទួលការរៀនសូត្របន្ថែម អនុវត្តផ្ទាល់នៅមូលដ្ឋាន និងឱកាស ចូលរួមលើកកម្ពស់សុខភាពនិងសុខុមាលភាពរបស់ប្រជាពលរដ្ឋ ដែលជាអទិភាពមួយ ដ៏សំខាន់ របស់រាជរដ្ឋាភិបាលហើយការចូលរួមសកម្មភាពមនុស្សធម៌ និងសង្គមទាំងនេះ បានបង្ហាញច្បាស់អំពីការយកចិត្តទុកដាក់ របស់ ឯកឧត្តម ប្រធាន និងក្រុមការងារគ្រូពេទ្យស្ម័គ្រចិត្ត ឯកឧត្តម ម៉ានី ទាំងអស់ ដែលតែងតែ ខ្វល់ខ្វាយគិតគូរ និងរួមសុខរួមទុក្ខជាមួយប្រជាពលរដ្ឋដែលជួបការលំបាកក្នុងគ្រប់កាលទេសៈ។

លោក សាស្ត្រាចារ្យបានបន្ថែមថា អំពើល្អទាំងនេះ ក៏ជាគំរូដ៏ឧត្តុងឧត្តម សម្រាប់ និស្សិត អនុវត្តតាមដើម្បីអភិវឌ្ឍខ្លួនឱ្យក្លាយជាអ្នកវិជ្ជាជីវៈសុខា ភិបាលដែលមាន គុណធម៌ សីលធម៌វិជ្ជាជីវៈខ្ពស់ និងតែងតែប្រកាន់ខ្ជាប់នូវស្មារតី ស្រឡាញ់ជាតិ ប្រព្រឹត្តតែ អំពើល្អ សុច្ចរិត ត្រឹមត្រូវ និង មិនទុកឱ្យប្រជាពលរដ្ឋណាម្នាក់ មិនទទួលបានសេវាសុខាភិបាល ប្រកបដោយ គុណភាពឡើយ៕

អត្ថបទ ៖ សំអឿន