ហាងឆេងមាសហក់ឡើងជាង ៤ ពាន់ដុល្លារ មួយតម្លឹង

តម្លៃហាងឆេងមាសបន្តមានទំនោរកើនឡើងដល់ជាង ៤ ពាន់ដុល្លារ ក្នុងមួយតម្លឹង នៅថ្ងៃ​អង្គារ​នេះ ខណៈបណ្ដាប្រទេសអឺរ៉ុបមួយចំនួន បន្តរងសម្ពាធពន្ធរបស់សហរដ្ឋអាមេរិក។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities បាន​ឱ្យដឹងថា ហាងឆេងមាសបានបើកផ្សារនៅ ៤០៩០ ដុល្លារ ក្នុងមួយតម្លឹង ហើយគិតត្រឹមម៉ោង ៩ ព្រឹកថ្ងៃអង្គារនេះ មាសកំពុងជួញដូរក្នុងតម្លៃ ៤០៧៩ ដុល្លារ ក្នុងមួយតម្លឹង ពោលគឺមាន​ទំនោរកើនឡើង។ សម្រាប់​ហាងលក់មាសនៅក្នុងរាជធានីភ្នំពេញ លក់ចេញ​ក្នុង​តម្លៃ ៤០៨ ដុល្លារ ក្នុង​មួយជី។

​លោក ឡុង សំណាង បានបញ្ជាក់ថា នៅថ្ងៃទី ២២ ខែកក្កដានេះ តម្លៃហាងឆេងមាសមានទំនោរកើនឡើង ដោយ​​សារការរងសម្ពាធពាក់ព័ន្ធនឹង អត្រាការប្រាក់លុយដុល្លារ ដែលកំពុងតែ មានការខ្វែង​គំនិត​គ្នាខ្លះ​រវាង លោក ដូណាល់ ត្រាំ ប្រធានាធិបតីអាមេរិក និងលោក​ប្រធាន​ធនាគារ​កណ្តាល​ Jerome Powell។

លោក ឡុង សំណាង បន្ថែមថា រឿងដែលសំខាន់មួយទៀតគឺពាក់ព័ន្ធនឹងសម្ពាធពន្ធ ពីបណ្ដា​ប្រទេស ឬក៏បណ្ដាហសហភាពអឺរ៉ុបមួយចំនួន ដែលអាមេរិកបានដាក់ពន្ធ ឬក៏បាន​លើកឡើងខ្លះៗ ពាក់ព័ន្ធជាមួយការចរចាពន្ធ។

បើតាមអ្នកជំនាញក្នុងវិស័យហិរញ្ញវត្ថុរូបនេះ ពន្ធនេះគឺជាក្ដីបារម្ភរបស់ធនាគារកណ្ដាលសហរដ្ឋអាមេរិក ដែលគេនឹងគិតថា តើគឹនឹងទម្លាក់​អត្រាការប្រាក់ ឬក៏ដំឡើងអត្រាការប្រាក់ វាអាស្រ័យលើសម្ពាធពន្ធហ្នឹងដែរ ប្រសិនបើសម្ពាធ​ពន្ធរងផលប៉ះពាល់ខ្លាំង វាធ្វើឱ្យអតិផរណាកើនឡើង ថ្លៃទំនិញកើនឡើង ប្រជាជននឹងពិបាក​ក្នុងការ​ចំណាយ ដូច្នេះ​លុយដុល្លារអាមេរិក ប្រសិនបើលុយអាមេរិកនឹងធ្លាក់ថ្លៃ វារងសម្ពាធដល់​សេដ្ឋកិច្ចអាមេរិកខ្លាំង វាអាចធ្វើឱ្យធនាគារកណ្ដាលសហរដ្ឋអាមេរិក ពិចារណាថា តើរក្សា​អត្រា​ការ​ប្រាក់នៅដដែល ឬកាត់អត្រាការប្រាក់តាមការស្នើរបស់លោក ដូណាល់ ត្រាំ។

លោក ឡុង សំណាង យល់ថា៖ «តម្លៃហាងឆេងមាសនៅតែកើនឡើងដដែល ទោះបីជា​ក្នុង​ស្ថាន​ភាពណាក៏ដោយ ទោះបីសេដ្ឋកិច្ចល្អឡើងវិញក៏ដោយ ក៏មាសឡើងថ្លៃដែរ បើយើង​និយាយពីអត្រាអតិផរណាលុយពីមួយឆ្នាំទៅមួយឆ្នាំ កាន់តែថោកបន្តិចម្ដងៗ យើងសាកស្រមៃបន្តិចទៅ កាលពី ២០ ឆ្នាំមុន មាស១ ជីប៉ុន្មានម៉ឺន? ប្រហែលជា ១០ ម៉ឺនរៀល អញ្ចឹមមកដល់ឥឡូវ ៤០០ ដុល្លារ អញ្ចឹងវាខុសគ្នារាប់រយដង គឺវាពាក់ព័ន្ធ​នឹងអត្រាអតិផរណា ចំណូលប្រជាជន និងចរន្តផ្សេងៗពាក់ព័ន្ធនឹងសេដ្ឋកិច្ច ដែលរុញមាសកើនឡើង»៕