ប៉ុស្តិ៍នគរបាលឃុំកាចូន ខេត្តរតនគិរី ណែនាំហាមបង្ហោះដ្រូនខណៈជម្លោះព្រំដែនកំពុងបន្ត

ប៉ុស្តិ៍នគរបាលឃុំកាចូន នៅស្រុកវើនសៃ ខេត្តរតនគិរី បានណែនាំពលរដ្ឋក្នុងមូលដ្ឋាន និងអ្នកផលិតមាតិកា ហាមបង្ហោះដ្រូនគ្មានមនុស្សបើកនៅតាមតំបន់ព្រំដែន និងទីតាំងសំខាន់ៗ ដើម្បីលើកកម្ពស់ការគ្រប់គ្រងនិងថែរក្សាសន្តិសុខ ខណៈជម្លោះព្រំដែនកម្ពុជា-ថៃកំពុងបន្ត។ ការប្រកាសហាមឃាត់ ធ្វើឡើងស្របតាមគោលការណ៍ណែនាំរបស់ក្រសួងមហាផ្ទៃស្តីពីការហាមបង្ហោះដ្រូនក្នុងកាលៈទេសៈនេះ។

លោក ថងលៀង ចាន់ធៀន មន្រ្តីនគរបាលប្រចាំការនៅប៉ុស្តិ៍កាចូន បានប្រាប់កម្ពុជាថ្មីថា បន្ទាប់ពីទទួលបានគោល ការណ៍ណែនាំពីក្រសួងមហាផ្ទៃ តាមរយៈកិច្ចប្រជុំពីចម្ងាយមក ក្រុមការងារបានចុះផ្សព្វផ្សាយនៅតាមតំបន់ទេសចរណ៍ និងមូលដ្ឋាន ស្តីពីការហាមបង្ហោះដ្រូនមួយរយៈសិន។ លោកបញ្ជាក់ថា៖«ប៉ុស្តិ៍នគរបាលឃុំកាចូន បានដាក់ចេញវិធានការហាមឃាត់ការបង្ហោះដ្រូនគ្រប់ប្រភេទជាដាច់ខាត ក្នុងការផ្តិតយករូបភាព ឬបម្រើឱ្យសកម្មភាពណាមួយ»។ លោកបញ្ជាក់បន្ថែមថា បើទោះបីជាភូមិឃុំកាចូន ស្រុកវើនសៃ នៅឆ្ងាយពីព្រំដែនវៀតណាម និងនៅឆ្ងាយពីជម្លោះព្រំដែនកម្ពុជា និងថៃក្តី ប៉ុន្តែវិធានការនាពេលនេះ ដើម្បីការពារសន្តិសុខ និងសុវត្ថិភាពសាធារណៈ។

ការដាក់ចេញវិធានការនេះ ស្របទៅនឹងគោលការណ៍ក្រសួងមហាផ្ទៃ ក្នុងគោលបំណង់លើកកម្ពស់ការគ្រប់គ្រងនិងថែរក្សាសន្តិសុខ សណ្តាប់ធ្នាប់សាធារណ: និងសុវត្ថិភាពសង្គមនៅតាមបណ្តាខេត្តជាប់ព្រំដែនជាមួយប្រទេសថៃនិងខេត្តពាក់ព័ន្ធក្នុងកាល:ទេស:ដែលប្រទេសជាតិត្រូវបានប្រទេសថៃរំលោភបំពានមកលើអធិបតេយ្យនិងបូរណភាពទឹកដីនៃព្រះរាជាណាចក្រកម្ពុជា។

ក្រសួងមហាផ្ទៃ កាលពីថ្ងៃទី ០៣ សីហា ឆ្នាំ ២០២៥ បានជម្រាបទៅកាន់អភិបាលខេត្តចំនួន៩ ត្រូវផ្សព្វផ្សាយឱ្យបានទូលំទូលាយដល់សាធារណជន ដោយត្រូវហាមឃាត់ មិនឱ្យមានការបង្ហោះយន្តហោះគ្មានមនុស្សបើក(ដ្រូន) ជាដាច់ ខាតក្នុងរយៈពេល ១៥ ថ្ងៃ ។ ក្នុងករណីមានការបង្ហោះយន្តហោះគ្មានមនុស្សបើក(ដ្រូន) អ្នកប្រព្រឹត្តល្មើស នឹងត្រូវទទួលទោសទណ្ឌ និងវិធានការរដ្ឋបាលតាមច្បាប់កំណត់ជាធរមាន៕

អត្ថបទ៖ ខៀវ ចាប