ព័ត៌មានជាតិ

អ្នកតាមដានយល់ថាថៃកំពុងយកទាហានខ្មែរធ្វើជាចំណាប់ខ្មាំង

បានផុស

១០ ខែ មុន

នៅ

ថ្ងៃអង្គារ ១២ សីហា ២០២៥

ដោយ

អ្នកតាមដានយល់ថាពេលនេះថៃកំពុងយកទាហានខ្មែរទាំង១៨នាក់ធ្វើជាចំណាប់ខ្មាំងក្នុងការដាក់លក្ខខន្តមកកម្ពុជា ហើយវិធានការដែលរដ្ឋាភិបាលគួរធ្វើពេលនេះគឺមានតែដាក់សម្ពាធពីអន្តរជាតិទៅលើប្រទេសថៃតែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះគឺបន្ទាប់ពីអ្នកនាំពាក្យយោធាថៃលោក Winthai Suvaree បានបញ្ជាក់ថាថៃនឹងមិនដោះលែងទាហានខ្មែរទាំង១៨នាក់នោះទេ ដរាបណាកម្ពុជាមិនឈប់ដាក់មីន ដែលជាការចោទប្រកាន់ដែលគ្មានការស៊ើបអង្កេត និងគ្មានការពិត។

ប្រធានវិទ្យាសា្ថនទំនាក់ទំនងអន្តរជាតិកម្ពុជាលោកបណ្ឌិត គិន ភា យល់ថាសកម្មភាពរបស់ថៃតាំងពីថ្ងៃចាប់ទាហានខ្មែរ និងការបន្តឃុំខ្លួនពួកគេនេះបានបង្ហាញយ៉ាងច្បាស់ពីឧក្រិដ្ឋកម្មសង្គ្រាមរបស់ថៃ។

លោកថា៖ «អ្វីដែលអ្នកនាំពាក្យកងទ័ពថៃលើកនេះគឺជារឿងដែលអត់អៀនខ្មាស់ ដែលដំបូងឡើយគាត់និយាយថាបងប្អូនយើងជាឈ្លើយសឹក តែឥឡូវនេះក្លាយជាចំណាប់ខ្មាំងហើយ។ បើគិតមែនទែនទៅគឺដូចចោរអ៊ីចឹងដែលចាប់ជម្រិតមនុស្សដើម្បីជាថ្នូរទៅនឹងអ្វីមួយដែលគេចង់បាន»។

អ្នកតាមដានភូមិសាស្ត្រនយោបាយលោកបណ្ឌិត ជ័យ តិច យល់ថាថៃអាចនឹងយកទាហានខ្មែរមកដាក់លក្ខខន្តក្នុងកិច្ចប្រជុំ RBC ខាងមុខដើម្បីជាថ្នូរនឹងការចូលមកកាន់កាប់ប្រាសាទតាក្របីឡើងវិញបន្ទាប់ពីច្បាំងចាញ់ខ្មែរក្នុងសង្គ្រាម៥ថ្ងៃ បន្ថែមលើនេះក៏អាចជាការដាក់សម្ពាធដល់រដ្ឋាភិបាលឱ្យដកពាក្យប្ដឹងនៅតុលាការយុត្ថិធម៌អន្តរជាតិ ICJ ផងដែរ។

លោកថា៖ «ជាអនុសាសន៍របស់ខ្ញុំមិនថាកិច្ចប្រជុំ RBC កិច្ចប្រជុំគណៈកម្មការព្រំដែនថ្នាក់តំបន់ កិច្ចប្រជុំគណៈកម្មការព្រំដែនទូទៅ គណៈកម្មការព្រំដែនរួមគ្រប់កិច្ចប្រជុំទាំងអស់ជាមួយថៃនេះគួរតែមានការអញ្ជើញឱ្យមានការចូលរួមពីភាគីទី៣មានអាស៊ានស្ថានទូតអនុព័ន្ធយោធា មានតំណាងមកពីប្រទេសដូចជាមហាអំណាចចិនអាមេរិកដើម្បីចូលរួមជាសាក្សីបើមិនដូច្នោះទេគឺគេនឹងប្រើប្រាស់នូវកលល្បិចក្រឡិចក្រឡុចដើម្បីបោកបញ្ឆោតកម្ពុជាទៀតហើយ»។

គិតមកដល់ថ្ងៃទី១២ ខែសីហា នេះមានរយៈពេល១៤ថ្ងៃហើយបន្ទាប់ពីទាហានថៃបានបំពានបទឈប់បាញ់ចូលមកទឹកដីខ្មែរចាប់ទាហានខ្មែរទៅឃុំឃាំង។ កម្ពុជានៅតែបន្តទទូចឱ្យថៃគោរពនូវកិច្ចព្រមព្រៀងដែលសម្រេចក្នុងកិច្ចប្រជុំ GBC កាលពីថ្ងៃទី៧ ខែសីហា និងប្រគល់ទាហានកម្ពុជាមកវិញជាបន្ទាន់។

ក្នុងសន្នីសិទសារព័ត៌មានព្រឹកថ្ងៃទី១២ ខែសីហា អ្នកនាំពាក្យក្រសួងការពារជាតិលោកស្រី ម៉ាលី សុជាតា បានលើកឡើងថា៖ «កម្ពុជានៅតែបន្តអំពាវនាវឱ្យភាគីថៃអនុវត្តតាមកិច្ចព្រមព្រៀង និងប្រគល់មកឱ្យកម្ពុជាវិញនូវទាហានចំនួន ១៨ រូប ដែលត្រូវបានភាគីថៃចាប់ខ្លួនក្រោយពេលបទឈប់បាញ់ដោយខុសច្បាប់ ដែលគិតមកដល់ពេលនេះរយៈពេល ១៤ ថ្ងៃហើយ ដើម្បីឱ្យពួកគាត់អាចត្រឡប់មកជួបជុំគ្រួសារវិញ ដោយគ្រួសារកំពុងរង់ចាំទាំងយប់ទាំងថ្ងៃ»។

គួរឱ្យដឹងផងដែរថាបន្ទាប់ពីមានការចាប់ខ្លួនទាហានរបស់ខ្លួនកម្ពុជាបានដាក់ញាត្តិជាបន្តបន្ទាប់ទៅកាន់ស្ថាប័នអន្តរជាតិដូចជា ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស នៅទីក្រុងហ្សឺណែវ និងប្រធានប្តូរវេនរបស់គណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស (អាយឆា) ប្រទេសម៉ាឡេស៊ី និងកាកបាទក្រហមអន្តរជាតិ ដើម្បីអន្តរាគមន៍ផងដែរ។

លោកបណ្ឌិត ជ័យ តិច យល់ថាកម្ពុជាបានបំពេញរាល់នីតិវិធីច្បាប់អន្តរជាតិរួចរាល់អស់ហើយ ហើយសម្រាប់ការប្ដឹងទៅកាន់តុលាការអន្តរជាតិគឺអាចជាជម្រើសចុងក្រោយ។

លោកថា៖ «កម្ពុជាកំពុងតែប្រើយន្តការច្បាប់អន្តរជាតិជាច្រើនដើម្បីទាមទារឱ្យមានការដោះលែងនូវទាហានទាំង១៨នាក់នេះ ហើយការប្ដឹងទៅតុលាការអន្តរជាតិគឺជាជម្រើសចុងក្រោយដែលកម្ពុជានឹងអាចប្រើដើម្បីទាមទារឱ្យមានការដោះលែងទាហានកម្ពុជា១៨នាក់ដែលនៅសេសសល់នេះ»។

សម្រាប់លោកបណ្ឌិត គិន ភា យល់ថាក្រៅពីវិធានការដែលមានសម្រាប់ កម្ពុជាត្រូវរៀបចំឯកសារបកអាក្រាតសកម្មភាពរបស់ថៃ រួមទាំងការដាក់ពាក្យប្ដឹងទៅកាន់តុលាការព្រហ្មទណ្ឌអន្តរជាតិអំពីឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិរបស់ប្រទេសនេះផងដែរ។

លោកថា៖ «នៅខែកញ្ញានេះគឺមហាសន្និបាតអង្គការសហប្រជាជាតិគឺយើងអាចលើបញ្ហានេះតំណាងរាជរដ្ឋាភិបាល ឬសម្ដេចធិបតីលោកអញ្ជើញផ្ទាល់ទៅចូលរួមមហាសន្និបាតត្រូវលើបញ្ហានេះនិងសង្គ្រាមឈ្លានពានសៀមមកលើកម្ពុជានៅមហាសន្និបាតអង្គការសហប្រជាជាតិ។ [..] កម្ពុជាត្រូវតែរៀបចំឯកសារភស្ភុតាងឯកសារទាំងអស់ដើម្បីប្ដឹងរដ្ឋាភិបាលថៃទាហានថៃទៅតុលាការព្រហ្មទណ្ឌអន្តរជាតិអំពីឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ របស់ពួកគេ» ។

គួរឱ្យដឹងថាទាហានថៃបានប្រើល្បិចបំពានបទឈប់បាញ់នៅព្រឹកថ្ងៃទី២៩ ខែកក្កដា ចូលមកចាប់ទាហានខ្មែរ២១នាក់ព្រំដែនជាំតែ ស្រុកជាំក្សាន្ត ខេត្តព្រះវិហារ។ ក្នុងចំណោមទាហានទាំង២១នាក់នាក់មានម្នាក់ត្រូវបានសម្លាប់ និង២នាក់ទៀតស្ថិតក្នុងស្ថានភាពរបួសផ្លូវកាយផ្លូវចិត្តធ្ងន់ធ្ងរត្រូវបានបញ្ជូនមកកម្ពុជា។ បច្ចុប្បន្ននៅសល់ទាហាន១៨នាក់ទៀតដែលថៃមិនព្រមប្រគល់មកវិញនោះទេ៕

អត្ថបទដោយ ហ៊ុន សិរីវឌ្ឍន៍

Related Topics:ជម្លោះព្រំដែនកម្ពុជា-ថៃ